Australia thiab New Zealand yuav ua 2 tug tswv cuab uas tswj ntiaj teb tej poj niam cov kev sib tw ncaws pob 2023 FIFA Women's World Cup lawm.
Thaum ntxov rau hnub zwj Kuab (Friday) ces ntiaj teb lub koom haum tswj cov kev ncaws pob Fédération Internationale de Football Association (FIFA) tau qhia tias teb chaws Australia thiab New Zealand tau sib tw yeej teb chaws Colombia thiab tau muaj neeg tawm suab pom zoo txog 22 lub suab ntawm tag nrho 35 lub suab nrog FIFA Council.
Ces thiaj lu tau tsom Australia pab ntxhais ncaws pob Matilda cov duab rau ntawm lub tsev Sydney Opera House thiab tsom New Zealand pab ntxhais ncaws pob rau nws lub nroog Aaucland's Sky Tower los ua kev zoo siab rau cov kev muaj yeej no.
Yuav muaj poj niam cov koom txoos sib tw ncaws pob rau lub caij 7 hli ntuj thiab 8 hli ntuj xyoo 2023, thiab yuav muaj 32 pab poj niam sib tw ua thawj zaug vim lawv tau xyuas kom muaj 8 pab los koom ntxiv rau 24 pab uas tau koom cov kev sib tw xyoo 2019 dhau lo.
The Sydney Opera House just before the announcement. Source: AAP
Australia pab ntxhais ncaws pob Matildas zoo siab heev rau thaum ntxov hnub zwj Kuab (Friday), ces Australia pab ntxhais ncaws pob no thiab tej nom tswv tswj cov kev sib tw ncaws pob ntawm Australia lub koom haum ncaws pob Football Federation Australia kuj tau los saib FIFA cov kev txiav tias lub teb chaws twg yuav tau los ua tus tswv cuab tswj ntiaj teb tej poj niam cov kev sib tw ncaws pob FIFA Women's World Cup 2023.
Tau muaj ib daim yeeb yaj kiab luv luv raug coj mus tso hauv Twitter qhia txog lub caij uas Australia cov neeg thiab tej nom tswv tswj kev sib tw ncaws pob paub tias lawv tau ua tus tswv cuab lawm ces tej poj niam tau dhia rau ua rau no ua kev zoo siab thiab saum tsis tswm ntawm lawv tej rooj tog los qw thiab zoo siab heev thiab sib khaw sib puag.
"Peb yeej lawm. Peb tau los ua tus tswv cuab tswj poj niam cov kev sib tw ncaws pob lawm'', raws li Sam Kerr uas yog Matilda tus captain tau sau hauv nws phau Twitter accound thiab kuj tau tso ib daim yeeb yaj kiab luv luv nws ntaus nrig nphau sau tias '' yog kuv tam sim no," ntxiv.
Matildas tus ntxhais ncaws pob Kyah Simon tau qhia rau SBS News ua ntej FIFA yuav qhia tias lub teb chaws twg yuav tau los ua tus tswv cuab tswj ntiaj teb cov poj niam tej kev sib tw ncaws pob uas yuav tau ua rau Australia cov ntxhais sib tw tau sib tw ntawm teb chaws Australia no yog ib txoj kev npau suav rau cov ntxhais sib tw ncaws pob no.
"Thaum yus tseem yog ib tug me nyuam ntxhais ces yus xeev xav kom tau mus sib tw nrog ntiaj teb cov kev ncaws pob tab sis cov kev muaj peev xwm koom cov kev sib tw no ntawm yus lub teb chaws kiag kom yus tsev neeg thiab yus tej phooj ywg tau koom nrog thiab muaj neeg Australia mus koom saib coob heev ntawm tej tshav sib tw thiab mas yog tej kev sib tw zoo tshaj plaws tsis muaj dab tsis yuav zoo npaum li no lawm xwb," raws li Ms Simon tau qhia.
Thaum xub mas Australia yeej tau npaj tias xav ua tus tswv cuab los tswj ntiaj teb tej poj niam cov kev sib tw ncaws pob no kheej rau xyoo 2023 xwb, tab sis ntxiv ntawd los kuj tau koom tes nrog New Zealand los sib koom ua tswv cuab tsj lub koom txoos sib tw ncaws pob no ua ke rau lub 12 hlis ntuj xyoo 2019 lawm.
Hnub zwj Hli (Monday) dhau los no ces lub koom haum Japan Football Association tau qhia tias nws thim tsis sib tw los ua tus tswv cuab tswj ntiaj teb tej poj niam cov kev sib tw ncaws pob FIFA Women's World Cup xyoo 2023 lawm, ces thiaj tshuav teb chaws Colombia ntawm South America los sib tw nrog Australia thiab New Zealand seb leej twg yuav tau ua tswv cuab tswj cov kev sib tw no lawm xwb.
Australia thiab New Zealand tau txais cov suab pm zoo ntau tshaj plaws raws li FIFA tau tshuaj ntsuam xyuas ces thiaj ua rau 2 lub teb chaws no tau cov zauv 4.1 ntawm tus zauv siab tshaj plaws uas yog 5 lawm hos Colombia ces tsuas tau suab txog li 2.8 xwb.
