'Ntshe yuav rov qab muaj tej mob ua rau me nyuam yaus hnoos, tsis paub tias yog thaum twg lawm xwb.'

Tej kws paub zoo txog tus mob hnoos whooping cough uas hnoos tsis paub tu (tsis paub tsum) hasi tias ntshe tej zaum yuav ua rau muaj tus mob no rau ntau caum txheeb tus neeg Australia rau lub caij yuav txog Christmas no.

Catherine Hughes' son Riley died when he was just four weeks old. He was too young to receive a whooping cough vaccine. Source: AAP / Catherine Hughes

Ntsiab lus tseem ceeb:

• Tej kws paub zoo txog tus mob hnoos whooping cough ceeb toom tias ntshe yuav rov qab muaj tus mob hnoos no uas yog ib tug mob uas kis tau zoo tshaj tus mob COVID-19, khaub thuas thiab kab mob qoob lawm thiab.
• Tej koom haum tswj tus mob no thiaj nqua hu kom muaj cov kev qhia kom tej neeg paub thiab mus hno cov tshuaj tiv thaiv tus mob no ntxiv thiab yeej muaj tej tshuaj vaccines no hno pub dawb rau tej poj niam xeeb me nyuam.
• Ces thiaj tau muaj cov kev nqua hu kom neeg Australia rov qab txheeb xyuas lawv tej keeb kwm hno cov tshuaj vaccine no dua.

Nyuam qhuav yug tau Riley li peb limtiam xwb thaum uas nws pheej nqus ntswg thiab thaum nws muaj 4 limtiam (1 hlis) xwb ces nws tas sim neej lawm.

Xyoo 2015 ces Catherine Hughes tus tub tau khaub thuas ces thiaj ua rau nws ua tsis taus pa thiab ua rau nws hnoos yam tswj tsis tau rau ib lub caij luv luv.

Txawm tias yeej tsis ib txwm yog ib co mob hnoos uas yuav hnoos muaj ceem heev, tas sis yeej yog ib cov mob hnoos uas hnoos ntev txog ntau hli thiab ua rau muaj teeb meem mob nkeeg loj rau tej me nyuam thiab tej me nyuam mos liab thiab, vim cov hnoos no yuav ua rau tej me nyuam ua tsis tau pa yooj yim, ntuav, ua rau lawv dim zis vim tswj tsis tau zais zis thiab ua rau lawv tej tav dam.

Riley cov kev hnoos cough cia lis ras los ua ib cov mob ntsws sai heev thiab thaum kawg ces yuav tau nruab pa pab nws lub cev kom thiaj tawm tsam tau nrog tus mob no lawm xwb. Tab sis yeej tseem tsis tau muaj peev xwm pab tau txaus li qhov tsim nyog thiab, ces Huges tus tub thiaj tas sim neej rau lub caij muaj hnoob nyoog 1 hlis thiab ob hnub lawm. Thiab tseem tsis tau hno tshuaj whooping cough vaccine rau nws vim rau qhov nws tseem muaj hnoob nyoog yau heev.

Riley cov kev nruam sim no tau ua rau peb ceeb thiab tu siab kawg nkaus li. Tau ua rau peb tu siab heev thiab ua rau peb tsis pom qab yuav ua li cas. Tab sis peb yeej paub tias peb yuav tau ua ib yam dab tsi coj los tiv thaiv kom lwm tsev neeg tsis txhob ntsib teeb meem tib yam li peb.

Catherine Hughes

Riley ces yog ib tug ntawm Australia tej me nyuam ntau tshaj 20,000 tus uas tau tus mob hnoos whooping cough uas sib kis coob heev tsis ntev los no.

Ntshe tej zaum tab tom yuav muaj phaum mob hnoos whooping cough no

Robert Booy uas uas yog ib tug zes kais (Professor) ntawm tsev kawm qib siab University of Sydney hais tias yeej tau kwv yees tias yuav muaj tus mob hnoos no txhua txhua peb xyoos rau tsib xyoos twg ib zaug.

Yeej yuav rov qab muaj tus mob hnoos whooping cough no rau ib lub caij twg xwb, uas peb xav tias tej zaum yuav muaj rau lub caij nplooj hlav los yog ntau hli ntawm lub caij ntuj so uas yeej ib txwm muaj tus mob no kis coob.

Professor Robert Booy, University of Sydney.

Tej koom haum paub zoo txog tus mob hnoos whooping cough tau nqua hu kom neeg Australia ceev vaj thiab txheeb lawv tej keeb kwm hno cov tshuaj vaccine tiv thaiv hom mob no. Source: Getty / Vadym Terelyuk

"Tam sim no ces tus mob no tseem nyob tus uas tsis paub tias thaum twg yuav rov qab sib kis xwb.''

Booy tau hais tias tus mob hnoos whooping cough no yeej tseem sib kis tau zoo tshaj tus kab mob COVID-19, kab mob khaub thuas thiab tus kab mob ua qoob, vim yeej tau kis coob heev rau tej neeg ze txog li 40,000 tus diam.

Tsis hais ib tug twg li yog kis tau tus mob hnoos whooping cough no ces yuav muaj peev xwm kis tau rau lwm tus ntev txog peb (3) limtiam diam los yog txog rau thaum uas lawv noj tshuaj tua kab mob (antibiotics) tiav tso, txhais tau tias tej zaum ib tug neeg mob twg uas kis tau tus mob no muaj peev xwm yuav kis tau rau lwm tus neeg tsis tau hno cov tshuaj vaccine txog li 17 hnub diam.

Txij li Hughes tus tub tau tas sim neej lawm ces nws tau tau txhawb nqa kom tsim cov kev hno cov tshuaj whooping cough vaccines pub dawb rau tej poj niam xeeb me nyuam thiab tau teeb tsa lub koom haum Immunisation Foundation of Australia.

Yuav tau kub siab txog cov kev hno tshuaj vaccine tshaj no ntxiv

Yeej tseem muaj cib fim ntau yam heev uas peb muaj peev xwm ua los pab kom tiv thaiv tau thiab txo kom tej neeg zejzog kis tus mob hnoos whooping cough no tsawg. Thiab yeej pom tias tsim nyog tej neeg yuav tau hno koob tshuaj booster vaccine uas yuav pab kom pov puag tau tej neeg no ntawm tus hmob hnoos whooping cough me ntsis.

Catherine Hughes

Txawm tias tus mob no yeej ib txwm mob rau tej me nyuam mob liab thiab tej me nyuam yaus xwb, los yeej pom tias muaj tej laus yog cov kis tau tus mob hnoos whooping cough no txog ib nrab thiab.

Tab sis yeej muaj 80 feem pua ntawm tej neeg Australia yeej nco tsis tau tias xyov lawv puas tau hno ib koob booster shot, uas yeej xav kom yuav tau rov qab hno txhua txhua 10 xyoo ib zaug twg kom thiaj pab tau yus lub cev tiv thaiv tus mob no.

Thiab vim tias tej neeg los pheej rau rov qab mus koom ntau yam koom txoos thiab pheej rov qab ntoj ncig rau ntau lub hli ua huab cua sov dua thiab, ces Booy thiab Hughes thiaj tau nqua hu kom neeg Australia kub siab txog thiab rov qab txheeb lawv tej keeb kwm hno cov tshuaj vaccine no dua.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.