Xeev Victoria cov xwm txheej muaj neeg kis kab mob COVID-19 ntau tuaj ntxiv tau ua rau tej nom tswv lis tej laj fai tswj kev noj qab haus huv tau maj ceev nrooj los teeb tsa ib lub rooj sab laj tham txog tej teeb meem no thiab tau muaj zejtsoom 9 lub tsev nyob ntawm nroog Melbourne kaw yam tsis tau pom muaj dua los li.
Hnub zwj Cag (Saturday) dhau los no xwb twb muaj neeg raug teev txog 108 leej tias yog cov kis tau tus kab mob COVID-19 no lawm, uas yog cov kev sib kis kab mob zaum 2 uas muaj neeg kis tau tus kab mob no rau ib hnub twg txij li tau muaj tus kab mob no sib kis los txog tam sim no, tom qab uas tau muaj neeg xub kis tau tus kab mob no ntau limtiam dhau los txog li 2 npaug ntau tuaj ntxiv rau ib hnub twg dhau los ntawd.
Yog li ntawd nom tswv thiaj tau muaj cov tsev Flat ntau lub no kaw rau lub sij hawm yam tsawg li 5 hnub coj los sim tej neeg nyob ntawm tej tsev no, uas tau ua rau muaj teeb meem rau tej neeg nyob ntawm tej tsev no txog li 3,000 tus thiab muaj 500 tus tub ceev xwm mus tswj kev ruaj ntseg rau tej tsev no, txawm tias nom tswv tau hais kom sawv daws nyob twj ywm hauv tsev los nws yeej tseem tau muab 2 co postocodes (3031: Flemington, Kensington thiab 3051: North Melbournehe) ces thiaj tau ua rau muaj tag nrho 12 cov postcodes lawm (3012, 3021, 3032, 3038, 3042, 3046, 3047, 3055, 3060, 3064).
Dr Annaliese van Diemen uas yog xeev Victoria tus lwm coj lis laj fai tswj kev noj qab haus huv tau qhia tias tau muaj neeg kis tau tus mob no txog li 30 leej rau ntawm tag nrho tej tsev no, vim rau qhov muaj tej neeg no ze txog li 25% yeej nyob sib ti thiab lawv yuav tau siv tej chaw ntau yam ntawm tej tsev no ua ke.
A new program to dispel myths among Melbourne public housing residents about the COVID-19 vaccine Source: AAP
Tsis tas li no los tej neeg tswj kev noj qab haus huv yeej tau mus khob tej neeg qhov rooj thiab mus sim tej neeg sawv daws seb puas kis tus kab mob no.
Txawm li cas los lub chaw nthuav xov xwm ABC News kuj tau tshaj tawm tias nom tswv yuav tsis kom tej neeg nyob ntawm cov tsev Flat no them tej nqe ntiav tsev rau lub sij hawm no thiab. Hos Daniel Andrews uas yog tus hau xeev Victoria los kuj tau qhia rau hauv nws phau Facebook page tias nws yeej tau npaj ib cov ntawv rau tej me nyuam ntawm tej tsev no tau sau tau siv thiab kos ua si, yeej tau nrog tej neeg no xyuas kom lawv yuav tau zaub mov noj thiab khoom siv thiab hais kom tej neeg no yuav tau mus sim seb puas kis tus kab mob no.
Ua ntej tej nom tswv tswj kev noj qab haus huv tseem ceeb yuav muaj lub rooj sab laj rau thaum tsaus ntuj hnub zwj Cag (Saturday) ntawd ces Dr Paul Kelly uas yog tus coj kis rau Australia tus coj tswj kev noj qab haus huv tau hais tias yuav tsum tau los koom tes ua ke nrog xeev Victoria cov kev tswj kev noj qab haus huv kom ntau li ntau tau thiaj yuav pab daws tau tej xwm txheej no.
Txawm li cas los yeej tseem muaj tej neeg ntawm xeev Victoria ntau tshaj 10,000 tus tsis kam mus sim seb puas kis tau tus kab mob COVID-19 no thiab, thiaj ua rau Anthony Albanese uas yog tus coj lwm pawg fai kum xeeb hais tias yog tej yam txaus txhawj xeeb kawg nkaus, tab sis nws kuj tseem tsis paub tseeb tias los yuav siv tej cai lij choj los cas es thiaj li yuam tau kom tej neeg no yuav tsum tau mus sim.
Xeev New South Wales los kuj qhia tias muaj 6 tus neeg tshiab kis tau tus kab mob no rau hnub zwj Cag (Saturday) lawm, ib tug tub kawm muaj hnoob nyoog 18 ntawm Central Cost High School thiab 5 tug neeg ncig txawv teb chaws uas raug cais ntawm tej tsev tos qhua yog cov kis tau tus mob no.
Txij ib tag hmo mus cesSydney tsuas pub 450 tus neeg mus txawv teb chaws rov qab los tau rau nws lub xeev lawm xwb kom tej tsev tos qhua thiaj muaj peev xwm cais tau tej neeg no raws li qhov tsim nyog, vim rau qhov yeej muaj tej neeg tsis xav ya dav hlau los rau xeev Victoria thiab xeev Queensland uas nom tswv hais kom tej neeg los rau nws lub xeev uas yuav tau cais lawv tus kheej yog cov yuav tau them tej nqe ntiav tsev tos qhua nyob lawm xwb.
Western Australia los kuj muaj neeg kis tau tus mob no ib tug tshiab ntxiv rau hnub zwj Cag (Saturday) dhau los, ces thiaj ua rau nws lbu xeev muaj neeg kis tau tus mob no txog 115 leeg lawm.
Download tau lub los siv kom pab Australia tiv thaiv kom txhob muaj neeg kis tau tus kab mob coronavirus no ntxiv.
Tam sim no twb muaj neeg Australian ze txog 6 million tus tau download lub COIDSafe app no los siv lawm tab sis nom tswv Australia yeej xav kom muaj neeg yuav laug txog li ib nrab (10 million) tus download siv mas thiaj siv tau hauj lwm zoo.
Tsim nyog koj paug txog tej xo dab tsi rau lub caij muaj tus kab mob coronavirus no tseem sib kis thoob ntuj :
Australia muaj neeg kis tus kab mob COVID-19 li no:
Ntiaj teb muaj neeg kis tau kab mob COVID-19 npaum li no:
Ntiaj teb daim luaj chib lig (World map) qhia tias teb chaws twg kis thiab tas sim neej los ntawm tus kab mob COVID-19 ntau npaum li cas:
