Tej huab cua kub sov no tau ua rau tej neeg tas sim neej coob tuaj ntxiv lawm

Lub caij uas muaj tej huab cua kub sov tuaj ntxiv, muaj hav zoov kub hnyiab ntau tuaj ntxiv thiab muaj nag xob nag cua muaj ceem ntxiv no tau muaj kev txhawj xeeb tias tsam tej huab cua kub sov thiab lub caij ntuj so uas qhuav nkig no yuav ua rau muaj tej neeg raug coj mus kho mob thiab ua rau tej neeg tas sim neej.

The number of hospital admissions from extreme weather, including heatwaves, bushfires and storms, has increased over the past decade. Source: AAP / Steve Markham

Ntsiab lus tseem ceeb:

• Lub sij hawm 10 xyoo los no tej huab cua kub sov twb tau ua rau tej neeg raug coj mus kho mob thiab tas sim neej coob tuaj ntxiv thiab twb muaj neeg tshaj 9,000 tus raug coj mus kho ntawm tsev kho mob lawm.
• Thiab lub caij 10 dhau los no tej xwm txheej huab cua kub sov ua rau tej neeg raug coj mus kho ntawm tej tsev kho mob los kuj muaj ntau tuaj ntxiv lawm thiab.
• Thiaj txhawj tias muaj cov xwm txheej El Niño uas yuav ua rau qhuav nkig thiab hav zoov kub hnyiab no yuav ua rau muaj tej neeg tas sim neej coob tuaj ntxiv thiab yuav ua rau tej huab cua kub sov ntev ntxiv.

Tej xwm txheej huab cua phem tau ua rau muaj neeg coob tuaj ntxiv raug coj mus kho ntawm tsev kho mob thiab tas sim neej coob tuaj ntxiv, thiab tej xwm txheej huab cua kub sov heev no yog cov uas ua rau tej neeg raug mob thiab tas sim neej ntau tshaj plaws.

Raws li ib tsab ntawv cej luam tshiab ntawm lub koom haum Australian Institute of Health and Welfare qhia ces tej xwm txheej huab cua phem li huab cua kub sov heev, hav zoov kub hnyiab thiab muaj nag xob nag cua no thiaj tau ua rau muaj tej neeg coob tuaj ntxiv raug coj mus kho ntawm tej tsev kho mob ntau tuaj ntxiv rau lub caij kaum xyoo dhau los no lawm.

Twb tau muaj tej neeg tshaj 9,000 tus raug coj mus kho mob rau lub sij hawm 10 xyoo dhau los txij xyoo 2012 txog xyoo 2022, thiab tau ua rau muaj 677 tus neeg tas sim neej txij xyoo 2011 txog xyoo 2021 - thiab tej xwm txheej huab cua kub sov heev yog cov tsim tej teeb meem no.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.

Raws li Heather Swanston uas yog tus coj uas tswj cov hauj lwm raug mob thiab cov system surveillance tau hais ces txhua txhua 3 xyoos twg ces yeej muaj tej xwm txheej huab cua kub sov heev ua rau muaj tej neeg tshaj 1,000 tus raug coj mus kho ntawm tsev kho mob, li peb yeej tau pom rau cov xyoo 2013/14, 2026/17, thiab 2019/20.

"Peb yeej tau pom lawm tias tej xwm txheej huab cua phem muaj kev cuam tshuam ua rau tej neeg raug coj mus kho ntawm tsev kho mob ... thiab yeej tau muaj tej neeg coob tshaj 3,000 tus txhua txhua peb xyoos twg, thiab zoo li yeej muaj ntau zujzus tuaj lawm,'' raws li nws tau qhia rau lub chaw nthuav xov xwm AAP.

Thiab yeej muaj cov xwm txheej huab cua El Niño xyoo no uas ua rau tej huab cua kub sov thiab qhuav heev, ces thiaj txhawj tias tsam yuav rov qab ua rau muaj neeg tas sim neej coob tuaj ntxiv vim yeej muaj cov hnub kub heev ntau tuaj ntxiv lawm thiab.

