Neeg txawv teb chaws yuav muaj peev xwm ua tau Australia tej tub rog raws li ib cov program tshiab tsim coj los pab kom tej neeg no ras los ua pej xeem Australia sai.
Ces tej no thiaj yog ib co tswv yim raug coj los qhia rau lub 4 hlis ntuj pab rau Australia cov hauj lwm tiv thaiv teb chaws, thiab yuav nrog xyuas kom tsim tau cov eligibility critieria nthuav dav coj los siv kom muaj neeg coob tuaj ntxiv tau koom ua tub rog.
Leej twg muaj cai ua tau?
Txij lub 7 hli ntuj (2024) mus ces tej neeg New Zealand yuav muaj peev xwm thov ua Australia tej tub rog tau.
Tej neeg ntawm ntau haiv neeg uas tuaj nyob ruaj ntawm Australia los kuj yuav muaj peev xwm ua tau Australia tej tub rog tib yam txij lub 1 hlis ntuj xyoo 2025 mus thiab.
Thaum lawv ua tub rog txog 90 hnub (3 hlis) ces cia siab tias lawv yuav ras los ua pej xeem Australia.
Matt Keogh uas yog tus nom tswj tej tub rog tau hais tias cov kev nrhiav tub rog li no yuav tsis ua rau tej neeg tsiv tawm ntawm lawv tej teb chaws.
Nws tau qhia rau tej neeg nrhiav xov xwm ntawm Canberra tias ''tej neeg yeej tau tuaj nyob ntawm teb chaws Australia no lawm thiab cov kev koom ua Australia tej tub rog no tsuas pab kom lawv ras los ua pej xeem Australia sai xwb.''
Keogh thiaj qhia tias tsuas yog ib txoj xub ke rau tag nrho txhua tus neeg txawv teb chaws xaiv xwb tom qab uas tau qhia tias yuav xub xaiv qee haiv neeg ua ntej.
Tim dab tsi thiaj ua rau hloov tej cai no?
Raws li Keogh tau hais ces Australia tej xwm txheej muaj neeg poob hauj lwm tsawg no yog tej yam ua rau tsis muaj peev xwm yuav nrhiav tau neeg ua tub rog ces lub tswv yim no thiaj muaj hom phiaj pab kom seb nrhiav puas tau tub rog ntau ntxiv.
Tej neeg uas tsis yog Australia tej pej xeem uas xav koom ua tub rog rau Australia yuav tsum tau nyob ntawm Australia no yam tsawg li 1 xyoos ua ntej yuav thov ua tub rog, thiab yuav tsum tsis ua tub rog rau ib lub teb chaws txawv teb chaws twg rau 2 xyoos ua ntej dhau los thiab yuav tsum yog cov neeg muaj peev xwm thov ua tau pej xeem Australia.
Richard Marles uas yog tus nom tswj dej num tiv thaiv teb chaws tau hais tias qho no yog tej yam tsim nyog ''kom thiaj pab ua tau tej hauj lwm tswj kev ruaj ntseg rau haiv neeg no rau lub caij 10 xyoo ntxiv no los yog ntev tshaj ntawd ntxiv.''
Thiab pab nom koom tswj (Lwm pab nom teb chaws - Coalition) los yeej tsis tawm tsam nrog lub tswv yim no dab tsi, tab sis Simon Birmingham uas yog tus nom txawv teb chaws ntawm pab nom no tau hais tias tsim nyog yuav tau ua vim pab nom Labor tsis muaj peev xwm lis tau tej hauj lwm no xwb.
Nws tau qhia rau lub chaw nthuav xov xwm Sky News tias "Tsoom fwv tej cai tiv thaiv teb chaws yeej tseem khuam daig ntawm ntau cov kev txheeb xyuas thiab raug muab ncua thiab tseem muaj ntau yam ua rau tej neeg tsis ntseeg siab rau cov kev koom ua tub rog. Peb yeej xav pom kom muaj neeg Australia coob ntxiv tuaj ua tub rog.''
Pat Conroy uas yog tus nom tswj tej lagluam tiv thaiv teb chaws tau hais ib cov lus ntawm lub rooj sab laj Australian Strategic Policy Institute Defence Conference rau hnub zwj Quag (Tuesday) dhau los tias yuav muaj cov hauj lwm no piv li tus tsoom fwv Labor dhau los uas yog John Curtin uas tau pab kom Australia ntxeem dhau tsov rog ntiaj teb zeeg ob (World War II).
Nws hais tias "Yog tham txog tsoom fwv lawm ces, qhov yooj yim rau peb ua ntawd ces yog yuav tau los kho peb tej hauj lwm tiv thaiv teb chaws. Tab sis tej zaum kuj yuav yog tej yam ua yuam kev thiab los kuj tau. Yog li thiaj tsim nyog peb tus tsoom fwv yuav tsum los ua tib zoo txheeb seb lub tswv yim twg thiaj tsim nyog siv thiab npaj kom tau ib co tswv yim zoo los taw qhia qee cov kev nqes peev loj tshaj plaws thiab tseem ceeb tshaj plaws uas ib haiv neeg twg muaj peev xwm ua tau.''
Thiab tsoom fwv tej nyiaj puag xyoo uas tau qhia rau lub 5 hlis ntuj dhau los (2024) yeej tau npaj nyiaj ntxiv li $5.7 billion los pab rau tej hauj lwm tub rog rau lub sij hawm 4 xyoos ntxiv no thiab .
Tab sis raws li lub koom haum Australian Strategic Policy Institute (ASPI) cov kev tshuaj ntsuam tsoom fwv tej nyiaj puag xyoo ces kuj ceeb toom tias tsoom fwv tej tswv yim no yeej yuav pab kho tsis tau kom haiv neeg no tej tub rog muaj tsab peev xwm rau lub caij yam tsawg li 10 xyoo rau lub caij uas Beijing cog lus tias ''yuav tsim kev puas tsuaj'' rau tej tub rog txawv teb chaws.
Conroy thiaj cia siab tias yuav npaj los tsim tej riam phom uas siv twj coj kev thiab tej meem tej nplaum, thiab yuav los npaj tias tsoom fwv yuav koom tes ua hauj lwm li cas nrog tej lagluam tiv thaiv teb chaws thiab ntau lub teb chaws pej kum haiv.
Uas yuav tau txais nyiaj los pab tej hauj lwm no li ntawm $16 txog $21 billion coj rov qab los tsim cov hauj lwm Integrated Investment Program rau 10 xyoo ntxiv tom ntej no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
