Daniel Andrews uas yog hau xeev Victoria qhia tias lub hom phiaj ntawm cov kev txwv theem 4 rau nroog Melbourne thiab txwv theem 3 rau tej zos yaj sab ntawm xeev Victoria yeej muaj lub hom phiaj xav kom tej neeg nyob twj ywm hauv tsev.
"Nyob twj ywm hauv tsev txhais tau lub ntsiab lus tias nyob twj ywm hauv tsev," nws tau hais li ntawd.
Cov kev txwv nroog Melbourne tshiab no yeej muaj cov kev txwv tsis pub neeg tawm hmo ntuj txij 8 pm tsaus ntuj txog 5 am sawv ntxov txhua txhua hmo thiab txwv tsis pub tej neeg mus nrug deb ntawm lawv tsev tshaj 5 kilometres, suav nrog cov kev mus yuav khoom noj haus thiab khoom siv tseem ceeb los yog cov kev mus ua exercise tib sib nrog. Yog leej twg tseem tsis ua raws cov kev txwv no thiab yuam ces yuav raug nplua ze txog li $5,000 uas hloov ntawm $1,652 thaum xub pib lawm.
Tab sis txawm yuav muaj cov kev txwv nruj heev li peb tau pom txij li tau pib muaj tus kab mob no sib kis ntawm teb chaws Australia los yeej tseem muaj qee cov kev zam rau qee cov xwm txheej thiab.
Peb (SBS) kuj tau nug tej neeg nyeem xov xwm tias seb lawv ho xav li cas txog cov tswv yim tshiab coj los txwv tej neeg, ces ntawm no yog tej lus lawv qhia.
Tej kev txwv no ho yuav muaj tau teeb meem dab tsi rau tej neeg ntiav tsev nyob uas tag sij hawm ntiav nyob lawm es yuav tau mus nrhiav dua tsev tshiab nyob?
Raws li lub tuam chav noj qab haus huv thiab pab cuam zej tsoom (Department of Health and Human Services (DHHS)) cov kev taw qhia, ces tej neeg ntawm nroog Melbourne tsuas tau txais kev tso cai tawm tau ntawm tsev : mus yuav khoom noj khoom haus thiab khoom siv tseem ceeb, mus ua exercise los yog mus serivces ib yam dab tsi, mus tu saib xyuas ib tug neeg twg los yog mus kho mob thiab mus kawm ntawv thiab ua hauj lwm uas tsis muaj peev xwm ua tau ntawm tsev xwb.
Tab sis yeej zam rau cov kev tawm mus nyob lwm lub tsev tshiab thiab kuj tso cai rau tej neeg no teem caij mus xyuas lub tsev tshiab uas xav ntiav nyob ntawd tau.
Yus puas muaj peev xwm tsiv mus nyob lub tsev tshiab deb tshaj 5 km ntawm yus lub tsev qub?
Muaj peev xwm ua tau, koj muaj cai tawm mus tau deb tshaj 5 km ntawm lub tsev koj nyob tam sim no yog koj tsiv mus nyob rau lub tsev ntiav nyob tshiab tau raws lub sij hawm nom tswv tso cai (tab sis tsis pub tawm mus thaum tsaus ntuj 8pm txog 5 am uas nom tswv txwv tsis pub neeg tawm mus qhov twg).
Tab sis yeeej tseem tsis tau paub meej tseeb tias ho puas tso cai rau tej neeg mus pab koj tsev neeg thauj khoom tsiv mus nyob lub tsev tshiab kom meej li cas. Raws cov kev txwv theem 3 ces tsuas pub koj tsev neeg thiab koj ib tug phooj ywg los yog koj ib tug txheeb ze ntawm koj tsev neeg muaj cai pab koj tshem khoom xwb.
