Cov ntsiab lus tseem ceeb:
- Muaj cov kev pab cuam txhais ntaub ntawv thiab txhais lus (Translating and Interpreting Services) pub dawb hauv tej xov tooj ua cov lus tshaj 160 hom rau tej neeg.
- Thaum koj thov ib tug neeg txhais ntaub ntawv los yog txhais lus lawm ces koj yeej xaiv tau tus neeg txhais lus uas yog poj niam los yog txiv neej pab koj raws li qhov koj xav tau thiab.
- Tej ntaub ntawv cuam tshuam txog cov kev tsiv teb tsaws chaw yuav tsum tau coj mus rau tej neeg muaj cai txhais ntawv ntawm lub koom haum NAATI.
Muaj qee zaus ces cov kev siv lus Askiv yeej tsis muaj peev xwm yuav pab tau yus raws li qhov tsim nyog thiab.
Cov kev sib tham nrog tej neeg kho mob, kws lij choj thiab nom tswv tej neeg ua hauj lwm kuj yog tej yam nyuaj thiab ua rau tej neeg tsiv teb tsaws chaw muaj hnoob nyoog lawm kuj nyuaj siab heev.
Lub tuam chav Department of Home Affairs thiaj li tau npaj cov kev txhais lus pub dawb rau tej neeg tsis paub lus Askiv (English) zoo.
Ntxiv ntawd los tej neeg muaj cai tau txais cov kev pab cuam txhais ntaub ntawv pub dawb kuj muaj peev xwm thov cov kev pab cuam no pab kom lawv txhob tau siv nyiaj ntau yam rau lawv txoj kev tuaj ua lub neej nyob ntawm teb chaws Australia thiab.
Credit: Getty/Justin Pumfrey
Cov kev pab cuam txhais lus (Interpreting Services)
Lub koom haum Translating and Interpreting Service (TIS National) yeej muaj cov kev txhais lus pub dawb rau tej neeg uas tsis tshua paub lus Askiv zoo uas yuav tau nrog ib cov neeg ntiag tug twg los yog nrog nom tswv tej chaw ua hauj lwm tham.
Yeej muaj tej koom haum tshaj 22,000 lub tau teev zwm nrog lub koom haum TIS no tsis hais yuav yog tej nom tswv zos, nom tswv xeev, tsoom fwv teb chaws, tej chaw kho mob thiab kws kho mob, kws muag tshuaj, thiab tej tuam txhab muag dej, hluav taws xob, gas thiab xov tooj, los yog cov koom haum pab cawm tej xwm ceev, mus txog rau cov koom haum pab cuam cai lij choj, cov kev ua pib neej tshiab thiab tej koom haum pab cuam rau zejzog.
Rockiya Pirova yog tus coj lub koom haum TIS. Nws hais tias nws cov kev pab cuam no yeej tau ntiav cov neeg txhais lus tshaj 3,000 tus los txhais cov lus hom pab rau tej neeg nyob thoob teb chaws Australia no.
Lub koom haum TIS National yeej ua hauj lwm 24 teev rau ib hnub twg thiab ua hauj lwm txhua txhua hnub ntawm ib lub xyoo twg.
Tej neeg no yeej muaj cov kev txhais lus hauv xov tooj, teem caij kom lawv txhais lus hauv xov tooj los yog mus txhais kiag lus ntawm ib thaj chaw pab rau ib tug neeg twg kiag thiab.
Yog xav tau neeg txhais lus hauv xov tooj pab koj ces hu rau lub koom haum TIS National tus xov tooj 131 450.
Taum uas koj sib cuag tau nrog tus neeg txhais lus koj xav tau los pab koj lawm, ces koj yuav tsum qhia lub koom haum uas koj yuav mus ntsib tias yog lub koom haum twg, thiab qhia lawv tus xov tooj uas koj yuav hu rau lawv paub ua ntej nej yuav sib tham los yog koj yuav mus ntsib lub koom haum ntawd.
Tej koom haum uas tau teev zwm nrog lub koom haum TIS National yeej kam them tej nqe txhais lus no lawm ces koj tsis tau them dab tsi. Txawm li cas los yog tias tej koom haum ntawd tsis kam them cov nqe txhais lus ces tej zaum koj yuav tau qhib ib phau account nrog lub koom haum TIS National thiab koj tus kheej yuav tau them tej nqe txhais lus ntawd.
Cov kev teem kom ib tug neeg twg pab txhais lus hauv xov tooj rau koj ces ua tau yooj yim heev thaum koj xav tau ib tug neeg paub ib yam dab tsi pab koj los yog xav ua tib zoo xyuas kom tus neeg txhais lus nkag siab txog tej xwm txheej sib chab sib chaws thiab tsis zoo tham qhia rau lwm tus paub ntawd kom tham tau npliag thiab haum raws li qhov tsim nyog.
Yog tej yam xwm txheej uas tsis tshua zoo tham qhia lwm tus los yog koj xav tau tus neeg txhais lus kom yog kiag txiv neej los sis poj niam txhais lus pab koj los peb yeej nrhiav tau tej neeg ntawd pab koj thiab.
Tsis tas li no los koj yeej muaj peev xwm npaj thov cov kev txhais lus hauv xov tooj pab rau koj ua ntej yog tias koj mus sau ntawm lub koom haum TIS National lub vas sab (website).
