Tsoom fwv tau tshwm nyiaj 1 billion dollars coj los qhia cov ntawv Askiv (English) txuas ntxiv thiab yuav ua tib zoo los xyuas kom tej neeg kawm tau yooj yim vim tseem txhawj tias tej neeg tau mus kawm ntawv Askiv uas kawm tiav ntawd yeej tseem siv tsis tau tau lus Askiv zoo.
Alan Tudge uas yog Australia tus kis pwm tsav lis laj fai tswj cov dej num tsiv teb tsaws chaw tau qhia txog cov kev hloov cov kev qhia ntawv Askiv rau tej neeg tsiv teb tsaws chaw muaj hnoob nyoog (Adult Migrant English Program (AMEP)) rau lub caij nws nrog tej neeg tshaj xov xwm tham ntawm National Press Club hnub Friday uas muaj cov kev kho cov sij hawm chav kawm, thiab kho lub sij hawm 5 xyoos uas tej neeg muaj cai kawm yuav tau kawm lawm.
Tam sim no ces cov kev qhia ntawv AMEP no tsuas pub sij hawm 510 teev rau tej neeg tsiv teb tsaws chaws tuaj nyob teb chaws Australia no mus kawm tau ntawv thiab kawm lus Askiv yam tsis tau them nqe kawm dab tsi. Ntxiv ntawd los kuj yuav tsim ib cov sob kawm los qhia hauv online rau tej neeg tau kawm thiab.
Tab sis Mr Tudge tau qhia tias tej neeg yeej tsuas tau mus kawm tej chav kawm ntawv Askiv txog li 300 teev thiab yeej muaj tej neeg uas kawm cov sob kawm no txog 21% kawm tas los "yeej siv tsis tau lus Askiv zoo, los sis yog yeej tsis tau txawj siv tej lus Askiv yooj yooj yim uas yuav muaj peev xwm siv tau nrog teb nrog chaw li tham tau li ".
"Mr Tudge thiaj hais tias-kuv xav txhawb nqa kom tej neeg li hais no yuav tsum siv lub cib fim no los kawm kom tau lus thiab tau ntawv Askiv kom siv tau zoo zog tuaj ntxiv."
Mr Tudge tau qhia tias raws li tau muaj kev kwv yees lwm ces yeej muaj tej neeg thoob teb chaws zes txog li ntawm 1 roob (million) tus yeej tsis paub lus Askiv zoo tam sim no, ces thiaj ua rau ib txhia neeg tsiv teb tsaws chaw "plam txiaj ntsim loj heev" rau tej kev nrhiav hauj lwm ua thiab cov kev muaj peev xwm koom tau ua lub neej nrog tej neeg Australia.
Alan Tudge addresses the National Press Club in Canberra, Friday, August 28, 2020 Source: AAP
“Tsis yog tias peb yuav liam ib tug twg tias kawm tsis tau ntawv thiab lus Askiv zoo, tab sis yog lawv tsis muaj peev xwm kawm tau zoo lawm ces yuav ua rau lawv tsis muaj peev xwm koom ua tau lub neej nrog tej neeg zejzog kom puv npo, vim rau qhov lawv tseem muaj cov teeb meem tsis paub ntaub ntawv thiab lus zoo," raws li Mr. Tudge tau qhia.
“Yog tias tsis paub lus Askiv lawm, ces tej neeg tsiv teb tsaws chaw yeej yuav tsis muaj peev xwm nrhiav tau hauj lwm ua, thiab yuav tsis muaj peev xwm koom tau nrog tej neeg ntawm teb chaws no ua lub neej thiab ntshe yuav tsis tshua koom tau peb txoj kev tswj hwm democracy."
Raws li cov kev txheeb pej xeem xyoo 2016 dhau los ntawd tau qhia, ces yeej muaj ib co neeg ntawm teb chaws Australia qhia tias lawv tsis muaj peev xwm hais tau lus Askiv zoo los yog yeej siv tsis tau lus Askiv hlo li ntau tuaj ntxiv txog li 820,000 tus rau xyoo 2016 yog piv rau xyoo 2006 ces tsuas muaj tej neeg no txog li 560,000 tus xwb.
Mr Tudge los kuj tau hais tias tej neeg ntawm teb chaws Australia tos ho tsis paub ntawv Askiv zoo los vim yeej tseem muaj feem cuam tshuam los ntawm pej kum haiv lub fwj chim thiab.