Kuv thiab kuv tus hluas nraug wb nyuam qhuav yuav tau ib lub tsev tshiab nyob rau lwm lub zos thiab wb yuav mus kho kom muaj peev xwm mus nyob tau. Wb puas tau txais kev tso cai mus xyuas tau lub tsev ntawd?
Raws li DHHS qhia ces yeej tsis pub mus xyuas lub tsev 2 uas yus yuav ntawd tab sis kuj zam qee yam thiab tsuas yog yuav tau mus kho khom sai yog yus yuav tawm mus nyob lub tsev ntawd lawm xwb.
Mr Andrews yeej tau hais rau hnub Monday (3 August 2020) dhau los tias "tej zaum kuj yuav tso cai rau tej neeg mus them nyiaj yuav tsev tau yog lawv twb lis tej ntaub ntawv no lawm."
“Kuv tsis xav kom khuam daig dab tsi rau tej neeg tsis muaj peev xwm mus lis ntaub ntawv yuav tsev kom tiav. Thiab kuv tsis xav kom muaj dab tsi cuam tshuam ua rau tej neeg yuav tau tsiv ntawm ib lub tsev mua nyob dua rau lub tshiab vim lawv lub sij hawm ntiav nyob tag lawm," raws li Mr Andrews tau qhia.
Hais txog cov neeg ua hauj lwm kho ib yam dab tsi ces tsuas tso cai rau 5 tug neeg mus ua tau hauj lwm rau ntawm ib lub tsev twg rau ib lub caij twg txij hnub Wednesday tim 5 August 2020 no mus lawm. "Tsis yog lub caij yuav pleev xim tshiab rau koj lub tsev los yog ua tej yam dab tsi tsis tsim nyog ua uas tau tom qab," nws tau hais li ntawd.
Koj puas muaj peev xwm tawm ntawm tsev mus deb tshaj 5 kilometre ntawm kom tsev mus tu thiab saib xyuas koj tej me nyuam nrog koj tus txwj nkawm sib nrauj nram ntej ub li neg tau npaj tseg?
Ua tau, raws li DHHS hais ces tej niam txiv cov kev tus saib xyuas tej me nyuam yeej muaj peev xwm ua tau, txawm yog tsev hais plaub yog tus txiav txim los yog nkawm niam txiv ntawd tau pom zoo ces yeej muaj peev xwm ua tau li qub txuas ntxiv.
Qhov no txhais tau tias koj muaj peev xwm coj koj tus me nyuam ntawm ntawm koj tsev thiab xa mus rau koj tus txij nkawm nram ntej ub los yog mus tos koj tej me nyuam ntawm koj tus txij nkawm nram ntej ub tsev rov qab los rau koj lub tsev tau.
Puas pub tej pog thiab yawg tawm ntawm lawv tsev mus zov lawv tej xeeb leej xeeb ntxwv ntawm lawv tej me nyuam lub tsev?
Raws li Dr Brett Sutton uas yog xeev Victoria tus coj tswj kev noj qab haus huv tau qhia ces tsuas pub tej pog thiab tej yawg mus zov tau lawv tej xeeb leej xeeb ntxwv yog tias lawv tej me nyuam yog cov neeg ua hauj lwm tseem ceeb thiab nrhiav tsis tau neeg tuaj zov lawv tej me nyuam lawm.
Thiab Kim (Mister-Mr) Andrews kuj tau qhia rau lub caij teb lus nug rau hnub zwj Hli (Monday) tim 3 August 2020 dhau los tias "Yuav tsum tsis txhob cia tej neeg tuaj rau yus tsev kom tsawg npaum li tsawg tau yog tsis muaj hauj lwm dab tsi tseem ceeb."
Kuv tus tab zag thiab kuv wb muaj 3 tug me nyuam ua ke. Puas pub wb coj lawv nrog wb tawm tsev mus ua exercise ua ke los yog wb yuav tau faib kom xwm yeem 2 leeg nruab nrab es tseg ib tug nyob tsev tsis txhob mus?
