Xyoo no ces yuav muaj ntau cov kev txwv tej neeg Australians tsis pub ua kev zoo siab rau hnub xyoo tshiab (New Year's Eve) lawm, vim tseem muaj tus kab mob coronavirus no kis kis thoob ntuj ces thiaj tseem siv cov kev txwv thoob plaws teb chaws no.
Kuj tau muab tej koom txoos tua paj hluav taws tso tseg lawm, thiab tseem tau txwv tsis pub tos qhua coob ntawm tej cuab yig tsis tas li ntawd nom tswv tseem taw qhia kom tej neeg tsis txhob sib nwj thiab txhob sib khawm sib puag rau lub caij ua kev zoo siab xaus lub xyoo laus uas yog ib xyoo phem heev rau coob leej ntau tus.
Vim muaj ntau cov kev txwv heev, yog li ntawm no yog ib cov kev taw qhia rau koj tias koj muaj peev xwm ua tau thiab tsis pub ua dab tsi tam sim no.
Xeev New South Wales
Yuav tsis pub tej cuab yig ib puag ncig Sydney Harbour hlawv paj hluav taws sij hawm 9 pm hmo no, tab sis yuav hlawv paj hluav taws me ntsis ntawm Sydney Harbour Bridge rau thaum ib tag hmo me ntsis xwb. Yog li thiaj xav kom tej neeg saib hauv TV xwb zoo dua vim yeej tau muab tej chaw uas tso cai rau zej tsoom mus siv ntawd kaw tag lawm.
Txuas zam rau tej neeg ntawm cov chaw tis tsos ntsuab 'Green Zone', tej neeg uas twb teem rooj zaum ntawm tej khw noj mov los sis yog tej neeg ua hauj lwm xwb thiaj muaj cai mus tau.
Cov chaw tis ua tso daj ‘Yellow Zone’ ces yog cov chaw ib puag ncig uas txuas ntawm cov chaw tsos ntsuab 'Green Zone'.
Yeej tsis txwv tej neeg zejzog los yog cov neeg mus xyuas cov chaws tso daj 'Yellow Zone' dab tsi, tab sis raws li NSW lub tuam chav tswj kev noj qab haus huv qhia tub ceev xwm yuav mus hais kom tej neeg txhob sib sau coob coob rau tej chaw hais no.
Yog tias koj nyob rau tej chaw ntawm Greater Sydney (li Wollongong, Central Coast thiab Blue Mountains) ces tsuas pub koj tos tau 5 tug qhua tuaj xyuas koj xwb ntawm koj tsev xwb, suav me nyuam yaus nrog tib si.
Tsis tas li no los kuj tau muab tej neeg cov kev sib sau ua ke nraum zoov uas yav tag los tso cai rau 50 tus neeg ntawd txo los pub sib sau tau txog li 30 leej lawm xwb.
Tej neeg nyob rau sab qaum teb ntawm lub zos Northern Beaches ces tseem raug txwv nruj heev kom yuav tsum nyog tsev mus txog yam tsawg li hnub tim 9 January 2021, txawm li cas los nom tswv kuj zam rau tej neeg tos qhua txog 5 leeg koom ua kev zoo siab rau hnub xyoo tshiab (New Year's Eve) uas suav me nyuam yaus nrog ntawm lawv tej tsev uas nyob rau tib cheeb tsam no tau thiab.
Cov neeg uas nyob rau sab qab teb ntawm lub zos Northern Beaches los yeej tau txais kev tso cai tos tau 5 tug qhua, suav me nyuam yaus nrog mus xyuas lawv ntawm lawv tsev tau, tab sis tej neeg no yuav tsum yog cov neeg nyob tib thaj chaw no, tab sis tsis tso cai rau tej neeg nyob ntawm Greater Sydney mus xyuas lawv.
Tsuas pub tej bars, khw noj mov thiab lwm cov chaw ntawm 2 thaj chaw li hais no ntawm Northern Beaches npaj kom tau tej khoom noj khoom haus kom tiav muag rau tej neeg yuav nqa kiag mus lawm xwb.
Yog koj nyob sab nraum nrog Sydney lawm, mus txheeb xyuas koj tej nom twv zos seb lawv ho tau npaj dab tsi thiab lawv ho muaj cov kev txwv los yog cov kev taw qhia dab tsi siv.
Xeev Queensland
Brisbane lub koom txoos tua paj hluav taws tseem ceeb los kuj raug muab tso tseg tsis ua lawm thiab nom tswv yeej tau taw qhia kom tej neeg tsis txhob sib nwj, sib puag sib khawm nrog tej neeg txawv uas yus tsis paub.
Dr Jeannette Young uas yog tus coj tswj kev noj qab haus huv tau hais rau thaum ntxov lub limtiam no tias “Peb sawv daws ces yeej xav nwj, xav puag thiab khawm tus neeg peb hlub tshaj plaws rau hnub zyoo tshiab, tab sis kuv xav kom nej tsuas ua tej no nrog nej tej phooj ywg zoo thiab nej tsev neeg xwb."
Txawm li cas los yeej tseem pub tej cuab yig tos tau qhua txog 50 leej uas suav tej neeg ntawm tsev neeg ntawd nrog thiab.
Hos cov kev sib sau nraum zoov ces pub neeg koom tau txog li 100 leej.
Xeev Victoria
Txij sij hawm 5 teev tsaus ntuj hnob no mus ces cov neeg Victorians yuav tsum tau siv ntaub npog qhov ncauj thaum nyob rau ib qho chaw hauv tsev qhov twg yog tias lawv tawm ntawm tsev mus rau lwm qhov chaw.
Tsuas pub cov neeg Victorians tos tau 15 tug qhua tuaj xyuas lawv ntawm tsev xwb uas yog tau txog tsawg txog ib nrab ntawm 30 tus lawm.
