Xyoo no koj yuav tau them nqe tsev kim npaum li cas ntxiv

Reserve Bank of Australia (RBA) kuj tsis nce kab theem paj thiab tseem nyob li qub ntawm 4.35% rau hnub zwj Quag (Tuesday 08.05.2024).

Interest rates have increased by 3 percentage points since May last year. Source: AAP / Diego Fedele

Ntsiab lus tseem ceeb:

• RBA kuj tseem cia tus kab theem paj nyob li qub ntawm 4.35% rau lub 5 hlis ntuj 2024 no.
• Thiab zoo li tej kab theem nyiaj poob nqe los kuj nqe thoob ntiaj teb lawm thiab.

Australia lub txhab nyiaj faj seeb haiv kuj tseem cia tus kab theem paj nyob li qub ntawm 4.35% rau hnub tim 08.05.2024.

Lub tuam txhab AMP Capital tus chief economist Shane Oliver tau qhia tias tej zaum tej kab theem nyiaj poob nqe tseem zoo li no ntxiv ces tej zaum kuj yuav ua rau Reserve Bank of Australia (RBA) rov qab nce kab theem paj li ntawm 0.25 feem pua rau nws cov kev sab laj sib tham ntxiv tom ntej no los kuj tau thiab.

Nws tau hais tias yog zoo li no tiag ces tej zaum yuav ua rau tej neeg qeev nyiaj yuav tsev theem nrab txog li $500,000 yuav tau them kim tuaj ntxiv txog li ntawm $80 ib hlis twg, los sis yog tau them txog li ntawm $900 ntau tuaj ntxiv ib lub xyoos twg.

Txij lub 5 hlis ntuj tsaib no los thaum RBA tau xub nce nws tej kab theem paj thawj zaug uas tseem qes heev ntawm 0.1 feem pua ntawd ces tam sim no twb ua rau kab theem paj tau nce tshaj 3 feem pua, thiab Mr Oliver tau hais tias cov kev nce kab theem paj no thiaj ua rau tej neeg yuav tau them nqe tsev kim tuaj ntxiv ib xyoos twg txog li ntawm $12,000.

Ces yog tias ib tug twg qev nyiaj yuav ib lub tsev raug nqe txog $500,000, thiab ntawm Sydney ces tej zaum yuav tau qev ntau tshaj ntawm Sydney. Ib txhia neeg ces yuav tau them tej nyiaj qev los yuav tsev ntau tshaj li $20,000 ib xyoos twg ntau tshaj tej lawv them ib xyoos dhau los thiab.

AMP Capital tus chief economist Shane Oliver tau qhia rau SBS News.

Source: RateCity Source: SBS

Tab sis Mr Oliver tau qhia tias yeej tau muaj ntau yam cim qhia rau lub 2 hlis ntuj tias tej zaum kuj yuav yog cov kev nce kab theem paj zaum kawg ntawm xyoo no, thiab tej zaum tus kab theem paj no kuj yuav peb nqes lawm thiab los kuj tau.

Nws tau hasi tias yeej muaj pov thawj tim khawv qhia tseeb tias inflationary pressures yuav ntaug me ntsis, uas tej zaum yuav tsis tshua ua rau RBA nces kab theem paj ntxiv.

Nws kuj tau hais tias tej kab theem nyiaj poob nqe ntawm Meskas (United States-US) yeej tau nce siab heev txog 9.1 feem pua rau nrab xyoo tsaib no thiab tam sim no ces kuj tau nqe los nyob ntawm 6 feem pua lawm.

Nws tau hais tias "Kuv xav tias peb tab tom yuav poob rau tej xwm txheej zoo li tau muaj rau Meskas thaum nrab xyoo tsaib no - thiab tam sim no los zoo li tej kab theem nyiaj poob nqe yeej tau nce siab kawg lawm thiab tab tom yuav pom tus kab theem nyiaj poob nqe nqes rau xyoo no.''

Mr Oliver tau hais tias tej nqe khoom thoob ntiaj teb no los kuj tau pheej yig zog lawm vim rov qab muaj peev xwm xa tau tej khoom muag piv rau tsaib no thaum tej nqe koom tseem tab tom tau nce kim tuaj ntixv.

Nws hais tias tej nqe ntiav nkoj thauj koom thoob ntiaj teb no los kuj tau rov qab poob los nyob li tej ua ntej yuav muaj kab mob COVID-19 kis thoob ntuj no lawm, thiab tej nqe roj los kuj tau nqes pheej yig lawm thiab.

Ces nws thiaj tau hais ntxiv tias "Thiaj tau ua rau muaj ntau yam ua rau tej nqe ntau yam thoob ntiaj teb pib pheej yig lawm.''

Dab tsi ua rau nyiaj poob nqe?

Mr Oliver kuj qhia tias muaj ntau yam li tej nqe ntoj ncig kim thiab tej nqe ntiav chaw nyob kim yog cov ua rau nyiaj poob nqe ntawm Australia no rau lub caij 3 hlis thaum yuav xaus lub xyoo tsaib no, thiab tej zaum kuj yuav tsis rov qab muaj tej xwm txheej no ntxiv lawm.