Yog li ntawd koj thiaj yuav tsum tau xub sau daim ntawv thov neeg txhais lus rau koj yam tsawg li ib hnub ua ntej ua ntej koj yuav xav kom lawv pab koj txhais lus pub rau koj los sis yog koj yeej muaj peev xwm teem 3 lub hlis ua ntej los yeej tau tib yam thiab.
Yog thaum uas cov kev txhais lus hauv xov tooj tsis haum rau koj lawm, los lub koom haum TIS National yeej muaj peev xwm kom ib tug neeg mus txhais lus kiag ntawm qhov chaw uas koj xav tau neeg txhais lus pab rau koj tau tib yam nkaus thiab. Tab sis yuav tau them nyiaj thiab lawv mam li xam raws tus nqe txhais lus seb yuav them npaum li cas.
Cov kev txhais lus pab rau ib tug neeg ntawm ib qho chaw ces feem ntau yeej yog cov koom haum uas koj yuav tsum tau mus ntsib ib tug neeg twg tim ntsej tim muag uas tej zaum cov neeg koj yuav ntsib ntawd tsis paub lus Askiv zoo. Ces thiaj muaj cov neeg mus txhais lus rau txhua qhov chaw ntawm teb chaws Australia no rau tej neeg tab sis kuj nyob ntawm seb ho puas muaj cov neeg txhais lus khoom los pab koj thiab.
Credit: Getty/Casarsa
Cov kev txhais ntaub ntawv (Translating Services)
Lub tuam chav Department of Home Affairs yeej muaj cov kev pab txhais ntaub ntawv txog li 10 daim pub dawb pab rau tej neeg uas tseem tab tom tuaj pib lub neej tshiab ntawm teb chaws Australia no.
Feem ntau mas tej neeg no yog cov neeg tuaj nyob ruaj los yog tuaj nyob ib ntus ntawm teb chaws Australia uas yeej thov tau visa rau 2 xyoos dhau los lawm ces yog cov neeg uas muaj cai thov siv tau cov kev txhais ntaub ntawv pub dawb (Free Translating Services) no siv tau.
Tab sis Australia tej pej xeem thiab cov neeg uas tau ib hom visa dab tsi siv (bridging visas) kom nyob tau, los yog cov neeg ncig tej chaw tej visa (toursit visas) thiab cov visas tuaj ncig teb chaws tab sis muaj cai ua tau hauj lwm (workig holiday visas) tsis muaj cai thov tau cov kev pab cuam no siv.
Tej ntaub ntawv uas koj muaj peev xwm coj mus txhais ua lus Askiv ces yog cov ntawv qhia txog koj lub ciam thawj (identity), kho mob, ua lagluam, kawm ntawv, sib yuav, sib nrauj, tab sim neej, thiab lwm yam.
Credit: Getty/uniquely india
Txawm tias koj tsis muaj cai thov tau cov kev pab txhais 10 yam ntaub ntawv pub dawb no siv, los yeej muaj ib cov kev txhais ntaub ntawv uas koj yuav tau ntiav nyiaj kom lawv txhais rau koj thiab.
Thaum koj xaiv ib tug neeg txhais ntawv, ces yuav tsum tau ua tib zoo xyuas kom nws yog ib tug neeg uas yeej raug lub koom haum txhais lus thiab txhais ntaub ntawv (National Accreditation Authority for Translators and Interpreters-NAAT) lees paub.
Tsoom fwv tej koom tuam chav, Australia tej tsev kawm qib siab thiab tej tswv lagluam yeej xav kom koj muab koj tej ntaub ntawv ua koj hom lus coj mus rau lub koom haum NAATI txhais ua lus Askiv thiab ntau lub cim rau coj mus rau lawv siv.
Mark Painting uas yog tus tuam tswv tswj lub koom haum NAATI hais tias yeej muaj ib cov twj pab kom koj muaj peev xwm mus txheeb tau hauv online tias seb tus neeg yuav txhais ntaub ntawv rau koj ntawd puas yog ib tug neeg yeej txawj ua tej hauj lwm ntawv tiag.
Yog tias ib tug neeg twg hasi tias nws muaj ntaub ntawv raug cai txhais tau ntau ntawv rau lwm tus ces tej neeg uas siv nws cov kev pab cuam yeej muaj peev xwm mus txheeb tau hauv peb lub vas sab (website) seb puas yog li nws hais ntawd tau thiab.
Yog koj xav thov kom muaj neeg txhais lus pub dawb rau koj ces hu rau lub koom haum TIS National tus xov tooj 131 450 tau.
Los sis yog tias koj ho xav tau lwm yam kev pab cuam ntawm lub koom haum TIS National no ces mus txheeb tau ntxiv ntawm lawv lub vas sab .
Thiab yog tias koj ho xav tau cov kev pab cuam txhais ntau ntawv pub dawb (Free Translating Services) ces koj yeej muaj peev xwm mus txheeb tau ntxiv ntawm lub vas sab tib yam.
Hos yog koj xav paub tias tus neeg txhais lus thiab txhais ntawv rau koj ntawv puas yog cov neeg raug lub koom haum NAATI lees paub, los koj yeej muaj peev xwm mus txheeb tau ntawm lub koom haum no lub vas sab tau tib yam nkaus.