"Tej xov xwm phem los yog cov tswv yim ntxias dag yeej raug coj los nthuav qhia rau tej xov xwm ua ntau hom lus uas yeej muaj ib cov lus txawv teb chaws uas tshaj tej xov xwm ntawd yeej raug tej nom tswv tshwm nyiaj pab los yog tsoom fwv ua cov tswj."
"Ces tej hais no thiaj muaj fwj chim heev rau ib txhia neeg yog tias lawv tsis paub lus Askiv zoo thiab pheej tos mloog tej xov xwm txawv teb chaws ua lwm hom lus ntau xwb."
Pab nom Labor los kuj tau hais rau hnub Friday dhau los tias tus tsoom fwv koom tswj no yeej tsis kub siab txog cov kev qhia ntawv Askiv rau tej neeg tsiv teb tsaws chaw muaj hnoob nyoog (Adult Migrants English Programs-AMEP) los tau 7 lub xyoo no lawm, thiab lub caij kab mob coronavirus sib kis thoob ntuj no thiaj li yog ib lub cib fim zoo rov qab los kho cov kev pab cuam rau tej neeg tuaj ua lub neej tshiab ntawm teb chaws Australia no dua.
“Labor yuav ua tib zoo los koom tes nrog tsoom fwv teb chaws Australia thiab tej neeg zejzog hais ntau hom lus thiab coj ntseeg ntau yam kev cai dab qhuas los xyuas kom tsim tau cov kev qhia ntawv AMEP haum raws li tej neeg zej zog tsiv teb tsaws chaw xav tau, thiab txhawb nqa kom muaj txoj kev sib koom npoj haum xeeb," raws li Andrew Giles uas yog pab nom Labor tus pwm tsav lis laj fai tswj cov dej num multicultural affairs tau qhia.
"Cov kev paub siv thiab paub hais tau lus Askiv zoo yog ib feem tseem ceeb ntawm txoj kev tuaj pib ua dua lub neej tshiab, thiab pab kom tej neeg tsiv teb tsaws chaw muaj peev xwm muaj feem koom ua tau lub neej puv npo ntawm teb chaws Australia no."
Yuav qhia kom tej neeg no siv tau coj los xeem ua pej xeem
Raws li Mr Tudge tau qhia ces cov kev hloov tej kev qhia cov chav kawm ntawv thiab kawm lus Askiv rau tej neeg tsiv teb tsaws chaw ua muaj hnoob nyoog (AMEP) yeej yog ib yam ntawm ntau yam uas tsoom fwv xav kub siab los xyuas kom tsim tau kev koom npoj rau zej tsoom rau lub caij uas Australia maj mam nyiaj ntxeem kom dhau tus kab mob coronavirus uas sib kis thoob ntuj no.
Tsoom fwv yeej kub siab yuav los nrog xyuas ntxiv kom tej neeg kawm tiav muaj peev xwm mus xeem tau los ua Australia tej pej xeem thiab yuav kho cov lus nug thaum xeem ntawd kom paub txog Australia tej kev coj taug ua zoo thiab.
“Mr Tudge tau qhia tias-pej xeem Australia yeej tau txais txiaj ntsim 2 yam xws li yuav tau txais ntau yam txiaj ntsim thiab yuav muaj lub luag hauj lwm yuav tau ua, thiab tsuas pub ib tug neeg twg uas txhawb nqa peb tej kev coj taug ua zoo, hwm peb tej cai thiab xav los pab txhim kho Australia lub neej pem suab los ua pej xeem Australia xwb."
Txawm li cas los kuj tau muaj neeg coob tshaj 200,000 no lawm.
Yog li tsoom fwv teb chaws thiaj tab tom npaj ib cov kev teeb txheeb los ua tib zoo txheeb kom nkag siab txog tej neeg zejzog cov kev xav kev tawm tswv yim txog cov kev sib koom npoj thiab yuav txhawb nqa kom muaj tej neeg ua hauj lwm sib cuag nrog tej neeg zejzog (Community Liaison Office) coob tuaj ntxiv yog cov neeg uas paub hais 2 hom lus ''kom thiaj li muaj peev xwm tsim tau cov kev txhawb nqa kom nthuav dav tshaj no los txhawb peb lub cim thawj haiv".
“Ces tej hauj lwm no thiaj yuav txhawb nqa peb tej kev coj taug ua zoo, txhawb nqa peb cov lus thiab pab kom peb muaj txoj kev sib koom npoj tshaj qub ntxiv." raws li Mr Tudge tau qhia.
