Nyob rau lub caij muaj neeg kis tau tus kab mob coronavirus no tsawg zuj zus ces kuj muaj cov xwm txheej sib txawv tau tshwm sim ntawm tej xeev lawm, qhov no txhais tau tias ntshe teb chaws Australia yuav tsis muaj peev xwm rov qab tib txhij qhib ua ke lawm.
Hnub zwj Quag (Tuesday) 23 June ntawd ces yeej tau muaj neeg kis tau tus kab mob coronavirus ntau tuaj ntxiv txog li 2 npaug rau lub sij hawm 1 limtiam no.
Hos ntawm xeev South Australia ces tau ntau limtiam los no yeeje tsis muaj neeg kis tau tus kab mob no tshiab li, ces thiaj ua rau nom tswv ntawm lub xeev no npaj yuav siv cov kev txwv theem tshiab los txo qee cov kev txwv lawm thiab.
Tab sis ho tab tom muaj dab tsi tshwm sim ntawm cov xeev? Raws li tej xov xwm tau tshwm sim rau hnub tim 23 June dhau los no ces muaj kev pauv hloov li hauv qab no lawm:
Xeev Victoria (VIC)
Victoria tau qhia tias nws muaj 19 tus neeg kis tau tus kab mob no rau hnub Sunday dhau los, muaj 16 tus kis tau tus mob no rau hnub Monday thiab 17 tus kis tus mob no rau hnub Tuesday dhau los, ces thiaj ua rau nws muaj neeg kis tau tus kab mob coronavirus tshiab txog li 193 leeg rau lub sij hawm 9 hnub dhau los no lawm.
Nyob rau 2 hnub so dhau los ntawd, xeev Victoria thiaj yog thawj lub xeev ntawm teb chaws Australia uas tau rov qab los siv cov kev txwv tus kab mob coronavirus no nruj tuaj ntxiv lawm.
Nom tswv yeej tau rov qab hais tas hais ntxiv tias
Tab sis lawv xav tias tej zaum yog tej cuab yig cov kev sib sau ua ke coob heev yog cov xwm txheej ua rau muaj neeg kis tus kab mob no.
Vim li ntawd, tam sim no ces thiaj pub 5 tug neeg mus xyuas tau ib yim neeg twg lawm xwb, los yog pub sib sau tau ua ke nraum zoov txog li 10 leej lawm xwb.
Txawm li cas los yeej tseem pub 20 tus neeg mus noj mov ntawm tej khw noj mov, los yog haus kasfes ntawm tej chaws muag kasfes. Thiab pub tej neeg haus tau cawv tab sis tsis pub noj mov tau.
Cov neeg 20 leej no ces tsuas pub mus tau rau cov chaw sib tw hauv tsev, chaw saib duab, chaw khaws puav pheej qub, chaw saib yeeb yaj duab thiab tej chaw ua yeeb yam xwb.
Tej chaw teev hawm ntiag tug, los yog tej koom txoos coj ntseeg thiab cov kev sib twv nqe yuav khoom los yeej tsuas pub 20 tus neeg mus koom tau xwb thiab.
Tsis tas li no los nom tswv yeej tau hais kom pej xeem Australia tsis txhob mus los rau ntau cov zos uas tseem muaj kab mob coronavirus sib kis xws li: Hume, Casey, Brimbank, Moreland, Cardinia thiab Darebin.
Xeev South Australia (SA)
South Australia yeej tso cov kev txwv ntaug me ntsis lawm, xws li tso cai rau 75 tus neeg sib sau tau rau ntawm ib lub tsev twg thiab tso cai rau 300 tus neeg sib sau ua ke tau ntawm ib thaj chaw twg lawm.
Steven Marshall uas yog South Australia tus hau xeev tau qhia rau hnub zwj Quag (Tuesday) 23 June dhau los tias, nws lub xeev yuav tshem lwm cov kev txwv kom ntau tuaj ntxiv, vim tau ntau limtiam los no yeej tsis muaj ib tug neeg kis tau tus kab mob COVID-19 no lawm.
