Raws li tsab ntawv cej luam Gallup tau qhia tsis ntev los no ces yeej muaj tej neeg Australia ua hauj lwm yuav laug txog ib nrab tseem tab tom xav nrhiav ib txoj hauj lwm tshiab ua tam sim no los sis yog yeej kub siab heev nrhiav dua ib txoj hauj lwm tshiab ua.
Vim tej zaum tej hauj lwm ntawd ua rau tej neeg ua hauj lwm nyuaj siab heev, pheej tsis tshua muaj peev xwm ua tau lub neej li lawv xav ua vim yuav tau ua txoj hauj lwm ntawd thiab tej nyiaj khwv tau los tsis tshua tau ntau raws li ib txwm khwv tau thiab, ces tag nrho tej hais no thiaj yog ntau yam laj thawj ua rau tej neeg xav nrhiav dua hauj lwm ua rau lwm qhov. Thiab tej zaum yeej muaj tej neeg coob heev xav tias txoj hauj lwm tshiab ntawd yuav khwv tau nyiaj ntau dua.
Txawm li cas los tej zaum kuj tsis yog li yus xav ntawd thiab, tab sis yeej muaj ntau txoj xub ke pab kom yus muaj peev xwm ua tau yus txoj hauj lwm yus tab tom ua tam sim no kom ua tau zoo tshaj qub ntxiv. Tsis hais yuav yog caw yus tus coj los sab laj sib tham seb puas muaj peev xwm nce nyiaj hauj lwm rau yus.
Tsis hais yog cov kev nrhiav dua ib txoj hauj lwm tshiab ua los yog hais kom yus tau nyiaj hauj lwm ntau tuaj ntxiv rau txoj hauj lwm yus tseem tab tom ua tam sim no, muaj qee zaus kuj yog tej yam nyuaj kawg rau yus yuav sib khom tias tsim nyog them nyiaj hauj lwm npaum li cas rau yus thiab.
Tab sis kuj muaj hmoo uas cov kev sib khom nrog yus tus tswv lagluam tam sim no los kuj zoo tib yam li lwm yam kev sib khom thiab, uas yuav siv 3 lub tswv yim tseem ceeb pab kom yus sib khom tau zoo raws siab xav.
Paub tias yus xav tau dab tsi thiab vim li cas yus thiaj xav tau
Thawj yam ces yog ib qho tseem ceeb heev uas yus yuav tsum paub tseeb kiag tias yus xav tau dab tsi thiab vim li cas yus thiaj xav tau.
Yog tias koj xav nrhiav dua ib txoj hauj lwm tshiab ua, ces seb lub neej pem suab koj xav ua dab tsi, tsis yog tej yam dab tsi tsis zoo ntawm txoj hauj lwm uas koj tab tom ua tam sim no. Thiab koj xav kom tej hauj lwm koj xav ua ntawd them nyiaj ntau tshaj txoj koj tab tom ua tam sim no li cas?
Yus yuav tau teeb txheeb seb tej neeg ua tej hauj lwm zoo tib yam li yus ua ntawd ho tau nyiaj li cas thiab kom thiaj muaj peev xwm sib khom tau raws li tej hom phiaj yus xav tau.
Cov kev ua tib zoo npaj thiaj yog tej yam tseem ceeb heev. Yuav tsum npaj kom tau ib lub tswv yim uas paub meej tseeb tias yus xav tau dab tsi thiab vim li cas yus thiaj xav tau. Ua ke no los yog thaum yus xav tau nyiaj hauj lwm ntau ntxiv, ces tsis yog pheej muaj cov kev cia siab ua xyem xyav tias yus yuav tau nyiaj hauj lwm ntau ntxiv xwb.
Thiaj yog tej yam tseem ceeb uas yuav tau npaj kom tau ib lub tswv yim tseeb tias yus xav tau nyiaj hauj lwm npaum li cas ntxiv, thiab yuav tau npaj tias vim li cas yus thiaj xav tau – piv txwv li tsis ntev los no yus tau ua tau hauj lwm zoo tshaj qub ntxiv los yog npaj ib co pov thawj tshiab tias yus ho tau ua ib co hauj lwm tshiab twg ntxiv.
Totaub txog lwm tus txoj kev xav
Txawm tias tej zaum yus tej hom phiaj yog ib co tseem ceeb heev, los kom nco tias cov kev sib khom no yog ob tog cov kev pom zoo ua ke. Tsis yog tej yam uas yus xav tau xwb tab sis lwm tog los kuj xav tau ib yam dab tsi ntawm yus thiab.
Nod thiaj yog lub tswv yim ob pab kom sib khom tau zoo: uas yuav tau nco ntsoov txog lwm tus cov kev xav thiab.
Kom yus xam tias yus yog lwm tus neeg uas yuav npaj sib nkom nrog yus. Yus yuav tau nkag siab tias lawv xav tau dab tsi, thiab vim li cas lawv thiaj xav tau, yuav muaj dab tsi tsub nias lawv, thiab tej zaum ho yuav muaj teeb meem dab tsi rau lawv.
Yeej muaj ntau lub koom haum yeej them nyiaj hauj lwm zoo thiab muaj tej paj tshab zoo, thiaj tsis tsim nyog uas yus pheej xav tias yus tsis yoog raws thiab tsuas ua kom yus tau txiaj ntsim xwb. Thiab xav kom ua raws li qhov tsim nyog ua xwb.