Swanton tau hais tias "Yeej muaj tej neeg raug mob los ntawm cov hav zoov kub hnyiab txog li 1.6 npaug rau cov xyoo uas muaj tej xwm txheej

El Niño years, thiab lub chaw ntsuam thiab kwv yees huab cua (Bureau of Meteorology -BoM) yeej tau qhia tias tab tom muaj cov xwm txheej El Niño."

Raws li tsab ntawv cej luam no qhia ces tej huab cua kub sov heev yeej muaj feem ua rau tej neeg nyob tsis tswm, npau taws thiab meem txom heev, ua rau lawv sab sab, thiab ua rau yus ua tsis tau hauj lwm zoo ces thiaj ua rau yuav raug mob ntau tuaj ntxiv yog tias tej neeg ntawd yog cov uas tsav tsheb, thiab siv tej twj siv hluav taws xob.

Tej neeg hnoob nyoog 65 xyoos los yog tej neeg muaj hnoob nyoog siab tshaj ntawd thiab tej neeg hnoob nyoob txij li 25 xyoos txog 44 xyoos yog cov neeg uas pheej raug mob tas mus li cuam tshuam txog tej huab cua kub sov no, thiab tej txiv neej ces yog cov raug coj mus kho mob ntau tshaj tej poj niam txog li ob npaug rau ob yam xwm txheej li hais no.

Lub sij hawm 10 xyoo dhau los no ces tej xwm txheej huab cua phem tau ua rau muaj tej neeg coob tuaj ntxiv raug coj mus kho ntawm tsev kho mob lawm. Source: AAP / Dan Himbrechts

Tej huab cua kub sov yog cov tseem ceeb uas pheej ua rau tej neeg ntawm txhua lub xeev suav tej territories (ACT, NT..,) nrog tsuas tsis suav xeev Tasmania xwb.

Tsis tas li ntawd los Australia yeej poob qab rau cov kev sib tw tsim ntiaj teb tej nroog kom tsis txhob kub sov thiab txawm tias nws muaj tej technology thiab tej txuj ci uas tej kws ntseeg tias yuav muaj peev xwm pab tau zejzog, pab kev noj qab haus huv thiab daws tau lwm yam teeb meem, los yog tias nws tsis kub siab los pib siv tej tswv yim los pab kom tej nroog txias ces ntshe yeej tseem yuav raug teeb meem.

Hos yog tham txog qhov txawv ntawd, ces tej xwm txheej huab cua txias heev kuj maj mam ua rau tej neeg tas sim neej coob ntxiv ntawm 8 tus neeg xyoo 2015/16 ua 29 tus xyoo 2018/19 thiab muaj 37 tus neeg tas sim neej rau xyoo 2020/21 no lawm thiab.

Thiab tsab ntawv cej luam no kuj tau qhia tias tej laus neeg uas nyob ntawm tej nroog loj feem ntau yog cov yuav raug teeb meem ntawm tej huab cua txias heev no.

Swanston tau qhia tias yeej muaj ib txhia pej xeem li tej me nyuam yaus, tej neeg puas cev, tej neeg ua hauj lwm nraum zoov, tej neeg txom nyem yog cov neeg yuav raug tej teeb meem no ntau dua lwm cov neeg.

Nws tau hais tias "Tej zaum tej neeg no kuj yuav tsis muaj peev xwm lug los ua ib yam dab tsi kom tej huab cua phem tsis txhob ua rau muaj teeb meem rau lawv txoj kev noj qab nyob zoo.''

Tsis tas li ntawd los cov kev los nag, thiab nag xob nag cua kuj tau ua rau muaj neeg yuav laug txog li 350 leej raug coj mus kho ntawm tej tsev kho mob thiab muaj 77 tus neeg tas sim neej rau lub caij 10 dhau los thiab.

Ces lub caij muaj dej nyab rau sab hnub tuaj ntawm Australia xyoo 2021/22 thiaj ua rau muaj neeg coob tshaj plaws raug coj mus kho ntawm tsev kho mob.