Yeej muaj cov kev txheeb pej xeem Australia txhua txhua 5 xyoos twg ib zaug thiab yog ib co tseem ceeb yuav qhia tau tias tej neeg nyob rau ntawm lub teb chaws no ib thaj chaw twg ho yog cov neeg dab tsi, nyob rau qhov twg thiab ho xav tau txais cov kev paub cuam uas tej zaum ho tau muaj kev pauv hloov lawm.
Thiab vim tseem muaj tus kab mob COVID-19 kis thoob ntuj ces thiaj ua rau muaj Australia tej pej xeem yuav laug txog ib nrab raug kaw tam sim no lawm, yog li ntawd thiaj yuav muaj cov kev txheeb pej xeem ib nyuag txawv zog rau xyoo no.
Txawm hnub zwj Quag (Tuesday) tim 10 lub 8 hli ntuj yog hmo txheeb pej xeem, los lub koom haum Australian Bureau of Statistics (ABS) yeej tau pub lub sij hawm 1 limtiam rau tej neeg los sau cov ntawv txheeb pej xeem no thiab.
Teresa Dickinson uas yog tus tswj cov hauj lwm txheeb pej xeem xyoo 2021 (Census 2021) hais tias:
“Yog tej yam yooj yim rau sawv daws vim rau qhov peb tsis muaj peev xwm ua tau lub neej li qub uas peb pheej yuav tau tos sau cov ntawv txheeb pej xeem rau ib hmo twg li ib txwm ua ntawm tsev lawm xwb. Peb thiaj ua zoo xyuas kom tej neeg koom txheeb pej xeem tau yooj yim thiab kom peb cov system txheeb pej xeem txhob tau ua hauj lwm ntau."
Tej cuab yig uas tseem tsis tau sau thiab xa cov ntawv txheeb pej xeem rov qab rau hnub tim 10 lub 8 hli ntuj yuav tau txais ib daim ntawv qhia rau lawv kom sau xa mus thiab yuav muaj tej neeg ua cov hauj lwm no mus txheeb kiag ntawd lawv tsev yog tias lawv tau txais kev nyab xeeb ua tau.
Tom qab ntawd ces mam li peb khaws thiab txheeb seb tej neeg ho teb tej lus txheeb pej xeem li cas, thiab mam li pib coj tej xov xwm txheeb pej xeem los qhia ua thawj zaug rau lub 6 hlis ntuj xyoo 2022.
ABS yuav tsis nplua koj yog tias koj tsis tau xa daim ntawv txheeb pej xeem rau nws rau hmo txheeb pej xeem ntawd.
"Tab sis koj yuav raug nplua yog tias koj tsis kam sau daim ntawv txheeb pej xeem tom qab koj tau txais daim ntawv qhia los yog ceeb toom tias koj tseem tsis tau sau daim Census form."
Daim ntawv ceeb toom yuav tshab txhais tias yog koj tsis sau daim ntawv txheeb pej xeem ces tej zaum koj yuav raug rau txim los yog raug nplua nyiaj txog li $222 rau ib hnub twg.
Txawm li cas los kuj muaj ib co kev txhais lus pab rau tej neeg xav tau kev pab cuam thiab.
Txawm tias daim ntawv txheeb pej xeem (Census form) yeej sau ua ntawv Aaskiv xwb los Ms Dickinson yeej tau hais tias yeej tseem muaj tej xov xwm txhais ua 29 hom lus hauv ABS lub vas sab thiab hauv social media thiab.
Tsis tas li ntawd los tej neeg yeej muaj peev xwm siv tau cov neeg txhais lus yog lawv hu rau lub koom haum txhais lus thiab txhais ntawv (Translating and Interpreting Services).
Ms Dickson hais tias “Peb kuj tseem npaj ib cov chaw rau tej neeg mus koom sau cov ntawv txheeb pej xeem, uas muaj tej neeg txhais lus ua lawv hom lus pab lawv thiab.
