Tau rov qab muaj neeg kis tau kab mob coronavirus ntawm xeev Victoria ntau tuaj ntxiv tshiab txog 191 tus neeg rau hnub zwj Quag (Tuesday) dhau los thiab yog ib cov kev sib kis kab mob coob tshaj plaws rau ib hnub twg txij li tau muaj tus kab mob no sib kis thoob ntuj los txog tam sim no. Ces tej xwm txheej no thiaj tau ua rau nom tswv xeev Victoria txiav txim siab rov qab muab nroog Melbourne kaw 6 limtiam (1 hlis thiab 7 hnub) pib txij ib tag hmo hnub zwj Feej (Wednesday) tim 8 July 2020 no mus lawm.
Ntawm cov neeg kis tau tus mob no tshiab ces muaj 13 tug cuam tshuam nrog 9 lub tsev Flat uas tam sim no nom tswv tseem tab tom muab kaw tsis pub tej neeg nyob ntawm tej tsev no tawm mus qhov twg.
Ces thiaj ua rau ua rau muaj neeg kis tau tus mob no coob ntxiv tuaj txog li 64 ntxiv rau 127 tus neeg uas xub kis rau nag hmo ntawd.
Zeskais Brett Sutton uas yog tus coj xeev Victoria lub koom haum tswj kev noj qab haus huv tau qhia tias muaj cov neeg li hais ntawd tau kis tus kab mob no nag hmo, ces thiaj ua rau lub xeev no muaj neeg kis tau tus kab mob no txog li 2842 leeg lawm.
Thiab tam sim no yeej tseem muaj cov neeg kis tau tus mob no txog li 772 leej ntawm xeev Victoria.
Ces nyob rau lub caij uas xeev Victoria muaj neeg kis tau tus mob no coob tuaj xeev NSW thiaj tau npaj los kaw nws cov ciam teb npuab xeev Victoria, rau lub caij uas xeev Victoria tseem yuav tau los tiv thaiv kom tsis txhob muaj tus kab mob no sib kis rau lwm tus ntxiv.
Thiaj li ua rau nom tswv yuav txib tub ceev xwm li ntawm 350 txog rau 500 tus raug xa mus tswj cov ciam teb uas raug kaw txij ib tag hmo hmo zwj Quag (Tuesday) mus lawm.
Tej leem (Tub rog) los yeej yuav los pab tej tub ceev xwm los tswj tej hauj lwm no tab sis yuav tsis cuam tshuam ncaj qha txog tej hauj lwm uas tub ceev xwm ua ntawd.
Witness to the Melbourne Towers 'violations': what happened during the lockdown was against human rights and the rights of all people Source: AAP
Tsis tas li no kuj muaj 8 tus neeg ua hauj lwm ntawm tsev kho mob Northern Hospital ntawm Epping lub tuam chav Emergency Department kis tau tus mob COVID-19 no thiab tau muaj ib tug ho tau mus kis rau ib tug neeg ntawm nws tsev thiab raws li ABC News tau qhia.
Txawm li cas los lub tuam chav Eemergency department yeej tseem qhib pab tej neeg tag sis tsis pub tej neeg uas tsis mob sab thiab mob hnyav dab tsi uas yuav phais ntawd mus phais ntxiv nrog rau cov neeg mus pw tsev kho mob ntawd raug muab ncua ib ntus lawm thiab.
Tsis tas li no los kuj tseem muaj ib tug neeg ua hauj lwm kis tau tus kab mob no ntxiv thiab nws yog tus neeg ua hauj lwm ntawm lub tsev laus Assisi ntawm lub zos Rosanna ntawm nroog Melbourne sab qaum teb hnub tuaj ntxiv lawm thiab.
Txawm li cas los tus neeg ua hauj lwm no kuj tsis ua hauj lwm rau lub caij uas nws muaj peev xwm kis tau tus kab mob no rau lwm tab sis nom tswv tseem sam sim npaj sim tej neeg ua hauj lwm thiab cov lauas ntawm lub tsev laus no rau hnub zwj Quag no lawm.
Tej neeg uas nyob ntawm tej tsev Flat siab ntawd yog tias leej twg xav tau kev pab cuam dab tsi ces tsim nyog hu rau Housing Call Centre tus xov tooj 1800 961 054. Thiab yog tias koj xav tau neeg txhais lus los yog txhais ntaub ntawv ces hu tau rau tus xov tooj 131 450. 2 cov kev pab cuam hais no ces yeej muaj peev xwm hu thov tau kev pab cuam 24 teev 7 hnub. Thiab yog koj xav tau xovxwm kom ntxaws ntxiv ces txheeb tau .
Tej neeg ntawm teb chaws Australia yuav tsum nyob kom nrug ntawm lwm tus li 1.5 metres ntawm lwm tus neeg. Txheeb xyuas tej cai ntawm koj lub xeev seb ho muaj cov kev txwv li cas ntxiv.
Yog tias koj muaj cov yam ntxwv mob khaub thuas ces nyob twj ywm ntawm tsev thiab hu xov tooj nrog koj tus kaws kho mob sab laj los yog hu tau rau tus xov tooj 1800 020 080 nrog lub koom haum Coronavirus Health Information Hotline tham tau.
Yog koj xav tau xov xwm txog cov kab mob coronavirus ua 63 hom lus ces mus txheeb xyuas tau ntxiv ntawm