Txij tim 29 June mus ces txhua qhov chaw muaj peev xwm tso cai rau tej neeg mus koom siv tau tej chaw ntawd tab sis yuav tsum kom tej neeg nyob kom nrug ntawm lwm tus li 2 square meteres, uas ho tsis hais kom tej neeg yuav tau nyob nrug ntawm lwm tus neeg li 4 square metres li xub hais ua ntej lawm.
South Australian Premier Steven Marshall this week. Source: AAP
Cov kev pauv hloov no yuav tso cai rau tej lagluam no muaj peev xwm txais neeg mus siv lawv cov services txog 2 npaug coob tuaj ntxiv, uas yog ib cov kev pab kom tej lagluam tos txais qhua muaj peev xwm ua tau lagluam zoo tuaj ntxiv.
Tej tshav sib tw los kuj muaj cai pub tej neeg mus koom siv tau txog li 50%, qhov no txhais tau tias yuav tso cai rau tej neeg tshaj 25,000 tus mus koom saib cov kev sib tw ntawm lub tshav sib tw ncaws pob Adelaide tau.
SA yeej tau tso tseg tsis hais kom tej neeg ntawm cov xeev Tasmania, Western Australia, Queensland thiab Northern Territory uas mus rau nws lub xeev cais lawv tus kheej 2 limtiam ntxiv lawm. Hos tej xeev no los yeej yuav tsis ua tib yam li no txij hnub tim 20 lub 7 hli ntuj no mus lawm thiab.
Mr Marshall tau hais tias xeev SA yeej muaj peev xwm los tswj tau tus kab mob no zoo kom muaj peev xwm tshem tau tag rho cov kev txwv uas tswj nws tus ciam teb no rau hnub zwj thaj ntawd, tab sis nws tseem yuav tau ua tib zoo los soj qab txog tej xwm txheej kab mob uas tseem sib kis ntawm nroog Melbourne seb zoo li cas ntxiv tso.
Hos nyob rau tib lub caij no los nom tswv kuj yuav txib tub ceev xwm mus txheeb tej neeg ntawm xeev Victoria uas tau mus rau lub xeev SA no, kom tej neeg no yuav tsum tau ua raws li tej cai tswj kab mob coronvirus uas nom tswv tau teev tseg ntawd.
Xeev New South Wales (NSW)
Tam sim no ces lub xeev no tso cai rau 20 tus neeg sib sau tau ntawm zej tsoom ib qho chaw qhov twg thiab muaj cai mus xyuas tau ib tse neeg twg tau.
Tej Pubs, bars thiab khw noj mov ces pub 50 tus neeg mus koom tau tab sis yuav tsum kom tej neeg no nyob kom nrug ntawm ib tug neeg twg li 4 square metres. Thiab tsuas pub ib pab neeg coob kawg nkaus txog li 20 leej mus tau rau ntawm tej chaw li hais no xwb.
Tsuas pub 20 tus neeg mus koom tau cov rooj tshoob los yog tej ntees tab sis xav kom tej neeg yuav tsum tau xyuas kom nyob nrug ntawm lwm tus neeg li 4 square meteres thiab.
A crowded Sydney street. Source: AAP
Tej chaw saib duab thiab khaw qub puav pheej ces yeej tau rov qab pib qhib rau tej neeg mus xyuas lawm, tab sis yuav tsum xyuas kom ib tug neeg twg nyob kom nrug ntawm lwm tus li 4 square metres.
Txij hnub tim 1 lub 7 hli ntuj ces tso cai rau me nyuam yaus thiab zej tsoom rov qab koom tau cov kev sib tw lawm.
Tab sis hau xeev Gladys Berejiklian tau ceeb toom rau tej neeg ntawm nws lub xeev tias kom txhob nplhom moj.
Nws hias tias "peb tsis muaj peev xwm qhia tau qhov tseeb tias yog li cas, vim NSW tseem yog lub xeev muaj neeg kis tau kab mob coob tshaj, yog li ntawd ces peb thiaj tsis paub tias yuav zoo li cas ntxiv. Peb yuav tsum tau xyuas tej chaw nyob sab qab teb ntawm peb tej ciam teb tias zoo li cas lawm, tsam peb ho muaj neeg kis kab mob thiab yog tias tej neeg tsis ua raws li nom tswv qhia."