Yog tias neb yog tus tu thiab saib xyuas neb tej me nyuam ntawd thiab tsis muaj neeg zov lawm ces muaj cai coj nrog neb tawm tsev mus ua exercise ua ke nrog neb txhua hnub tau.
“Yog tias neb ho yog leej niam leej txi uas muaj tej me nyuam me, los neb yeej muaj peev xwm coj lawv tawm tsev nrog neb mua ua exercise sab nraum zoo los yog nrog neb mus tau kev tau thiab," raws li Mr Andrews tau qhia rau hnub Sunday dhau los.
Puas pub ib tug neeg twg tos koj mus yuav khoom tom tej supermarket los yog mus ntsib kws kho ob yog koj tsav tsis tau tsheb lawm?
Tiag mas yeej tsis tso cai rau koj nrog ib tug neeg txawv koj tsev neeg caij tsheb ua ke tsuas yog tias ntshe yuav tau mus ua ib yam dab tsi rau ib qho chaw qhov twg uas nom tswv tso cai mus tau xws li mus yuav zaub mov noj, yuav khoom tseem ceeb siv los yog mus services yog tias ntshe ho tsis muaj lwm txoj xub ke pab kom lawv mus tau lawm xwb.
Nqe no ces yeej suav ib tug neeg twg uas tseem tsis tau muaj ntawv tsav tsheb nrog thiab.
Tham txog cov kev mus ntsib kws kho mob lawm ces DHHS cov kev txwv yeej teev tias "Koj muaj peev xwm tawm tau ntawm tsev nrog ib tug neeg twg thiab coj tus neeg ntawd mus ntsib kws kho mob tau yog tias koj yog tus neeg ntawd niam thiab txiv, yog tus neeg tus thiab saib xyuas tus neeg ntawd, los sis yog tus neeg pab tus neeg ntawd."
Puas pub koj mus xyuas koj tus hluas nkauj hluas nraug uas nyob lwm lub tsev? thiab puas pub koj pw hmo ntawm nws lub tsev?
Yog tias koj tus hluas nkauj hluas nraug ntawd nyob lwm lub tsev ces koj muaj peev xwm mus xyuas tau nws.
tab sis nyob rau cov rooj ncauj lug uas Mr. Andrews tau hais rau hnub Sunday dhau los ntawd ces nws yeej tau hais tias "Yog koj pw qhov twg nag hmo ntawd ces xav kom koj yuav tsum nyob twj ywm ntawm qhov chaw ntawd rau lub sij hawm 6 limtiam ntxiv tom ntej no," tab sis kuj yuav tsis siv nqe lus no rau tej hluas nkauj hluas nraug uas tsis nyob ua ke.
Nyob rau ib cov rooj ncauj lug uas rau xa tuaj rau SBS News, ces DHHS yeej tau hais tias tsim nyog koj yuav tsum npaj mus xyuas koj tus hluas nkauj hluas nraug rau lub caij ua ntej nom tswv yuav txwv tsis pub koj tawm thaum 8 pm tsaus ntuj ntawd.
Kuv yuav yug me nyuam rau lub sij hawm 4 limtiam tom ntej no. Es puas pub kuv tus txiv nrog kuv mus ua ke mus tu saib xyuas kuv?
Tso cai "pub ib tug neeg pab" tawm tau ntawm tsev nrog ib tug neeg uas yuav mus kho ib yam mob dab tsi tau.
, ces tej nom tswv tswj kev noj qab haus huv yeej tau qhia tias pub ib tug neeg ''uas yog tus txiv los yog tus niam los yog tus neeg pab'' nrog tus poj niam yuav mus yug me nyuam ntawd ua ke tau thiab muaj cai nrog tus poj niam yug me nyuam ntawd nyob ntev npaum li qov tsim nyog kom pab tau tus poj niam ntawd tom qab yug me nyuam tag.
