Thawj pwm tsav Anthony Albanese qhia txog cov sob kawm fee-free TAFE 2023

Tsoom fwv tej sob kawm fee-free TAFE uas nws tau qhia rau xyoo 2022 ntawd ces twb tau pib kawm xyoo 2023 no lawm.

The initiative includes 180,000 fee-free TAFE courses on offer. Source: AAP

Ntsiab lus tseem ceeb:

• Muaj 180,000 cov sob kawm fee-free TAFE rau tej neeg kawm ntawm Australia xyoo 2023.
• Tsoom fwv teb chaws thiab tej nom tswv xeev koom tes los tsim cov sob kawm no..
• Thiaj muaj cov sob kawm tseem ceeb uas xav kom tej neeg mus kawm tu saib xyuas lwm tus, technology, tos txais qhua, thiab txhim kho uas xub kub siab kom tej neeg tau kawm ua ntej.

Xyoo 2023 no ces thawj pwm tsav Anthony Albanese yeej txhawb nqa kom tej tub kawm mus txheeb seb lawv puas muaj cai tau kawm cov sob kawm fee-free TAFE xyoo no.

Thiab yog ib co hauj lwm uas tsoom fwv teb chaws thiab nom tswv xeev koom tes kom tej neeg tau kawm thiab tau xyaum kom paub ua hauj lwm uas twb tau piv txij lub 1 hlis ntuj xyoo no los lawm.

Ces raws li tau muaj kev pom zoo ntawm tsoom fwv teb chaws thiab nom tswv xeev cov kev pom zoo Skills Agreement ces thiaj muaj tej sob kawm fee-free TAFE thiab vocational training ntau cov sob kawm rau tej neeg tau kawm.

Mloog tau zaj xov xwm no ua lus Hmoob tau ntawm no.

LISTEN TO

Cov sob kawm fee-free TAFE

SBS Hmong

05/10/202308:33

Play

Nod yog tej uas tsim nyog koj paub txog.

Skills Agreement yog dab tsi?

Thaum txog xyoo tshiab ces thawj pwm tsav yeej tau sau ib co lus txhawb nqa tsoom fwv cov sob kawm fee-free TAFE huav nws phau Twitter account.

Nws tau sau tias "Yog koj xav kawm ntawm TAFE kom tau ua txoj hauj lwm koj xav ua ces xyoo 2023 no ces kuv muaj xov zoo qhia rau koj: Peb yuav muaj cov sob kawm fee-free TAFE 180,000 cov rau tej neeg kawm dawb."

Tej sob kawm no ces yog ib co Skills Agreement uas tsoom fwv teb chaws tau pom zoo nrog nom tswv xeev xyoo 2022 tias yuav tshwm nyiaj $1 billion los tsim.

Ces thiaj tsim tau tej sob kawm no 180,000 fee-free TAFE thiab vocational educational places uas pib muaj rau tej neeg tau kawm pib txij lub 1 hlis ntuj xyoo 2023.

Tsoom fwv teb chaws ua tus tshwm nyiaj $493 million thiab tej seem ntawd ces tej nom tswv xeev ua cov pab kom tsim tau tej sob kawm no.

Ntxiv ntawd los tsoom fwv kuj tshwm nyiaj $50 million pab rau TAFE Technology Fund thiab pab $7 million rau vocational education and training data infrastructure reforms.

Ces thiaj yog thawj theem ntawm tsoom fwv tej tswv yim uas xav los tsim kom tau 480,000 cov sob kawm fee-free courses.

Brendan O'Connor uas yog tus nom tswj cov hauj lwm Skills and Training tau qhia tias tau tsim tej tswv yim no coj los pab dws tej xwm txheej uas Australia pheej tsis muaj tej neeg muaj txuj ci paub ua hauj lwm txaus raws li tej kiab khw lagluam xav tau.

Nws tau hais tias "Tej sob kawm uas tau kawm dawb no yog ib cov cib fim pab kom neeg Australia tau mus kawm kom tau ua tej hauj lwm tam sim no uas muaj tej lagluam xav tau neeg ua hauj lwm heev los yog ua hauj lwm rau yav pem suab thiab pab npaj kom tau tej neeg paub ua hauj lwm raws li tej lagluam xav tau."

Ces yeej tau pib muaj tej sob kawm fee-free TAFE no rau tej tub kawm tau pib kawm txij lu tim ib lub ib hlis ntuj xyoo 2023 no lawm, tab sis yuav tsum yog tej muaj cai tau kawm tej sob kawm dawb no.

Leej twg muaj cai kawm cov sob kawm fee-free courses no?

Raws li tau muaj kev pom zoo lawm ces yeej xav kom tej neeg mus kawm cov sob kawm tu tsom kwv lwm tus, technology, digital, tos txais qhua thiab ntoj ncig. Tsis tas li ntawd los tej hauj lwm txhim kho, qoob loo thiab services ntau yam los yeej yog tej uas haiv neeg no xub kub siab ua ntej thiab.

Yog li ntawd ces thiaj muaj ib co neeg twg yog cov yuav tau kawm raws li nom tswv tau pom zoo, thiab tej xeev yog cov muaj tej xov xwm ntxaws tias leej twg yog cov muaj cai tau kawm.

Thiab yeej xav tias Australia tej neeg txum tim, thiab tej neeg hnoob nyoog 17 txog 24 xyoos, los yog tej neeg tsis muaj hauj lwm ua, los yog tej neeg uas tau txais nyiaj pab cuam ntawm tsoom fwv, los yog tej neeg uas yuav tau tu saib xyuas lwm tus uas tsis tau nyiaj dab tsi. Tej neeg puas cev, nrog rau ib co neeg uas thov tau ib co visa twg, los sis yog tej poj niam uas khwv tsis tau nyiaj siv ruaj, los yog tej neeg uas xav kawm tej sob kawm tshiab ces yog cov uas nom tswv xav kom kawm.

Cov kev pab tej tub kawm kom tau kawm qib siab

Xyoo 2023 ces tsoom fwv teb chaws yeej tau npaj tau 20,000 qhov chaw kawm rau tej tub kawm muaj cai mus kawm tsev kawm qib siab.

Thiab yuav muaj tej sob kawm no rau tej tub kawm ntawm tej cuab yig txom nyem, tej tub kawm nyob ntawm tej zos toj siab ntawm Australia, tej tub kawm neeg txum tim, tej neeg Australia puas cev, los yog tej neeg Australia uas yog thawj tug neeg ntawm lawv tsev neeg uas tau mus kawm qib siab.

Koj muaj peev xwm txheeb tau raws li cov links ntawm tej xeev no kom thiaj pab tau koj txheeb tau tej xov xwm ntxaws txog cov sob kawm fee-free TAFE ntau ntawm tej xeev li xeev: Victoria, Queensland, NSW, South Australia, Western Australia, Northern Territory, ACT thiab xeev Tasmania.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.