Xeev Queensland (QLD)
Tam sim no ces twb tau sij hawm 6 hnub lawm uas xeev Queensland tsis muaj ib tug neeg kis tau tus kab mob coronavirus li, thiab tsuas muaj 2 tug neeg uas tau tus mob no lawm xwb.
Thiab yeej zoo tib yam li lub xeev NSW uas nws tso cai rau 20 tus neeg sib sau tau ua ke ntawm zej tsoom tej chaw los yog mus xyuas tau ib yim neeg twg.
Nws kuj tso cai rau 20 tus neeg mus tau rau tej chaw noj mov, pubs thiab bars.
Thiab pub 20 leej mus koom tej rooj tshoob los yog pub neeg txog li 100 leej koom tau tej ntees.
Tsis tas li no los nom tswv kuj tau teev tseg tias yuav qhib nws lub xeev tej ciam teb rau hnub tim 10 lub 7 hli ntuj, tab sis vim tseem muaj neeg sib kis tus mob COVID-19 no ntawm xeev Victoria ces xyov puas yuav ua tau raws li lub caij tau teem tseg no thiab.
People enjoy a picnic in Brisbane. Source: AAP
Xeev Western Australia (WA)
Tam sim no ces xeev WA twb tau siv cov tswv yim tshem cov kev txwv theem 3 lawm kom pab tau nws tej lagluam li qub, thiab tab tom tso cai rau neeg txog li 100 leej sib sau tau ntawm zej tsoom tej chaw los yog ib qho chaw ntiag tug twg, thiab pub tej neeg txog li 300 leej sib sau tau rau ib qho chaw muaj ntau chav rau tej neeg mus koom tau.
Lub xeev no yuav hla ntawm theem 3 mus siv theem 4 txij hnub zwj Cag (Saturday) tim 27 June no mus, thiab yuav tshem tag nrho txhua cov kev txwv uas siv txwv tej pubs, khw noj mov thiab lwm cov chaw ua ntau yam hauv tej vaj tse uas tau siv dhau los.
Tab sis yeej tseem kom tej neeg yuav tsum tau nyob kom nrug ntawm lwm tus neeg li 2 square metres tsis hais tej chaw ntawd yuav yog cov chaw nyob hauv tsev los yog nraum zoov li.
Tej chaw feem ntau yeej muaj cai siv txog li 50%, thiab tso cai rau neeg koom tau txog li 30,000 tus rau tom tej chaw muaj tshav sib tw li Optus Stadium, los yog pub neeg txog li 35,000 tus mus koom tau koom txoos paj nruag tau.
Theem 5 ces yuav pib siv txij li hnub tim 18 July uas yuav tsis hais kom tej neeg nyob sib nrug ntawm lwm tus li 2 square metres rau txhua cov kev txwv rau tej neeg cov kev sib sau ua ke, kom tso cai rau neeg txog li 60,000 tus mus koom saib tau cov kev sib tw ntawm lub tshav sib tw Optus Stadium thaum rov qab muaj cov kev sib tw AFL ntawm lub xeev Western Australia no txuas ntxiv.
Tab sis Mark McGowan uas yog WA tus haus xeev ho tsis kam qhia kom meej kiag tias hnub twg kiag mam li pib siv cov kev txwv theem 6 uas yuav tso cai rau lub xeev no rov qab pib qhib tau nws cov ciam teb.
Xeev Tasmania (TAS)
Tam sim no ces xeev Tasmanians yeej muaj cai to tau 20 tus qhua tuaj yuav lawv ib tse neeg twg tau ntawm ib lub tsev twg.
Ntxiv ntawd txog hnub tim 26 June zwj Kuab (Friday) ces nom tswv yuav tsis siv cov kev txwv uas tsuas pub 80 tus neeg sib sau tau rau ntawm zej tsoom tej chaw li khw noj mov, cafes, thiab tej bars ntxiv lawm.
Tam sim no yeej tseem pub neeg txog li 80 leej mus koom tau tej rooj tshoob thiab tej ntees tab sis yuav tsum nyob kom nrug ntawm lwm tus li 4 square meteres.
Xeev Northern Territory (NT)
Lub xeev no ces yeej tsis muaj neeg kis kab mob coronavirus li, ces thiaj tsuas muaj qee cov kev txwv tsawg tsawg coj los siv tam sim no xwb.
