Anthony Albanese tau cog lus tias yuav tshwm nyiaj $2.5 "coj los daws cov teeb meem tu tsom kwm tej laus'' yog tias pab nom Labor yeej cov kev xaiv tsa tsoom fwv teb chaws uas yuav los txog sai sai no.
Tej lus nws tau qhia txog nws cov nyiaj puag xyoo uas nws tau qhia rau hmo Thursday ntawd, tom qab tau 2 hnub ntawd ces, tus coj lwm pawg fai kum xeeb no kuj tau qhia txog nws pab nom tej tswv yim ''uas yuav xyuas kom tau txais kev ruaj ntseg, tau lub meej mom, tsim tau cov kev tu tsom kwv zoo thiab muaj txoj kev lub tshua tej laus raws li qhov tsim nyog rau tej dej num tu tsom kwv tej laus."
Nws tau hais tias "Tus kab mob uas kis thoob ntuj thiab Royal Commission tau mus txheeb txog tej teeb meem uas coob tus neeg Australia yeej paub lawm - tias muaj teeb meem rau cov kev tu tsom kwm tej laus."
Lub hom phiaj ntwm kuv cov nyiaj puag xyoo yuav coj los qhia ua zaum 3 hmo no ces yog qhia txog peb tej tswv yim los daws cov teeb meem muaj rau tej dej num tu tsom kwm tej laus.
"Thiab tus kab mob kis thoob ntuj no nrog rau Royal comission cov kev mus txheeb tej teeb meem no yog ib cov kev qhia kom paub tseeb txog tej uas ntau tus neeg Australia yeej tau paub lawm - uas yog muaj teeb meem loj rau peb cov kev tu tsom kwm tej laus no."
"Yeej muaj peb coob tuaj ntxiv ua lub neej ntev ntxiv lawm uas tsim nyog peb yuav tau txais cov kev tu saib xyuas kom zoo rau ntau xyoo rau thaum yav laus.
"Tab sis tam sim no ces ua rau muaj ib phaum neeg Australia thiab tej cuab yig muaj txoj kev ntshai thiab kev txhawj xeeb."
Mr Albanese tau hais tias pab nom Liberals "yeej muaj lub sij hawm 10 xyoo los ua ib yam dab tsi daws tej teeb meem no lawm."
"Yog tseem cia lawv ua nom ntxiv, ces yeej yuav tsis muaj dab tsi hloov li - thiab tej teeb meem tsis zoo tam sim no tau ua rau lawv tseem yuav tsim lub neej pem suab phem tos ntau tus neeg Australia tuaj ntxiv xwb."
Labor lub tswv yim siv nyiaj los kho cov kev tu tsom kwv tej laus no yuav siv nyiaj los pab thiab yuav hais kom muaj tej registered nurse ua hauj lwm ntawm tej tsev laus txhua sij hawm, thiab tseem muaj cov kev yuam tshiab kom tej laus neeg yuav tsum tau txais kev tu ib hnub twg yam tsawg li 215 ntiag tiv (minutes) raws li royal commission cov kev taw qhia.
Ambulance attendants wearing full protective clothing prepare a gurney to transport residents to hospital at the Wyoming Nursing Home on August 2, 2021 in Sydn Source: Getty Images
Raws li Mr Albanese tau qhia rau tsev tsoom fwv ces nws hais tias "Tsis yog tias peb tej laus neeg Australia yog tej neeg tsis tseem ceeb, lawv tsis yog ib co kev leg rau peb, lawv yog tej neeg tsim nyog tau txais kev cam hwm, yuav tsum coj tej cwj pwm thiab muaj cov kev xav zoo rau lawv thiab yuav tau kub siab txog lawv kom zoo tshaj plaws."
Nws tau hais tias Labor yuav koom tes ua hauj lwm ua ke nrog tej neeg zejzog kom tsim tau cov kev tu tsom kwv haum raws li tej kab lis kev cai, thiab yuav pub tus coj lis cov dej num Aged Care Quality and Safety Commissioner kom muaj fwj chim ntau tuaj ntxiv thiab yuav hais kom tej tsev laus yuav tsum cej luam qhia txog tej nyiaj txiaj uas lawv siv.
Tus tsoom fwv Labor yuav pab kom tej neeg ua hauj lwm tu tej laus khwv tau nyiaj hauj lwm ntau tuaj ntxiv, thiab nrog tej lagluam tu tsom kwv tej laus no tsim cov qauv tswv yim npaj tej zaub mov kom zoo rau tej laus ntawm tsev laus noj rws li Mr Albanese tau hais.
