Coles thiab Woolworths rov qab txwv tsis pub tej neeg yuav khoom ntau tom qab muaj xov xwm cej luam tias muaj neeg rov qab mus yuav khoom ntau ntau siv.
Ob lub khw muag khoom no rov qab txwv tsis pub neeg yuav tej ntaub sov quav, tshuaj cawv ntxuav tes, ntaub so tes, hmoov nplej, piam thaj, nqaij zom, pasta, cov mis khaws cia tau ntev, qe thiab txhuv txij li tav su dua hnub zwj Feej (Wednesday) tim 24 June no mus lawm.
Coles los kuj yuav txwv tib yam li no rau nws tej khw muag khoom nyob ze ntam ciam teb New South Wales thiab.
Ces thiaj li tau muaj xov xwm cej luam tias tau ua rau tej neeg ntshai thiab tau rov qab sib tw mus yuav khoom ntau ntau coj los cia siv tom qab xeev Victoria .
Cov xwm txheej kab mob rov qab sib kis dua tshiab no thiaj tau ua rau tsoom fwv xeev tau rov qab los tswj cov kev txwv tsis pub tej neeg nyob sib ze ua ke nruj tuaj ntxiv thiab tau los qhia tias 8 thaj chaw uas muaj kab mob COVID-19 sib kis ntawd yog thaj chaw twg lawm.
Tej neeg siv social media pom tau tias muaj neeg xav mus yuav tau khoom siv li xub hais saum toj no ntawm tej khw muag khoom ntau tuaj ntxiv rau tej zejzog uas muaj neeg kis tau tus kab mob no coob heev ntawd.
Steven Cain uas yog Coles tus coj hasi tias “Tom qab uas tau sab laj nrog tsoom fwv teb chaws thiab tsoom fwv xeev Victoria thiab nrog cov lagluam xav tej khoom no rau kiab khw muag lawm, ces nws thiaj tau los siv cov cai txwv tsis pub neeg yuav khoom ntau ntau siv rau ib ntus ntawm xeev Victoria tej khw kom muaj peev xwm tswj tau tej khoom uas neeg xav tau coj mus siv heev no."
“Peb xav thov kom tej customers yuav khoom siv li qub xwb kom sawv daws thiaj muaj peev xwm yuav tau zaub mov thiab tej khoom noj khoom siv uas lawv xav tau coj mus siv li qhov lawv xav tau."
Raws li Claire Peters uas yog tus coj Woolworths tau qhia ces nws hais tias "Peb yeej nkag siab tias muaj cov neeg Victoria coob tus yeej txhawj xeeb heev txog cov kev sib kis kab mob tsis ntev los no ntawm tej zejzog, tab sis peb xav qhia rau sawv daws paub meej tias peb yeej tseem yuav qhib peb tej khw thiab yeej muaj khoom ntau heev khaws cia ntawm peb tej chaw khaws khoom coj los tum ntawm peb tej khw cov txee muag.''
“Txawm tias peb yeej tseem muaj tej khoom ntau heev coj los muag los peb yuav tau ceev faj thiab yuav tsum tau ua qee yam los tiv thaiv kom tej neeg txhob mus yuav tej khoom no ntau ntau kom thiaj li tswj tau tej neeg kom txhob mus sib sau ua ke coob coob ntawm peb tej khw ntawm xeev Victoria no."
“Peb yeej muaj tej khoom no txaus muag rau peb tej customers tag nrho, yog tias peb tsuas yuav kom txaus raws li qhov tsim nyog yuav xwb."
“Tsis tas li no los peb yuav saib ntsoov seb ho muaj neeg coob npaum li cas xav yuav tej khoom no ntau npaum li cas thoob plaws lub xeev Victoria no siv rau ntau hnub tom ntej no thiab peb mam li xyuas kom txwv txhob pub tej neeg yuav khoom ntau kom sai npaum li sai tau."
Tsis tas li no los Woolworths tseem yuav txwv tej neeg tsis pub yuav tej khoom ntau ntau hauv online tib yam hauv nws tej khw online ntxiv thiab.
Yeej tau muaj tej xwm txheej neeg sib tw mus yuav khoom ntau ntau los khaw cia siv rau lub 3 hlis ntuj thiab 4 hlis ntuj dhau los rau lub caij uas nom tswv tau pib siv cov kev txwv tshiab los tswj tus kab mob coronavirus.
Ces tej xwm txheej no thiaj tau ua rau muaj neeg yuav tej khoom siv ntawm tej khw muag zaub mov ntau tuaj ntxiv txog li 24% rau lub 3 hlis ntuj diam raws li Australian Beauro of Statistics (ABS) tau qhia.
NYEEM TAU NTXIV
Tej xwm txheej peb pom neeg coob coob mus sib txeeb khoom ntawm tej txee muag khoom thiaj tau ua rau Australia tus thawj pwm tsav tau cem tsis pom zoo.
"Cas yuav txaus luag ua luaj li, neeg Australia tsis coj tej cwj pwm no, tsum kiag txhob ua li no ntxiv lawm," raws li Scott Morrison tau qhia.
"Tsis yog tej yam tsim nyog ua li, yeej pab tsis tau dab tsi thiab yog tej yam txaus tus siab kawg nkaus uas kuv tseem pom neeg Australia coj tej cwj pwm zoo lo no coj los ua ib cov tswv yim daws tej teeb meem kab mob sib kis no thiab."
Txawm li cas los kuj muaj neeg yuav tej khoom siv no thoob teb chaws tsawg lawm-ces thiaj ua rau Woolworths thiab Coles tau tshem cov kev txwv tsis pub neeg yuav khoom ntau ntau lawm tom qab uas nws muaj peev xwm rov qab npaj tau tej khoom no txaus coj los muag lawm.
