Ntsiab lus tseem ceeb:
- Tej xwm txheej no tau ua rau Kremlin npau taws heev.
- Mr Putin thiaj tsuas yog Russia tib tug nom uas tau ua nom peb zaug uas muaj ntawv txhom nws xwb.
- Tab sis ntshe xyov puas yuav txhom tau nws coj mus hais plaub thiab.
Pej kum haiv lub tsev hais plaub (International Criminal Court (ICC) tau tsim ib daim ntawv ntes Russia tus President Vladimir Putin rau hnub zwj Hnub dhau los, thiab tau liam nws tias nws ua txhaum cai rau lub caij muaj tsov rog vim nws cia li muab Ukraine tej me nyuam yaus xa tawm ntawm lub teb chaws no mus yam tsis raug cai, uas tej xwm txheej no yog ib co uas ua rau Kremlin npau taws heev.
Mr Putin tsuas yog tib tus thawj tsav meem (president) zum peb uas ICC tau tshwm ntawv txhom, txuas ntxiv ntawm Sudan tus coj uas yog Omar al-Bashir thiab Libya tus coj Muammar Gaddafi.
Nws tej tub rog kuj raug liam tias tau ua txhaum ntau yam rau lub caij uas Russia tau mus tawm tsam Ukraine txwm ib xyoo no, suav ib co xwm txheej uas UN pawg neeg tshuaj ntsuam tej xwm txheej no cov kev piav txog tias Russia tej tub rog tau yuam kom tej me nyuam yaus saib tej neeg lawv hlub tshua raug deev thiab.
Moscow los yeej tau tsis lees paub tej lus iabliam no ua ntuv zus tias nws tej tub rog yeej tsis tau tua pej xeem rau lub caij nws nam niam lub teb chaws no raws li nws cov hauj lwm special military operation no.
Yog li ICC thiaj li tau tawm tsab ntawv txhom no rau nws cov kev xav tias tau muab tej me nyuam yaus thiab tej neeg xa tawm ntawm Ukraine mus rau teb chaws Russia.
Russia yeej tsis zais cov program uas nws tau coj ntau txheeb tus me nyuam neeg Ukraine mus rau Russia, tab sis nws tsuas hais tias yog ib cov kev pab cuam thiab pov puag rau tej me nyuam ntsuag thiab tej me nyuam yaus uas tsis muaj neeg kub siab txog ntawm tej chaw ua rog xwb.
Tsam no ho yuav muaj dab tsi tshwm sim ntxiv?
Txawm tias tej zaum Mr Putin yeej yuav tsis raug coj mus hais hauv tsev hais plaub sai sai no, los daim ntawv txhom no txhais tau tias tej zaum nws kuj yuav raug txhom thiab raug xa mus rau lub nroog Hague yog tias nws mus rau ntawm tej teb chaws ua tub koom siab nrog lub koom haum ICC no.
Stephen Rapp uas yog America tus Ambassador uas tswj cov hauj lwm War Crimes Issues rau president Barack Obama dhau los hais tias "Tej no ua rau Putin yog ib tug neeg uas tsis yoog raws teb raws chaw. Thiab yog nws tawm ncig mus rau ib qho qhov twg ces tej zaum nws kuj yuav raug txhom thiab. Thiab tej no yeej yuav tsis lam tsuag mus li. Thiab Russias yuav tsis tau txais kev zam cov kev rau txim yog tias nws tsis ua raws li daim ntawv txhom no."
Vyacheslav Volodin uas yog ib tug phooj ywg sib raug zoo nrog tus president no tau sau ib sob lus hauv Telegram tias hais tias "America, tsis txhob cuam tshuam nrog Putin!" thiab hais tias tej xwm txheej no yog ib cov pov thawj qhia tau tias cov teb chaws vam meej ''cov kev puab quav ciab''.
Nws tau hais tias "Peb xav tias tsis hais ib cov kev tawm tsam dab tsi rau tus President ntawm teb chaws Russia no ces peb xam tias yog ib cov kev hawv tawm tsam nrog peb lub teb chaws."
Zelenskyy lees paub txog ICC tej xwm txheej no, thiab liam Putin txog cov kev muab nws tej me nyuam yaus xa tawm txawv teb chaws
Ukraine tus President Volodymyr Zelenskyy tau hais tias ICC cov kev txiav txim siab no yog ib co tseem ceeb heev, thiab tau liam Mr Putin tias tau muab ntau txheeb tus me nyuam neeg Ukraine xa tawm txawv teb chaws.
Nws tau hais ib co lus hauv ib daim video uas hais txhua hmo tias "Yog ib co kev txiav txim siab tseem ceeb uas yuav pab kom nrhiav tau tej neeg ua txhaum los rau txim."
Raws li nws hais ces tej zaum kuj yuav muaj tej me nyuam yaus ntau tshaj li 16,000 txheeb tus los kuj tau, thiab tau hais tias ''yeej yog tej tom txwv ntawm tej nom theem siab ntawm lub teb chaws no'' siv coj los muab tej me nyuam yaus no xa tawm txawv teb chaws.
Nws kuj tau hais ntxiv tias "Yeej tsis muaj peev xwm yuav ua tau tej kev txhaum cai no yam tias tsis muaj tus muaj fwj chim ntawm lub teb chaws phem ntawd hais kom ua."
Tej neeg ntawm Russia lub tuam ceeb los yeej tsis xav ntseeg txog tej xov xwm no li thiab.
Tus txiv neej uas hu nws tus kheej tias Daniil thiab muaj hnoob nyoog 20 xyoo no hais tias "Yeej tsis muaj leej twg yuav txhom Putin li o!". Maxim hais tias ''Peb tej pej xeem ntawm teb chaws Russia yuav pov puag nws."
Muaj ib tug poj niam hu nws tus kheej tias yog Ksenya tau hais tias yuav yog ib yam ''tu siab heev'' yog tias Mr Putin tseem raug txhom thiab, tab sis nws tsis xav tias yuav tshwm sim tau li.
Maria Zakharova uas yog tus kis ntawm Russia lub tuam chav lis laj fai txawv teb chaws tau hais tias Russia yeej tsis tau kos xyeem mem tes pom zoo nrog tsab cai Rome Statute of the International Criminal Court.
Dmitry Peskov uas yog tus kis ntawm Kremlin tau hais tias Russia pom tias ICC tej lus nug no ''yog ib co lus puab quav ciab thiab yuav tsis nyog", thiab tsis hais lub tsev hais plaub no yuav muaj kev txiav txim siab zoo li cas rau Russia li, ''yeej yuav yog ib cov kev txiav txim siab uas siv tsis tau."
Ua ke no los lub tsev hais plaub no kum tau tshwm ib daig ntawv txhom Maria Lvova-Belova, uas yog Russia tus coj uas pov puag tej me nyuam yaus txoj cai tias ua txhaum tib nkaus li no thiab.
ICC prosecutor Karim Khan uas yog ICC tus kws txiav txim plaub ntug thiaj tau pib muaj cov kev tshuaj ntsuam txog cov xwm txheej ua txhaum rau lub caij muaj tsov rog, thiab ua txhaum leej tib neeg txoj cai thiab ua txhaum vim tua neeg npog nroj ntsuab ntawm Ukraine ib xyoos dhau los lawm.
Nws thiaj tau teev txog cov kev iab liam uas ua txhaum rau tej me nyuam yaus no thiab cov kev txhob txwm tua pej xeem tej haus paus txhim kho rau lub caij uas nws tau mus xyuas teb chaws Ukraine.
