Australia pawg nom tswj cov xwm txheej kab mob coronavirus (uas muaj thawj pwm tsav thiab tej hau xeev) tau pom zoo siv ib cov cai los tswj pej kum haiv thiab lub teb chaws no cov kev ntoj ncig kom muaj peev xwm pov puag tau tej neeg, thiab coj los tawm tsam tus kab mob coronavirus sib kis tau yooj yim heev uas muaj neeg kis tau ntawm teb chaws Askiv los uas muaj ceem zuj zus tuaj no lawm.
Thaj chaw Greater Brisbane (Moreton Bay, Ipswich, Redlands thiab Logan) los kuj raug teev tiav yog thaj chaw muaj tus "kab mob coronavirus no sib kis coob" raws tsoom fwv teb chaws cov qeb theem, tom qab uas tau muaj ib tug neeg tu vaj tse raug sim thiab paub tias kis tau tus mob no lawm - ces thiaj tau muab lub nroog Brisbane no kaw 3 hnub.
Raws li cov kev pauv hloov tshiab no ces tej neeg uas tseem tab tom npaj yuav caij dav hlau tuaj rau los yog rov qab los rau teb chaws Australia no yuav tsum tau mus sim kom paub tias tsis kis tus kab mob no ua ntej tso mam li tuaj, tsis tas li no los nom tswv kuj tau txo tsis pub tej neeg ncig txawv teb chaws rov qab los coob rau teb chaws Australia no lawm thiab.
Tej neeg caij cov fij dav hlau ntawm teb chaws Askiv tuaj yuav raug yuam kom yuav tsum sim cov kev sim uas paub kiag sai sai tias seb puas kis tus kab mob no ua ntej lawv yuav caij dav hlau mus tsev.
Yog li nom tswv thiaj hais kom tej neeg ncig teb chaws tsis hais tej tshav dav hlau hauv teb chaws no los yog tej tshav dav hlau pej kum haiv cov fij dav hlau uas tuaj tsaws rau teb chaws Australia no yuav tsum tau siv ntaub npog qhov ncauj - tsuas zam rau tej me nyuam yaus hnoob nyoog qes dua 12 xyoos xwb - tsis tas li no los tseem kom tej neeg siv rau tom pej kum haiv tej tshav dav hlau thiab.
"Tus kab mob no yeej hloov raws li qhov nws xav hloov xwb, txhais tau tias peb yuav tsum tau hloov raws thiaj yuav muaj peev xwm tawm tsam tau nrog tus kab mob no," raws li Mr Morrison tau hais.
Txawm li cas los kuj yuav zam rau qee cov neeg ua hauj lwm raws caij nyoog ntawm ib txhia teb chaws uas kis kab mob coronavirus tsawg thiab tsis tshua muaj cov kev sim rau tej neeg mus sim, tab sis lawv yuav raug nom tswv tshuaj ntsuam "tsi ntsees" seb puas kis tus mob no thiab.
Txo cov neeg tuaj txawv teb chaws tuaj kom tsawg mus txog ntua lub 2 hlis ntuj
Yeej tau txo tej neeg txawv teb chaws tsawg txog li 50% tsis pub tuaj rau teb chaws Australia no ntawm lub xeev New South Wales, Western Australia thiab xeev Queensland lawm.
Yog li thiaj tsuas pub tej neeg txog li 1,505 tus tuaj tau rau New South Wales rau ib limtiam twg lawm xwb, hos ntawm xeev Western Australia tsuas pub 512 tus neeg tuaj rau ib limtiam thiab ntawm xeev Queensland ces pub tuaj txog li 500 leej rau ib limtiam lawm xwb.
Xeev Victoria ces tseem yuav tso cai rau tej neeg tuaj tau txog li 490 leej rau ib limtiam twg - tom qab uas twb tau xub txo tej neeg no kom tsawg ua ntej rau lub caij tau rov qab muaj neeg kis kab mob zaum 2 ntawm lub xeev no dhau los lawm.
Yog li ntawd hnub zwj Kuab (Friday) dhau los uas tej nom tswv xeev tau sab laj dhau los ntawd, pawg nom tswj tej dej num no thiaj tau pom zoo tias yuav siv cov kev txwv tsis pub neeg tuaj coob no mus txog ntua hnub tim 15 February 2021 lawm.
Mr Morrison tau hais tias muaj tej neeg Australians txog li 80% uas tau teev zwm npe txawv teb chaws dhau los yog cov neeg uas tam sim no tseem nyob ntawm tej teb chaws uas yeej muaj pov thawj qhia tau tias muaj tus kab mob tshiab no.
Nws hais tias "Yeej tseem muaj ntau yam tsis tau paub txog thiab tsis tau paub tseeb txog tus kab mob tshiab no, yog li ntawd peb thiaj yuav tau siv cov tswv yim no los ua ib cov kev ceev faj, uas peb ntseeg tias yuav tau kub siab los tiv thaiv thiab pov puag tej neeg saw".
Paul Kelly uas yog tus coj lub koom haum tswj kev noj qab haus huv ntawm teb chaws Australia tau hais tias "lub tswv yim nruj, sai thiab muaj zog heev no" muaj lub hom phiaj los tiv thaiv kom txhob muaj kev phom sij los ntawm tus kab mob coronavirus uas sib kis tau yooj yim heev no kis rau lwm tus neeg.
Nws hais tias "Qhov tseem ceeb tshaj ces yog yuav tau xyuas kom neeg Australians tau txais kev nyab xeeb thiab yuav tau ua tib zoo xyuas kom tsis txhob muaj tus kab mob tshiab no los sib kis hauv teb chaws Australia no. Cov laj thawj tias vim li cas thiaj ua li no no ces twb yog vim tias yuav tswj tau tus kab mob no nyuaj dua lawm".
Ntxiv ntawd los tam sim no ces yuav tau coj txhua tus neeg ua hauj lwm tswj thiab zov tej neeg uas lawv yuav tau cais lawv tus kheej ntawd kom yuav tsum mus sim txhua txhua hnub thiab."
Pej kum haiv tej neeg tsav dav hlau thiab tej neeg ua hauj lwm nrog tej lagluam dav hlau los yuav tsum raug sim seb puas kis kab mob COVID-19 thaum lawv tuaj txog, thiab yuav tau cais lawv tus kheej rau ntawm tej chaw nom tswv npaj tseg rau lub caij uas yuav tau tos mam li rov qab tsav dav hlau raws lawv cov fij dav hlau rov qab thiab.
Yog li ntawd tam sim no ces yeej tseem muaj neeg txog li 38,000 tus tau teev zwm npe nrog Australia lub tuam chav lis laj fai pej kum thiab lagluam (Department of Foreign Affairs and Trade) tias lawv yog cov neeg xav rov qab txawv teb chaws los rau teb chaws Australia no.
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