Tom qab ntawd ces tsuas pub tej txiv mus xyuas nws tus poj niam thiab mob lias ib hnub ib zaug ntev txog li 2 teev lawm xwb.
Yus tsuas muaj cai tawm tau ntawm tsev mus ua tau raws li 4 cov laj thawj nom tswv tso cai xwb, tab sis yog ho muaj qee cov khw muag khoom tsis tseem ceeb dab tsi qhib es yus ho xav mus rau hauv tej khw ntawd puas muaj cai mus tau rau hauv tej khw ntawd?
Tej khw muag khoom me feem ntau yeej raug yuam kom muab kaw tag tib si txij li hnub Wednesday tim 5 August 2020 no mus lawm raws li cov kev txwv theem 4 uas siv tswj nroog Melbourne. Tsuas zam rau tej chaw li kiab khw supermarkets, grocery stores, chaw muag dej caw, chaw yuav tshuaj, txhab nyiaj (banks), chaw muag ntawv xov xwm (newsagents) thiab chaw xav ntawv (post offices) lawm xwb.
Lwm cov khw muag khoom li Bunnings Warehouse, ces tseem tso cai rau qhib ua tau lagluam tab sis yuav tsis pub mus nrog ib tug twg sib tham los yog nyob ze ua ke lawm, tsuas pub mus nyem rau ib qho chaw qhov twg thiab cia li yuav nqa tej khoom ntawd mus lawm xwb, thiab pub cov lagluam xa khoom mus rau lwm tus lawm xwb raws li Mr Andrews tau qhia rau hnub Monday dhau los.
Puas pub koj mus deb tshaj koj lub supermarket ib txwm mus rau lwm qhov chaw kom yuav rau cov nqaij ntawm cov chaw muag nqaij halal?
Nyob rau cov kev txwv theem 4 no ces cov kev mus yuav tau khoom siv tseem ceeb li zaub mov noj kuj yog qee yam laj thawj koj muaj peev xwm tawm tsev mus yuav tau-tab sis yeej tseem muaj ib cov lus zoj khi thiab.
Tsuas pub ib tug neeg ntawm ib tsev neeg twg tawm ntawm tsev mus yuav tau khoom noj thiab khoom siv ib zaug rau ib hnub twg xwb, thiab tsis pub tus neeg ntawd mus nrug deb ntawm nws tsev tshaj 5 kilometres. Tsis tas li no los yeej xav kom tej neeg yuav tsum nyob kom ze ntawm lawv tsev npaum li qhov lawv ua tau, thiab xav kom mus yuav khoom ntawm tej kiab khw supermarket ze tshaj plaws ntawm lawv xwb.
Tab sis raws li Mr Andrews tau qhia txog cov kev txwv no rau hnub Sunday dhau los ntawd ces nws yeej tau hais tias nom tswv kuj yuav zam qee yam rau ib txhia thiab yog tias lawv tsis muaj peev xwm yuav tau yam khoom siv khoom noj ntawd rau tej khw nyog 5 kilometres ntawm lawv tsev lawm, piv txwv li cov nqaij halal uas cov neeg muslim noj los yog cov zaub mov kosher uas cov neeg Jewish noj ntawd.
Txawm li cas los Department of Heath and Human Services (DHHS) yeej tau hais tias tsim nyog koj tsuas mus yuav kom tau tej khoom hais no deb npaum li qhov koj mus tau xwb thiab tsis txhob mus rau tej chaw no uas nrug ntawm koj tsev ntev tshaj qhov tsim nyog.
Lub khw kuv yuav zaub mob thiab khoom siv zes tshaj plaws ntawm kuv nyob nrug 13 kilometres diam tab sis puas pub kuv mus yuav taj khoom pheej yig zog ntawm tej khw uas nyob deb tshaj ntawd ntxiv thiab?
