Yeej tseem muaj dej nyab loj txuas ntxiv rau qee thaj chaw ntawm ib co zos ntawm NSW thiab Victoria txuas ntxiv ces thiaj ua rau muaj teeb meem rau tej hauv paus txhim kho (Choj, kev tsheb etc).
Thiab kuj tau kwv yees tias ntshe yuav siv nyiaj ntau billion dollars thiab siv sij hawm ntau hli mam rov qab kho tau coj los siv.
Nom tswv kwv yees tias muaj tej kev ntev ntxov li ntawm 10,000 kilometres ntawm NSW tau raug kev puas tsuaj lawm, tab sis kuj tseem txhawj tias ntshe tseem yuav muaj tej kev puas ntau tshaj qhov tau kwv yees tseg no lawm thiab.
Ces lub koom haum Australian Rail Track Corporation thiaj tseem mus teeb txheeb txog tej zos txuas ntxiv kom thiaj paub tias tej hauv paus txhim kho ho raug kev puas tsuaj li cas.
Tau muaj tus kis ntawm lub koom haum no hais tias “ARTC cov kev mus txheeb xyuas tej kev tsheb ciav hlau thiab kho ntawd tsuas muaj peev xwm ua tau tej hauj lwm no tom qab uas dej nqeg, thiab tsuas nyob ntawm seb ho raug kev puas tsuaj loj npaum li cas xwb."
Kuj tau muaj kev ceeb toom tias yuav muaj cua hlob hnub no rau ntawm cov zos Byron Coast, thiab yuav muaj cua hlob rau cov zos li Macquarie Coast, Hunter Coast, Batemans Coast thiab Eden Coast tag kis.
Gongolgon los kuj tseem muaj dej nyab loj txuav ntxiv, thiab ntshe tseem yuav muaj dej nyab txuas ntxiv rau lub limtiam no.
Thiab tej zaum ntshe yuav muaj dej nyab loj ntawm lub zos Mulgawarrina txij hnub zwj Feej (Wednesday) mus.
Ntawm lub zos Bourke ces cov theem dej nce siab tuaj yeej siab tshaj cov theem uas tau teev tseg rau lub 9 hli ntuj xyoo 1998 uas muaj dej nyab ntawd, thiab kuj tseem muaj dej nyab loj ntawm cov zos Brewarrina, Louth, Tilpa txuas ntxiv.
Tej zaum kuj yuav muaj dej nyab loj ntawm lub zos Burtundy thiab ntshe tseem yuav nyab txuas ntxiv mus txog yav lig lub 12 hlis ntuj thiab.
Limtiam no los ntshe cov theem dej tseem yuav nce siab tshaj tej theem dej tau nyab dhau los ntawm lub zos Hay Town thiab.
Kuj tseem muaj dej nyab loj txuas ntxiv ntawm lub zos Balranald thiab lawv kuj tseem nrhiav ib tug tub hluas hnoob nyoog 19 xyoos ntawm lub zos no txuas ntxiv uas raug dej muab tshoob mus lawm.
Thaum sawv ntxov hnub zwj Cag (Saturday) ntawd ces kuj tau muaj ib tug neeg pom tus hluas ntawd ntawm tus dej Murrumbidgee River thiab thiaj tau qhia rau nom tswv paub.
Cov theem dej nces siab tuaj ntawm tej zos Wakool Junction, Boundary Bend, Euston los kuj tseem nce siab tuaj ntxiv tshaj tej tau teev tseg rau lub caij dej nyab xyoo 1975 thiab.
Hos cov theem dej ntawm tus dej Murray River ntawm Wakool Junction ces ntshe tseem yuav nyob rau theem 11.70 metres mus txog ntua thaum ntxov lub 12 hlis ntuj no thiab.
Tab sis tej zaum kuj yuav muaj dej puv heev rau ntawm lub zos Boundary Bend ntev ntxiv, rau qhov lub chaw ntsuam huab cua kwv yees tias tseem muaj cov theem dej nyob tus ntawm 9.07 metres mus txog ntua lub 12 hlis ntuj nrab no thiab.
Tsis tas li no los kuj tseem yuav muaj theem dej nce siab ntawm lub zos Wentworth mus txog ntua hnub tim 19 los yog 21 ntawm lub 12 hlis ntuj no thiab.
Yeej tseem muaj dej nyab loj txuas ntxiv ntawm lub zos Moulamein, thiab tus dej Edward River puv siab tuaj txog 6.30 metres mus txog rau thaum ntxov lub 12 hlis ntuj thiab.
Tib lub caij no ntawm SA (South Australia) los, tej neeg nyob ze tus dej Murray River kuj tab tom npaj tsam ho muaj dej nyab rau yav qab deg thiab.
Kuj tau tsim tej ntug los yog tej ntsa thaiv kom dej tsis txhob nyab coj los siv thiab tej neeg zejzog los kuj tau tshem lawv tej khoom muaj nqi rau tej chaw siab lawm thiab.
Ces thiaj tau muaj ob cov kev kwv yees tias dej nyuav puv nce siab tuaj rau lub 12 hlis ntuj no, thawj co ces yuav ua rau muaj dej txog 175 gigalitres rau ib hnub twg rau thaum ntxov rau lub 12 hlis ntuj. Hos cov ob ces yuav yog muaj txuas ntxiv ntawd tom qab ntau lub limtiam uas muaj dej ntws ntau txog 185 gigalitres rau ib hnub twg ntawd.
Limtiam dhau los ces SA tus hau xeev Peter Malinauskas tau qhia tias yuav coj cov nyiaj $51.6 million coj los pab tej neeg uas yuav raug dej nyab.
Soj qab taug tau xov xwm tshiab txog cov kev kwv yees huab cua ntawm lub chaw ntsuam thiab kwv yees huab cua:
Taug tej xov xwm tshiab txog tej xwm txheej dej nyab ua tau muaj kev pauv hloov tshiab tau ntawm:
Yog tias koj poob rau cov xwm txheej muaj kev phom sij rau koj txoj sia ces kom hu rau tus xov tooj Triple Zero (000). Thiab hu rau cov koom haum li NSW SES tus xov tooj 132 500 thiab Victoria Emergency Services tus xov tooj 1800 226 226 los yog SA SES tus xov tooj 132 500 tau yog tias nag xob nag cua, cua hlob, ntoo vau los yog ceg khaub ntoo tsim teeb meem rau koj lub tsev puas los yog yuav ua rau ib tug twg tsis tau txais kev nyab xeeb.
Yog koj xav tau tej xov xwm no ua lwm hom lus ces hu rau lub koom haum Translating and Interpreting Service (TIS) tus xov tooj 131 450 (freecall) thiab hais kom lawv hu rau lub koom haum VicEmergency Hotline nrog koj tham.
Yog tias koj ho tsis lag ntseg, los yog tsis tshua hnov lus, los yog hais lus tsis meej/hais tsis tau lus ces kom hu rau lub koom haum National Relay Service raws tus xov tooj 1800 555 677 thiab hais kom lawv hu rau lub koom haum VicEmergency Hotline nrog koj tham.