Txawm li cas los yeej tsis txwv tias pub pes tsawg tus neeg mus xyuas lwm tus neeg ntawm tej tsev, pub zej tsoom sib sau ntawm zej tsoom tej chaw, tej chaw teev hawm, rooj tshoob thiab tej ntees ntawm lub xeev Northern Territory no li. Tab sis nom tswv yeej hais kom tej neeg yuav tsum nyob kom nrug ntawm lwm tus neeg txhua sij hawm.
Tsis tas li no los yeej tsis muaj cov kev txwv tej lagluam dab tsi li, yog tias lawv muaj cov COVID-19 Safety Plans siv lawm.
The Darwin Hotel after restrictions eased. Source: AAP
Tab sis tsuas pub 2 tug neeg mus xyuas tau tej laus ntawm tej tsev laus rau ib lub caij twg xwb. Tsuas yog tias ntshe ho muaj lwm yam xwm txheej xwb, thiab tsis pub tej neeg hnoob nyoog qes dua 16 xyoo mus xyuas tej tsev laus.
Xeev Australian Capital Territory (ACT)
Yeej zoo tib yam li xeev NT thiab ACT uas yog cov xeev uas yeej qhib kev dav rau tej neeg ntawm teb chaws Australia no thiab.
Txawm tias lub xeev ACT yeej tsis muaj kev txwv tias pub pes tsawg tus neeg mus xyuas tau ib yim neeg twg, los nws yeej tseem tsis tau pub neeg tshaj 100 leej mus sib sau ua ke rau ntawm zej tsoom tej chaw thiab.
Tej chaw teev hawm, rooj tshoob, ntees thiab tej chaw tos txais qhua ntawd ces pub neeg txog li 100 leej mus koom tau.
Tej chaw muag zaub mov noj ntau lub sib tib ua ke ces yuav muaj cai qhib ua lagluam thiab cia tej neeg mus zaum noj mov tau txij hnub tim 10 lub 7 hli ntuj xyoo 2020 no mus lawm.
Xeev ACT los kuj tseem muaj cai txwv tej tsev laus tib yam li xeev NT uas pub 2 tug neeg mus xyuas tau tej laus ntawm tsev laus xwb, tab sis tej neeg no yuav tsum yog cov neeg muaj hom phiaj mus pab tej laus thiab pub lawv nyob ntev txog li 2 teev ntawm tej tsev laus xwb. Tsis pub cov hluas hnoob nyoog qes dua 16 xyoo mus xyuas, tsuas yog tias ntshe ho muaj xwm txheej dab tsi tshwm sim xwb.
Txhua tus neeg ntawm teb chaws Australia yuav tsum nyob kom nrug ntawm lwm tus neeg deb li 1.5 metres, thiab nom tswv tsuas pub 2 tug neeg ua ke xwb tsuas yog tias ntshe tej neeg ntawd ho yog koj tsev neeg los yog koj yim neeg uas yog tib lub tsev ua ke xwb.
Tam sim no yeej muaj ntau cov COVID-19 clinics thoob teb chaws Australia no rau koj mus sim seb puas yog kis tus mob coronavirus no lawm. Yog koj ntseeg tias tej zaum koj kis tau tus kab mob virus no lawm, txhob mus ntsib koj tus kws kho mob tab sis hu mus nrog koj tus kw kho mob tham los yog hu mus rau lub koom haum National Coronavirus Health Information Hotline tus xov tooj 1800 020 080. Thiab yog koj txog txog siav ua tsis tau pa thiab mob hnyav heev ces hu rau tus xov tooj 000 thov kev pab cuam tau.
SBS yeej kub siab los qhia tej xov xwm tshiab txog cov kab mob coronavirus (COVID-19) ua 63 hom lus rau Australia tej neeg zej zog. Yog koj xav paub txog ntau yam xov xwm ua ntau hom lus ces koj mus txheeb xyuas tau ntawm sbs.com.au/coronavirus thiab txheeb xyuas tau cov xov xwm no ua ntawv Hmoob thiab lus Hmoob tau.
Additional reporting by AAP.
