Key Points
- Txhab nyiaj faj seeb haiv (Reserve Bank) tau qhia tias yuav tshem niam huab tais Elizabeth II ntawm Australia daim nyiaj $5 tawm.
- Thiab yuav siv dua ib co design los "tsa koob meej thiab kab lis kev cai keeb kwm ntawm Australia tej neeg txum tim.''".
- Reserve Bank tau qhia tias yeej tau muaj cov kev sab laj txog tej hauj lwm no nrog tsoom fwv lawm.
Australia daim nyiaj $5 yuav raug kho dua tshiab, thiab yuav siv ib co design tshiab coj los tsa Australia tej keeb cag neeg tej meej mom, kab lis kev cai thiab keeb kwm'' coj los hloov niam huab tais Elizabeth II daim duab.
Hos lwm sab ntawm daim nyiaj no ces tseem yog Australia lub tsev tsoom fwv txuas ntxiv.
Australia lub txhab nyiaj faj seeb haiv (Reserve Bank of Australia - RBA) tau hais tias yeej tau muaj kev sab laj nrog Australia tej neeg txum tim los tsim daim nyiaj tshiab no lawm.
Ces thiaj yuav tau siv sij hawm ntau xyoo los tsim thiab luam daim nyiaj no.
RBA tau hais tias tau muaj cov kev txiav txim siab no tom qab uas tau sab laj nrog tsoom fwv Australia thiab nws los yeej pom zoo txhawb nqa cov kev hloov daim nyiaj no.
Txhais tias cov kev kho daim nyiaj no tshiab yuav tsis siv huab tais Charles III daim duab coj los hloov nws niam daim duab hauv daim nyiaj $5 no. Raws li ib txwm ua mas yeej muaj ib daim duab ntawm Askiv tus huab tais tseem tswj hwm ntawm daim nyiaj no.
Jim Chalmers uas yog tus nom tswj nyiaj txiaj rau tsoom fwv teb chaws tau hais tias, cov kev hloov no yog ''ib lub cib fim zoo heev los xyuas kom muaj kev luj haum rau ob tog.""
Nws tau hais tias "Txawm li cas los yeej tseem muaj tus duab huab tais ntawm tej nyiaj npib, tab sis daim nyiaj $5 no ces yuav yog ib daig hais txog peb tej keb kwm, tej puav pheej thiab peb lub teb chaws, uas kuv pom tias yog ib yam zoo."
Peter Dutton uas yog tus coj ntawm lwm pab nom tsis pom zoo rau cov kev hloov daim nyiaj no, thiab hais tias yog ''tej yam tsis muaj qab hau dab tsi.''
Nws tau hais rau lub xov tooj cua 2GB hnub zwj Teeb (Thursday) tias "Kuv paub tias yeej muaj tej neeg feem coob uas nyob ntsiag to ntawd yeej tsis pom zoo nrog tej xwm txheej tsis muaj qab hau dab tsi uas tseem tshwm sim no, thiab peb yuav tau xyuas seb tej neeg siv online ho xav li cas txog tej no ntxiv.''
Mr Dutton tau liam thawj pwm tsav Anthony Albanese tias yog tus muaj feem tseem rau cov kev txiav txim siab tseem ceeb kom tsis txhob siv huab tais tus duab tso rau hauv daim nyiaj no, thiab hais kom nws ''kav tsij lees.''
Tom qab lub 9 hlis ntuj tsaib no uas niam huab tais Elizabeth II tau nruam sim lawm, ces tej neeg nyiaj tsev neeg huab tais tau nqua hu kom siv huab tais Charles II daim duab tso rau hauv daim nyiaj $5.
Craig Foster uas yog tus coj ntawm lub koom haum Australian Republic Movement - uas yog lub koom haum xav kom zej tsoom ua tus tswj hwm thiab tsis nce rau tsev neeg huab tais los kuj zoo siab rau cov kev pauv hloov no, thiab tau hais tias - ''tsis muaj laij thawj dab tsi ntxiv yuav tsim nyog pheej siv daim duab ntawm ib tug huab tais txawv teb chaws hauv Australia tej nyiaj lawm."
Nws tau hais rau hnub zwj Teeb (Thursday) dhau los tias “Cov kev pheej tseem xav tias ib tug huab tais uas tsis raug leej twg xaiv los ua huab tais tsim nyog muaj duab nyob hauv peb tej nyiaj coj los hloov neeg txum tim tsoom coj los yog Australia tej coj tseem ceeb ntawd tsis tsim nyog rau lub caij uas peb yuav tau los qhia qhov tseeb, los kho kom muaj kev haum xeeb thiab yuav tau los lees paub peb tej kab lis kev cai thiab lees paub txog peb lub tsab peev xwm txhawj txeeg yam ywj pheej lawm.''
“Tej cim qhia txog haiv neeg tseem ceeb heev. Vim yog tej yam qhia rau peb los yog qhia rau ntiaj teb txog tej uas peb saib rau nqe, thiab qhia tias seb peb ho pom txog tej peb tau ua tiav li cas los yog puas xam tias yog ib feem tseem ceeb ntawm peb tus cim thawj haiv (national identity).''
Chair of the Australian Republic Movement, Craig Foster, welcomed the Reserve Bank's decision to update Australia's $5 note. Source: AAP
Nws hais tias “RBA cov kev txiav txim siab lees paub txog qhov tseem ceeb ntawm Australia tej neeg txum tim lub sam thiaj no yog peb zaj dab neeg haiv.''
“Tsim nyog neeg Australia nkaus xwb yog cov sawv cev rau lawv tus kheej hauv peb tej txhooj cai tswj haiv, peb cov kev tswj hwm thiab tag nrho peb tej cim haiv uas muaj peb tej nyiaj nrog tib si."
Daim nyiaj $5 tam sim no ces yeej tseem yuav siv tau txuas ntxiv thiab muaj rau tej neeg siv rau lub caij uas tseem los npaj tej txheej txheem yuav los tsim dua daim tshiab ntawd, thiab yeej tseem muaj peev xwm siv tau daim nyiaj $5 qub no txuas ntxiv txawm tias tsim tau daim tshiab coj los siv lawm.
Australia tej nyiaj ces yeej muaj tej duab ntawm tej neeg Australia ''uas tau ua ib yam dab tsi tseem ceeb rau haiv neeg no rau hauv,'' raws li RBA lub vas sab tau qhia.
"Tej neeg uas muaj lawv tej duab hauv Austria tej nyiaj ntawd yeej yog tej neeg uas tau ua ntau yam tseem ceeb los pab rau teb chaws Australia, ces thiaj tso lawv daim duab rau hauv peb tej nyiaj coj los lees paub txog lawv tej meej hmo tsim nuj rau hauv peb tej dab neeg haiv.''