Hnut Tuesday ntawd ces Treasurer Josh Frydenberg yeej tau qhia txog tsoom fwv teb chaws cov nyiaj puag xyoo 2022-23 uas los nrog daws tej nuj nqes siv ua lub neej ua kim tuaj, tham txog kev tsim hauj lwm ua, thiab cov kev nqes peev lagluam tsim tej hauv paus txhim kho thiab pab rau phab tub rog.
Tus tsoom fwv koom tswj cov nyiaj puag xyoo yeej tau tsim '' cov kev pab cuam ib ntus thiab pab tsis ntsees rau ib cov neeg twg,'' uas muaj lub hom phiaj pab tej nuj nqes ua lub neej uas kim tuaj no kom tau chaw dim pa me ntsis li tej nqe roj ua kim heev los yog tej nqe zaug mov uas kim tuaj lawm.
Tej no ces yuav txo tej se sau rau tej roj sam tsheb txog ib nrab thiab yuav them nyiaj tib zaug pab nrog rau cov kev txo se pab rau tej neeg kom thiaj daws tau cov teeb meem nqe siv ua lub neej ua kim tuaj no kom hauj sim me ntsis.
Cov nyiaj puag xyoo tsaib no yeej tau siv nyiaj ntau billion dollars los pab rau ntau yam hauj lwm raws li nom tswv tau cog lus tseg li pab cov kev tu tej laus, pab daws kev nyuaj siab thiab pab cov nyiaj tuav pov hwm rau tej neeg puas cev National Disability Insurance Scheme (NDIS).
Yog li ntawd yeej tau muaj cov kev siv nyiaj los lis tej hauj lwm hais no hauv tej nyiaj puag xyoo li tau kwv yees tseg lawm, thiab tab sis zoo li kuj tseem muaj teeb meem nyuaj dua rau lwm cov kev cog lus xyoo no.
Mr Albanese los kuj tau hais dhau los tias tus tsoom fwv koom tswj tej nyiaj puag xyoo no ces tsuas yog
Tab sis thawj pwm tsav Scott Morrison tau hais tias tsis hais ib tug twg li uas tseem pheej xav tias cov nyiaj puag xyoo no tsuas yog cov pab kom tsoom fwv rov qab raug xaiv los ua nom xwb yuav tsum tau ''ua tib zoo nyeem kom nkag siab zoo tshaj thawj thawj nploog ntawm phau ntawv qhia txog nyiaj puag xyoo no."
Cov hauj lwm renewables, cov kev tsim khoom hauv lub teb haws siv thiab cov kev zov me nyuam pheej yig
Mr Albanese tau siv lub caij nws los qhia txog nws pab nom tej nyiaj puag xyoo los ua lub sam thiaj npaj rau cov kev nrhiav suab xaiv tsa.
"Tej tswv yim no tsis yog ib co tswv yim uas yuav muaj kev pauv hloov loj dab tsi. Kuv pab nom thiab kuv yeej cog lus tias yuav nrog xyuas cov renewal tsis yog yuav hloov dua tshiab,'' raws li nws tau hais.
"Kuv xav siv tej kev nyiaj ntxeem uas tag nrho nej sawv daws tau muaj rau lub caij nyuaj heev no los npaj kom tau lub neej pem suab zoo dua."
Nws tej lus qhia txog pab nom Labor tej nyiaj puag xyoo no kuj tau tham txog 5 yam hauj lwm tseem ceeb uas yuav ras los ua pab nom Labor tej cai los txhawb nqa kom tej neeg khwv tau nyiaj hauj lwm ntau tuaj ntxiv thiab ''tswj kom tau tej nuj nqe.''
Tej no ces yuav muaj cov kev txhawb nqa kom muaj kev nqes peev lagluam thiab tsim hauj lwm ua yam tsis tas siv nyiaj ntau, txhawb nqa cov renewable energy, txhawb nqa kom muaj cov kev tsim khoom siv hauv lub teb chaws, nqes peev lagluam rau tej hauv paus txhim kho (kev tsheb, chaw nres nkoj thiab choj etc) thiab xyuas kom tej neeg muaj cib fim ntau tuaj ntxiv mus xyaum kom muaj txuj ci thiab paub ua hauj lwm tshaj qub thiab xyuas kom tej nqe zov me nyuam pheej yig.
With AAP