Tsis tas li ntawd los yus yuav tau xub xav ua ntej tias seb lawv yus yuav teb yus tej lus thov li cas thiab. Thiab lawv tsuas kam/pom zoo li cas xwb – thiab yus ho yuav teb li cas/ua li cas? Ces thiaj xav kom yus yuav tau npaj ntau yam tos coj los daws tej xwm txheej no.
Vim cov kev tsuas kub siab txog qhov yus xav nug txog thaum xub nkaus xwb tej zaum kuj yuav ua rau yus tsis muaj peev xwm yuav tswj tau lwm cov kev sib tham thiab.
Yog li ntawd cov kev nkag siab txog lwm tus cov kev xav thiaj yuav pab kom yus muaj peev xwm npaj tau yus tus kheej kom zoo tshaj plaws, uas haum raws li lawv tej hom phiaj lawv xav tau thiab. Tej zaum yus yeej xav tias tej hauj lwm yus rau siab ua ntxiv ntawd tsim nyog yuav pab kom yus tau nyiaj hauj lwm ntau ntxiv, tab sis xav kom kub siab txog tej hauj lwm yus tau ua tiav uas yuav pab kom yus tus tswv lagluam ua tau lawv tej hom phiaj tiav thiab.
Cov kev xav txog lwm tus cov kev xav thiaj yuav pab kom yus tsuas muaj kev vam kev cia siab raws li qhov tsim nyog ua xwb. Kuj yog tej yam tseem ceeb uas yus yuav tau npaj yus tej hom phiaj kom zoo, tab sis yog tias tsis yog tej hom phiaj uas lwm tus xav tau, ces kuj pab tsis tau yus dab tsi thiab yuav ua rau yus tsis tau dab tsi.
Npaj kom tau ib co tswv yim ruaj
Nod yog lub tswv yim sib khom 3: uas yog cov kev paub tias yus yuav ua dab tsi yog tias tsis tau tej yus xav tau.
Cov kev npaj tau ib lub tswv yim zoo los hloov thawj lub tswv yim yuav pab kom yus muaj kev ntseeg siab rau yus cov kev rov qab thov kom nce nyiaj hauj lwm rau yus dua, los yog yus tej lus yus hais txawm tias yog tej yam uas yuav ua rau lwm tog nrog yus sib khom tsis pom zoo. Cov kev npaj lub tswv yim no ua ntej yus yuav sib khom thiaj yog tej yam tseem ceeb.
Tsuas nyob ntawm seb yus ho poob rau tej xwm txheej zoo li cas xwb, yeej muaj ntau yam tswv yim zoo rau yus siv thaum tseem tab tom sib khom nyiaj hli nrog ib txoj hauj lwm tshiab. Yog tias yus ho nrhiav ntau txoj hauj lwm ua, ces tej zaum kuj xyuas seb lwm txoj hauj lwm puas them zoo dua. Txawm li cas los yus kuj yeej tseem muaj cib fim yuav ua txoj hauj lwm yus ua tam sim no ntxiv thiab.
Zoo li kuj tsuas muaj tsawg tsawg txoj xub ke rau cov kev sib khom nrog yus tus tswv lagluam txog tej hauj lwm yus tseem tab tom ua tam sim no xwb thiab uas yuav sib khom tau tiav raws siab xav. Yog tias ho sib khom tsis tiav ces kuj yog tej yam tu siab uas yus yuav tau ua yus txoj hauj lwm qub txuas ntxiv thiab tsuas tau nyiaj hauj lwm li tej yus tau tam sim no xwb.
Tab sis yeej muaj ntau txoj xub ke pab kom yus ua tau hauj lwm txuas ntxiv tshaj qhov tau txais ntxiaj ntsim nyiaj txiaj thiab. Piv txwv li mus kawm kom tau ntawv pov thawj tias paub ua tau txoj hauj lwm ntawd zoo tshaj qub ntxiv, yog yus tus tswv lagluam ho pab ntiav rau yus kawm los yog pab yus, kuj yuav yog tej yam pab kom yus kub siab ua hauj lwm, thiab kuj yuav pab kom yus rov qab muaj cib fim sib khom txuas ntxiv rau yav pem suab thiab.
Txawm li cas los xav kom nco tias tsis hais ib co kev sib khom twg li yeej cuam tshuam nrog ob tog, thiab lwm tog los lawv yeej muaj ntau txoj kev xaiv rau lawv tib yam thiab.
Thiab thaum tseem nyob rau lub caij yus koom job interview, ces yog tias yus ho muaj ib yam txuj ci uas tsuas muaj tsawg tus thiaj paub thiab thiaj muaj xwb thiab lawv ho muaj ib tug neeg ua hauj lwm tseem ceeb twg ho tawm kiag sai sai lawm, ces tej zaum kuj yuav pab kom yus sib khom tau zoo raws siab xav thiab. Txawm li cas los lawv yeej yuav muaj ib tug neeg twg uas yuav muaj peev xwm los ua tau txoj hauj lwm ntawd, thiab tej zaum yus kuj tseem xav tau txoj hauj lwm ntawv ua ntau tshaj qhov lawv xav ntiav yus ua thiab.
Yog tias ho poob rau tej xwm txheej zoo li ntawd, ces xav kom ua tib zoo txheeb txhua yam li tej nyiaj hauj lwm, tej kev ua hauj lwm, tej caij so, los yog lwm yam uas pab kom yus xav ua txoj hauj lwm ntawd. Thiab ua ntej uas yus yuav pom zoo nrog ib yam dab tsi, xav kom nco ntsoov txheeb tias seb ho puas muaj lwm txoj hauj lwm uas tau tej txiaj ntsim zoo tshaj txoj uas lwm tus tab tom xav kom yus ua tam sim no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
