Muaj cov kev ceeb toom emergency warnings txog hav zoov kub nyiab uas kub sai ceev heev

Kuj tau muaj tej neeg ntawm xeev Victoria coob tuaj ntxiv raug ceeb toom kom tsiv tawm ntawm lawv tej vaj tse mus rau lwm qhov chaw rau lub caij uas yuav raug kev phom sij los ntawm ib kab hav zoov kub nyiab uas tseem muaj tej xwm txheej no uas ntuv zus tom qab tau muaj tej xwm txheej huab cua kub sov heev.

Fire crews are waiting to see how the Bayindeen bushfire develops after crews built containment lines around its 157km perimeter. Credit: Forest Fire Management Victoria

Ntsiab lus tseem ceeb:

• Tau muaj ib cov kev taw qhia rau tej neeg ntawm sab hnub poob ntawm xeev Victoria kom tsim tawm ntawm lawv tej vaj tse los yog nrhiav chaw nkaum rau lub caij uas muaj ib kob hav zoov yuav kub los txog.
• Hnub zwj Feej (Wednesday) dhau los ces twg muaj tej chaw dav txog li 22,000 hectares raug kub hnyiab lawm.
• Thiab kuj tau txo cov kev ceeb toom qes zog lawm tom qab uas muaj peev xwm tswj tau ib thaj hav nyom kub hnyiab ntawm Dereel thaum sawv ntxov hnub zwj Teeb (Thursday) tim 29.02.2024.

Tej neeg ntawm xeev Victoria kuj tau ntxeem dhau ib hmo uas huab cua kub sov heev rau lub caij uas muaj ntau kob hav zoov kub hnyiab tau yuav tsim teeb meem puas tsuaj rau ntau txoj sia thiab tej vaj tse.

Ces thiaj li tau muaj ib cov kev ceeb toom emergency warning rau tej neeg ntawm cov zos Dereel, Corindhap thiab Rokewood Junction sab qab teb ntawm Ballarat kom nyob twj ywm hauv tsev hmo zwj Feej (Wednesday) tom qab uas muaj txoj kev txhawj xeeb heev tias tsam raug kev phom sij ntawm hav zoov kub hnyiab.

Ces nom tswv tua hluav taws thiaj tau xa tsab xo kom soj thiab npaj tias seb tsim nyog ua li cas rau tej neeg ntawm ntau thaj chaw li Enfield, Rokewood thiab Mount Mercer, thiab qhia rau kom tej neeg ntawm tej zos no tsiv tawm.

Txawm li cas los kuj tau txo cov theem ceeb toom no rau thaum sawv ntxov hnub zwj Teeb (Thursday) no lawm vim rau qhov muaj peev xwm tswj tau thaj hav nyom kub hnyiab uas tau pib ntawm lub zos Dereel lawm.

Nom tswv thiaj tau hais tias tej neeg tua hluav taws muaj peev xwm tswj tau thaj hav nyom kub hnyiab no lawm tab sis kuj tau ceeb toom tias tej zaum kuj yuav rov qab muaj kev pauv hloov tau rau ib lub caij twg thiab.

Ces thiaj muaj cov kev ceeb toom txog tej xwm txheej kub ntaiv txog theem yuav raug tau kev puas tsuaj loj rau cheeb tsam Wimmera rau hnub zwj Feej (Wednesday) thiab Luke Hegarty uas yog tus kis ntawm State Control Centre kuj tau ceeb toom tias xeev Victoria yeej tseem tsis tau muaj peev xwm ntxeem dhau tej xwm txheej hav zoov kub hnyiab no.

Nom tswv kuj tau tos tias seb kob hav zoov kub hnyiab ntawm lub zos Bayindeen ntawm sab qaum teb hnub poob ntawm Ballarat tseem kub zoo li cas rau hnub zwj Teeb (Thursday) tom qab tej neeg tua hluav taws muaj peev xwm tsim tau ib txoj ciam thaiv ncig thaj chaw dav txog li 157 km lawm.

Hegarty tau hais tias "(Peb kuj tau) qee cov kev cej luam tias muaj tej ntoo ntawm thaj chaw raug kub hnyiab ntawd tseem ib nyuag nco pa taws me ntsis thiab, thiab zoo li tsuas nco rau ntawm thaj chaw raug kub hnyiab xwb.''

Tej tub koom siab ntawm lub koom haum Forest Fire Management Victoria nyob ntawm thaj hav zoov kub nyiab ntawm lub zos Bayindeen-Rocky Road nyob sab hnub poob qaum teb ntawm Ballarat, Victoria. Credit: Forest Fire Management Victoria

Ces Hegarty thiaj tau hais tias tej neeg tua hluav taws kuj paub zoo lawm tias tseem tshuav hauj lwm ntau npaum li cas yuav tau ua los tswj kob hluav taws no rau yav lig lub limtiam no.

Nws tau hais tias ces thiaj muaj ntau kob hluav taws kub hnyiab rau ntawm thaj uas twb tau raug kub hnyiab, ces thiaj pab kom tej neeg tua hluav taws hauv pem teb nyob ze thiab tej nyob hoom tua hluav taws muaj peev xwm tua tej kob hluav taws no sai heev lawm.

Ces thiaj muaj tej neeg coob heev ntawm tej chaw uas yuav raug hav zoov kub hnyiab kub siab txog cov kev ceeb toom thiab tau tsiv tawm rau thaum sawv ntxov hnub zwj Feej (Wednesday) lawm, tab sis yeej tseem muaj ib txhia neeg zos tseem nyob thiab pov puag lawv tej vaj tse.

Ces thiaj tau kwv yees tias huab cua yuav txias zog rau hnub zwj Teeb (Thursday) no tom qab tau muaj huab cua kub heev txog 45 degree Celsius.

Horsham ces yog ib thaj chaw ntawm ntau thaj chaw uas muaj huab cua kub sov txog li 30Cs thiab muaj cua hlob muaj ceem txog 96km/h tom qab sij hawm 5pm hnub zwj Feej (Wednesday).

Hegarty tau hais tias txawm tias tau muaj tej huab cua txias zog lawm los yeej tseem muaj tej xwm txheej huab cua uas ua rau tej chaw qhuav heev thiab.

Nws tau hasi tias "Txawm tias tej ntaub ntawv yeej teev tias lub caij ntuj sov tau los xaus lawm ... los zoo li yeej tseem muaj tej yam ntawm lub caij no (kuj tseem yuav ua rau muaj hav zoov kub hnyiab thiab.)''

Hnub zwj Feej (Wednesday) ces twb tau muaj 6 lub tsev raug kub hnyiab, muaj 84 tug yaj thiab 2 tug nyuaj raug kub hnyiab ntawm kob hav zoov kub nyiab ntawm lub zos Bayindeen lawm.

Thiab kuj tseem tau muaj ib cov kev ceeb toom rau tej neeg zos ntawm ntau thaj chaw tias tseem tsis tau txais kev nyab xeeb rov qab mus rau lawv tej zos.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.