Puas yog koj xav tuaj kawm hauv teb chaws Australia? Tau los mas! Kuj yuav tsum tau qhia rau nom tswv Australia thiab muaj pov thawj qhia tau meej tias koj yeej muaj nyiaj txaus tuaj pab koj noj nyob thiab kawm ntawv ntawm teb chaws Australia mas koj thiaj yuav thov tau cov student visa tuaj kawm.
Raws li xov tooj cua SBS Radio Punjabi Program tau mus nrog ib tug neeg khiav ntaub ntawv rau cov neeg tsiv teb tsaws chaw tham, ces lub tuam chav Department of Home Affairs tau hais kom tej tub kawm pej kum haiv yuav tsum muaj nyiaj tuaj siv ib lub xyoos twg hauv teb chaws Australia no tshaj zog li $21,000 thiab yuav tsum muaj nyiaj tuaj them tej nqe ntiav kawm nrog rau lwm yam nqe ntxiv thiab mas lawv thiaj muaj cai thov tau cov student visa tuaj kawm hauv teb chaws Australia.
Tshaj ntawd lawm, yog tias tus tub kawm ntawd muaj txij nkawm thiab cuab yig lawm thiab xav coj nws poj niam me nyuam nrog nws tuaj thiab ces tseem yuav tau npaj nyiaj ntxiv thiab, xws li yog coj nws poj niam los yog nws tus txiv tuaj ces yuav tau npaj nyiaj tshaj li $7,000 ntxiv, yog coj ib tug me nyuam ces yuav tau npaj nyiaj tshaj li $3,000 thiab hos yog tias nws tus me nyuam ntawd tseem xav tuaj kawm ntawv hauv Australia thiab ces tseem yuav tau npaj nyiaj txog li $8,000 ntxiv thiab. Yog thaum muab tej nyiaj no tag nrho los sib sau lawm ces raug nyiaj ntau heev li lawm.
Txuas ntxiv ntawd los nom tswv Australia tseem xav kom yuav tsum npaj kom tau nyiaj rau ib tug neeg kheej uas yuav tuaj kawm ntawv hauv teb chaws Australia no siv rau ib lub xyoos twg tshaj li $62,000 hos yog tias yog tseem coj ib tug neeg nrog nws tuaj thiab ces yuav tsum tau npaj nyiaj kom tshaj li $72,000 ntxiv.
Tsis yog tias yuav tsum tau npaj tej nyiaj no xwb tab sis yuav tsum muaj pov thawj qhia tias yeej muaj tej nyiaj no tiag thiab mas thiaj muaj cai mus thov tau cov student visa tuaj kawm ntawm teb chaws Australia.
Yog li ntawd tam sim no nom tswv Australia thiaj ua nyuaj rau pej kum haiv tej tub kawm tshaj qub lawm, vim dua ntawm tej tub kawm no yuav tsum muaj nyiaj txaus tuaj pab lawv kawm ntawv noj haus thiab ntiav chaw nyob lawm lawv tseem yuav tau qhia rau nom tswv paub tias lawv kawm tau ntawv Askiv zoo thiab mas thiaj li muaj cai thov tau cov student visa tuaj kawm ntawm teb chaws Australia yog tias koj xav tuaj kawm koj ntiag tug.
Txawm li cas los txhob tag kev cia siab thiab nom tswv Australia yeej muaj ib cov scholarship pab rau ntau lub teb chaws uas koj muaj peev xwm mus thov tau cov scholarship no tuaj kawm dawb xwb tsis tau them ib yam dab tsi hlo li thiab. Mus txheeb xyuas tau ntawm Australia tej embassy ntawm lub teb chaws koj nyob los yog nom tswv Australia tej vas sab tau tib yam.