Koj muaj cai mus deb tshaj 5 kilometres mua yuav tej khoom noj khoom haus thiab khoom siv tsee ceeb tau yog tias tsis muaj tej khoom ntawd ntam tej khw ze koj lawm, tab sis zoo li yeej tsis muaj tej khw yuav muag khoom pheej yig tshaj tej nyob ze koj dua thiab.
Puas tso cai rau kuv coj kuv tej tsiaj tu ntawm sev mus ntsib kws kho tsiaj los yog tej chaw tu tsiaj?
Koj muaj peev xwm coj koj tej tsiaj mus ntsib kws kho tsiaj tau. Tab sis hais txog nqe yuav coj koj tej tsiaj mus txiav plaub txiav raus tes ntawd ces DHHS yeej tau hais tias tsuas pub koj tawm tau ntawm tsv mus siv tau cov lagluam uas nom tswv tso cai qhib ua luam raws cov kev txwv theem 4 xwb.
"Tsis hais cov services ib yam twg uas tsis tshua tseem ceeb (suav cov kev txiav plaub tsiaj nrog tib si tsuas yog seb ho muaj tej zwj ceeb zoo li cas xwb) tsim nyog yuav tau muab ncua tseg tso," raws li ib tug kis ntawm lub tuam chav DHHS tau qhia.
Puas suav koj cov kev tawm nraum zoov cog zaub ntawm koj thaj tsib taug ua ntej ntawm koj tsev tias yog nyob hauv koj tsev?
Cov kev cog zaug rau ntawm thaj chaw li hais no sab nraum koj tsev yeej tsis xam tias yog cov kev mus ua exercise 1 teev uas tso cai rau koj ua tau, tab sis koj yuav tsum tau siv ntaub npog qhov ncauj.
Tej neeg ntawm nroog Melbourne yuav tsum tau ua raws li cov kev txwv theem 4 thiab yuav tsum nyob twj ywm hauv tsev txij sij hawm 8 pm tsaus ntuj txog 5 am sawv ntxov. Nyob rau lub caij txwv tsis pub neeg tawm no tsuas tso cai rau tej neeg mus ua hauj lwm, mus kho mob tseem ceeb, mus tus lwm tus los yog yuav tau tawm tsev yog lawv tsis tau txais kev nyab xeeb xwb.
Nyob rau lub sij hawm 5am sawv ntxov txog 8pm tsaus ntuj ntad ces tej neeg ntawm nroog Melbourne muaj cai taw tau ntawm tsev mus ua execise tau 1 teev, mus yuav tau tej khoom noj khoom haus thiab khoom siv tseem ceeb, mus ua hauj lwm, mus kho mob, mus tu ib tug neeg mob twg los yog tu ib tug laus neeg txheeb ze twg tau. Mus txheeb xyuas tau tias muaj cov kev txwv dab tsi tag nrho
Tag nrho txua tus neeg Victorians yuav tsum siv ntaub npog qhov ncauj thaum tawm ntawm tsev mus rau ib qho chaw qhov twg, tsis hais lawv yuav nyob rau qhov twg ntawm lub xeev Victoria no li.
Tej neeg ntawm teb chaws Australia yuav tsum nyob kom nrug ntawm lwm tus neeg yam tsawg li 1.5 metres. Txheeb koj lub xeev seb ho muaj cov kev txwv tsis pub tej neeg sib sau ua ke li cas ntxiv. Yog tias koj tau khaub thuas thiab muaj cov yam ntxwv mob lawm, nyob twj ywm hauv tsev thiab hu xov tooj nrog koj tus kws kho mob tham los yog hu rau lub koom haum tswj tej xov xwm txog cov kev noj qab haus huv thiab kab mob coronavirus tus xov tooj 1800 020 080 tau.
Yog koj xav paub xov xwm thiab cov zaj xov xwm txog tus kab mob COVID-19 no ces yeej muaj tej xov xwm no ua 63 hom lus rau koj mus txheeb tau tau ntawm .