Tej neeg Victorians uas nyob ntawm Wollongong los yog Blue Mountains los sis yog nyob ntawm Wollongong uas tau mus ncig rau hnub tim 27 December ntawd ces xav kom txhob mus ncig li tau npaj tseg lawm thiab yuav tsum tau rov qab los kom txog rau xeev Victoria no thaum 11.59 teev tsaus ntuj ib tag hmo hmo no.
Tsis tas li no los tej neeg mus ncig no yuav tau thov ib cov ntaub ntawv tshiab thiaj muaj cai rov qab los tau, thiab yuav tsum tau mus sim rau lub sij hawm 1 hnub thiab yuav tau cais lawv tus kheej ntawm tsev 14 hnub.
Melbourne lub koom txoos hlawv paj hluav taws ua ib xyoos ib zaug uas yuav ua rau ntawm ntug dej Yarra River los yeej raug muab tso tseg lawm thiab nom tswv yeej tau nqua hu kom tej neeg sawv daws tsis txhbo mus rau Melbourne CBD, tsuas tso cai rau tej neeg uas twb xub teem rooj nrog rau ib thaj chaw twg hauv nroog xwb mas thiaj muaj cai mus tau xwb.
Tej bars, khw noj mov thiab lwm cov chaw li nightclubs ces yeej tseem qhib siv tab sis tsuas pub neeg tsawg tsawg mus koom xwb thiab.
Xeev Western Australia
Txij sij hawm 8 teev tsaus ntuj mus ces yuav muaj ntau cov kev tua paj teeb hluav taws tso rau sawv daws saib - koj txheeb tau seb tej chaw no ho nyob qhov twg tau
Lub xeev no yeej tsis txawv tias pub neeg coob npaum li cas sib sau tau ua ke, tsuas yog tias tej neeg ntawd yuav tsum nyob kom nrug ntawm lwm tus li 2 metres xwmmeem xwb.
Xeev South Australia
Tau muab cov kev tua paj hluav taws tso tseg tsis tua ntawm nrog Adelaide lawm, tab sis tseem yuav tua cov paj hluav taws ntawm tej zejzog li Murray Bridge, Whyalla, Victor Harbour thiab Port Lincoln.
Tso cai rau tej neeg txog li 50 leej sib sau tau ua ke ntawm tsev yog tias tej neeg ntawd nyob kom nrug ntawm lwm tus li 2 metres xwmmeem.
Pub neeg txog li 200 leej sib sau tau rau ntawm ib tug neeg ntiag tug twg lub koom txoos yog tias lawv xyuas kom tej neeg no nyob sib raug 2 metres xwm meem thiab.
Xeev Tasmania
Nroog Hobart yuav tus paj hluav taws rau thaum sij hawm 9.30 tsaus ntuj thiab thaum ib tag hmo rau ntawm tus dej Derwent. Tab sis xyoo no yuav teev cov paj hluav taws no kom siab dua tej ib txwm ua dhau los kom lwm thaj chaw nyob deb thiaj li pom.
Tasmania yeej muaj tsab cai los tswj kom tej neeg yuav tsum nyob sib nrug 2 metres xwmmeem, tab sis tsuas pub neeg coob kawg nkaus txog li 250 leej koom tau ib thaj chaw uas tsis kem hauv tsev xwb.
Hos sab nraum zoov ces tso cai rau 1,000 tus neeg koom siv tau ntawm zej tsoom tej chaw nraum zoov tau.
Hobart City fireworks Source: Hobart City Council
Xeev ACT
Yuav tsis tua paj hluav taws rau xyoo no ntawm Australia lub tuam ceeb ua xyoo 2 sib law liag lawm (vim tsaib no muaj hav zoov kub hnyiab ces thiaj tsis tua paj hluav taws).
Tab sis nom tswv hais kom tej neeg zejzog ua kev zoo siab rau ntawm tej chaw noj mov, pub taws tej teeb ua kev zoo siab rau xyoo tshiab rau tej chaw ntau yam.
Xeev ACT yeej tsis txwv tias pub qhua coob npaum li cas mus xyuas ib tse neeg twg.
Tsuas pub neeg sib sau tau nraum zoov coob kawg nkaus txog 500 leej xwb tab sis yuav tsum kom tej neeg nyob kom nrug ntawm lwm tus li 2 metres xwmmeem.
Xeev Northern Territory
Tsis muaj kev txwv tias pub neeg sib sau hauv tsev thiab nraum zoov li cas ntawm lub xeev Northern Territory no dab tsi, tab sis yeej taw qhia kom tej neeg nyob kom nrug ntawm lwm tus yam tsawg li 1.5 metres txhua sij hawm yog tias tej neeg ntawd yog cov neeg uas tsis ib txwm nrog yus nyob ua ke.
Tej neeg ntawm teb chaws Australia yuav tsum nyog kom sib nrug ntawm lwm tus yam tsawg li 1.5 metres. Txheeb tej kev txwv ntawm koj lub xeev seb nom tswv pub tej neeg sib sau ua ke li cas xwb. Yog tias koj muaj cov yam ntxwv mob tau khaub thuas ces nyob twj ywm hauv tsev thiab npaj hu xov tooj nrog koj tus kws kho mob tham seb yuav mus sim li cas, los yog hu xov tooj rau tus zauv xov tooj 1800 020 080 nrog lub koom haum Coronavirus Health Information Hotline tham tau.
Muaj tej xov xwm qhia txog tus kab mob COVID-19 ua 63 hom lus uas koj txheeb tau ntawm
Tsis tas li no xav kom koj mus txheeb xyuas tej kev taw qhia ntawm lub xeev koj nyob ntxiv thiab: , , , , , , , .
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