“Tab sis yeej muaj tej yam ces peb yeej tsis muaj peev xwm pab tau tej neeg tim ntsej tim muag ntxiv lawm, vim tseem muaj tus kab mob coronavirus sib kis ces peb thiaj yuav tau hais koj tej neeg mus sau hauv online lawm xwb."
Cov kev txheeb pej xeem 2021 (2021 Census) thiaj yog thawj yog Australia thawj cov kev txheeb pej xeem raws keeb kwm rau lub caij tseem muaj kab mob sib kis thoob ntuj.
Ms Dickson tau hais tias yuav pab kom peb paub ntau yam txog tias peb lub neej tam li ib tug pej xeem ho zoo li cas.
“Nws tsis yog tsuas qhia txog ib cov xwm txheej dab tsi rau ib ib lub caij twg xwb tab sis tseem yuav pab kom yus muaj peev xwm los piv tej no rau ntev ntxiv thiab."
“Yog li ntawd cov kev txheeb pej xeem no thiaj yuav yog ib cov qhia tau tej xov xwm ntxhaws txog ib co chaw me me twg, ib pawg neeg tsawg tsawg twg hais tias seb lub caij tseem muaj kab mob sib kis thoob ntuj no ho ua rau muaj kev pauv hloov rau lawv txoj kev ua lub neej li cas lawm thiab."
Txawm tias ABS yeej tau hais tias cov kev txheeb pej xeem xyoo no yuav yog ib cov zoo tshaj plaws raws li tau muaj dua los - vim tau ua tib zoo tswj nws cov online platform, muaj kev pab cuam xov tooj ntau ntxiv thiab muaj cov kev haub tau yaum taw qhia rau zej tsoom lawm los - zoo li yeej tseem xa tsis tau tej xov xwm no tau yooj yim rau ib txhia neeg zejzog thiab xws li tej neeg Australia uas tsis muaj faj tse nyob los yog tsis muaj chaw nyob uas tseem pw rau ub rau no ntawd thiab.
Lyn Edge yog tus coj tswj lub koom haum Salvation Army cov hauj lwm tau hais tias yeej tau muaj ntau lub koom haum los koom ua hauj lwm nrog tej neeg no pheej yuav tau siv tej xov xwm tau los ntawm cov kev txheeb pej xeem no ntau heev coj los pab lawv cov kev txiav txim siab ua ib yam hauj lwm dab tsi xwb.
"Vim yog ib cov xov xwm tseem ceeb rau cov kev npaj kev txhim kho, kev faib peev txheej, thiab kev pab cuam, thiab tseem yuav pab kom tsim tau tej kev pab cuam raug pab rau tej neeg xav tau rau lub neej pem suab thiab."
Yeej tsis muaj peev xwm yuav sib cuag tau yooj yim nrog tej neeg tsis muaj vaj tse nyob uas tsis muaj ib qho chaw nyob ruaj rau lub caij tseem muaj kab mob sib kis thoob ntuj no li. Lub koom haum Salvation Army kwv yees tias ntawm txhua txhua 1 tug neeg tsis muaj vaj tse nyob ua raug suav ntawm ces yeej tseem tshuav 13 tug uas tseem tsis tau raug suav rau hauv cov kev txheeb pej xeem thiab.
Yog li Ms Edge thiaj txhawb nqa kom yog hais tias lawv ho paub ib tug neeg twg uas tsis muaj vaj tse nyob thiab pw rau ub rau no los yog ho tawm tsev mus nyob rau lwm qhov ces xav kom pab tej neeg no sau lawv cov ntawv txheeb pej xeem rau lub limtiam yuav los txog no thiab.
Nws hais tias "Yog tias muaj ib tug neeg twg nrog nej nyob, thiab nyob ntawm nej ib chav seem, los yog qev nej lub pw (qev chaw pw) ces ua tib zoo nrog xyuas kom lawv ho muaj peev xwm tawm tau tswv yim rau cov kev txheeb pej xeem no thiab.''