Tsis tas li ntawd los lub caij so xyoo tshiab los kuj tau ua rau tej nyiaj poob nqe ntau tshaj qhov tau kwv yees tseg rau lub caij 3 hlis xaus rau lub 12 hlis ntuj tsaib no thiab, thaum uas tej nqe ntoj ncig hauv teb chaws thiab tej nqe ntiav chaw so tau kim tuaj txog li 13.3 feem pua, thiab muaj pej kum haiv ntoj ncig thiab ntiav chaw so txog li 7.6 feem pua ntawd.

Yog tej yam qhia txog cov kev rov qab pib muaj cov kev ntoj ncig rau lub caij uas tej lagluam ntoj ncig tseem tsis tshua muaj peev xwm ua tau cov lagluam no zoo pes tsawg. Txawm li cas los lawv yeej yuav rov qab muaj peev xwm los ua tau cov lagluam no thiab neeg Australia los yeej yuav tsis tshua xav them tej nqe kim, ces kuv thiaj xav tias tej zaum peb kuj yuav tsis tau them tej nqe ntoj ncig kim li peb tau muaj dhau los.

AMP Capital tus chief economist Shane Oliver tau qhia rau SBS News.

Txawm tias tej nqe ntoj ncig tseem kim, los tej zaum lawv yeej yuav tsis ua rau nyiaj poob nqe ntxiv thiab tsuas yog tias ntshe tej nqe ntoj ncig ho kim txuas ntxiv xwb.

Lub caij so xyoo tshiab tau ua rau muaj neeg xav ntoj ncig ces thiaj ua rau tej nqe kim tuaj ntxiv. Source: Getty / Mark Evans

Mr Oliver tau hais tias yog tias kab theem paj kuj yuav nqes rau xyoo no (2024) thiab.

Nws kuj tau hais tias thaum tej neeg pib pom tej nqe yuav khoom ntawm tej supermarkets nyob tus los yog tej khw muag khoom tau muag tsawg zog lawm, ces kuj yuav yog ib lub cim qhia tias tej zaum cov kab theem nyiaj poob nqe no tau nce siab kawg nkaus lawm thiab tej zaum kuj yuav txo kab theem paj rau yav tom ntej.

Tab sis tej zaum kuj yuav tsis yog li hais ntawd thiab yog tias tej neeg ho khwv tau nyiaj hauj lwm ntau heev tuaj ntxiv, uas tej zaum kuj haj yam yuav ua rau kab theem nyiaj poob nqe nau tuaj ntxiv thiab.

Cia siab tias tej zaum cov kev nce kab theem paj lub 2 hlis ntuj (2024) yuav yog cov kev nce kab theem paj ua zaum kawg ntawm lub xyoo no. Source: AAP

Puas yog tej kab theem paj yuav rov qab nyob qes li qub ntxiv?

Txawm tias cov kev txo kab theem paj yog ib co xo zoo rau tej neeg yuav tsev, los Mr Oliver tau hais tias tej zaum ntshe tej kab theem paj yuav tsis nqes mus nyob li qub rau lub caij tseem muaj kab mob COVID-19 kis thoob ntuj ntxiv lawm.

Nws tau hais tias "Tej zaum kuj yuav txo li ntawm 50 basis points los yog 0.5 feem pua li ntawd, tab sis kuv kuj tsis paub tias xyos tej kab theem paj puas yuav nqes qes li qub uas peb tau pom li ib xyoos dhau los ntxiv lawm.''

Lub koom haum Australian Bureau of Statistics (ABS) tau qhia rau hnub zwj Feej (Wednesday) tias lub sij hawm 3 hlis xaus rau lub 12 hlis ntuj tsaib no ces tej kab theem nyiaj poob nqe yeej tau nce siab txog 7.8 feem pua ntawm ib xyoos rau ib xyoos - thiab yog cov kab theem uas tau nce siab tshaj plaws txij li xyoo 1990 los no.

Treasurer Jim Chalmers tau hais rau hnub zwj Feej tias tej kab theem nyiaj poob nqe tseem siab heev, tab sis tej zaum yeej ze rau qhov tseem yuav nce siab tuaj ntxiv los yog twb nce siab kawg nkaus lawm.

Nws thiaj tau qhia rau tej neeg nthuav xov xwm ntawm tuaj ceeb Canberra tias "Tej kab theem nyiaj poob nqe no tau ua rau muaj teeb meem nyuaj rau peb tej lagluam xyoo 2022 thiab xyoo 2023 thiab.''

Mr Chalmers los kuj tsis ceeb dab tsi uas tej nqe hluav taws xob tau nce kim tuaj ntxiv txog 8.6 feem pua rau lub caij 3 lub hlis, thiab tau hais tias tsoom fwv cov hauj lwm los tswj tej nqe khoom thiab lwm cov tsw yim yuav pab kom tej nqe hluav taws xob tsis txhob kim ntxiv.

- AAP tau koom tshaj zaj xov xwm no.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.