Matildas Alanna Kennedy puts her hands together as FIFA announce the hosts to the 2023 FIFA Women's World Cup at the FFA Offices. Source: Getty Images AsiaPac
Kuj tseem muaj cov teb chaws tub koom siab 37 lub ntawm lub koom haum FIFA tau los tawm suab pom zoo thiab vim New Zealand tus neeg hu ua Johanna Wood thiab Colombia tus neeg hu ua Ramon Jesurun tsis muaj cai los tawm tau suab.
Tsis tas li ntawd los Australia thiab Kiwis (New Zealand) yeej yog 2 lub teb chaws uas kub siab heev los sib tw txog ntua rau thaum uas FIFA tau qhia kiag tias seb leej twg yuav tau los ua tus tswv cuab tswj cov kev sib tw no.
"Peb yeej tseem yuav tau siv xov tooj sib tham kom ua tau tej hauj lwm no txuas ntxiv, tseem muaj hauj lwm me ntsi yuav tau ua thiab, vim tshuav sij hawm tsis ntev lawm xwb raws li kuv xav. Yog li peb thiaj yuav tau ua hauj lwm ua ntuv zus kom txog ntua thaum kawg," raws li Chris Nikou uas yog Aaustralia lub koom haum tswj cov kev sib tw ncaws pob (Federation Football of Australia) tau qhia rau SBS News rau thaum lig rau hnub zwj Teeb (Thursday).
New Zealand tus thawj pwm tsav Jacinda Ardern los kuj tau hu xov tooj nrog xyuas kom tau los ua tus tswv cuab tswj cov kev sib tw no thiab.
Ces thiaj tau muaj tej xwm txheej no tshwm sim tiag lawm tom qab tau 10 lub xyoo uas Australia tsis muaj peev xwm sib tw kom tau los ua tus tswv cuab tswj ntiaj teb tej txiv neej cov kev sib tw ncaws pob (FIFA Men's World Cup) ntawd.
Yog li ntawd thiaj yuav muaj cov kev sib tw rau 12 lub nroog ntawm teb chaws Australia thiab New Zealand, li uas cov nroog li Sydney, Melbourne, Brisbane, Perth, Adelaide, Newcastle, Launceston yuav yog cov tswv cuab uas koom tswj cov kev sib tw rau ntawm teb chaws Australia no.
Hos cov nroog Auckland, Wellington, Christchurch, Hamilton, thiab Dunedin ces yuav ua tswv cuab tswj cov kev sib tw ntawm teb chaws New Zealand.
Tab sis yuav xub qhib cov kev sib tw thawj zaug ntawm lub tshav sib tw Eden Park ntawm New Zealand lub nroog Auckland thiab sib tw ua zaum kawg ntawm nroog Sydney teb chaws Australia.
Gianni Infantino uas yog lub koom haum (Fédération Internationale de Football Association-FIFA) tus coj tau qhia tias vim muaj 32 lub teb chaws tau los koom sib tw zaum no "ces thiaj yog ib lub koom txoos loj tshaj plaws li tau muaj dua los coj los ua kev txhawb nqa poj niam cov kev sib tw ncaws pob."
The Women's World Cup trophy. Source: AAP
Mr Infantinoa tau hais tias "Peb zoo siab heev rau nqe lus hais los ntawd, thiab kuv yeej paub meej lawm tias yuav yog ib cov kev sib tw ncaws pob World Cup zoo tshaj plaws ntawm teb chaws Australia thiab New Zealand."
Mr Infantino yeej tau qhia tias "kuj yog ib cov kev txiav txim siab nyuaj heev rau nws'' tias yuav pub leej twg los ua tus tswv cuab tswj cov kev sib tw no thiab, tab sis nws yeej dhia tsis dhau ntawm FIFA cov kev tshuaj ntsuam tias tsim nyog yuav tso leej twg los ua tus tswj lawm.
"Kuv yeej nyiam teb chaws Colombia heev thiab kuv yeej ntseeg tau tias lawv yeej muaj peev xwm yuav los tswj tau cov kev sib tw no tau zoo. Tab sis yog thaum peb los ua tib zoo xyuas peb cov kev tshuaj ntsuam thiab saib cov kev tawm suab lawm ces yuav tau tso rau lwm tus lawm."
"Yav dhau los mas FIFA yeej raug liam tias tsis kub siab txog tej ntawv cej luam uas lwm tus tau los ua tib zoo tshuaj ntsuam xyuas txog tej hauj lwm no. Tab sis peb yuav tsum tau ua zoo xyuas kom tej ntawv cej luam no muaj nqis thiab tsis li ntawd ces ntshe peb yuav tau tso tseg tsis txhob sib tw seb leej twg yuav tau ua tswv cuab lawm xwb."
"Yog tias tias lub koom haum FIFA dhau los tsis ua tej hais no ces lub tshiab los yeej yuav tsis ua tib yam thiab ces thiaj yog tej yam uas kuv zoo siab heev rau tej hauj lwm no."
Chris Nikou uas yog tus coj Australia lub koom haum ncaws pob (Football Federation Australia) tau hais tias cov kev muaj peev xwm los sib tw yeej thiab tau los ua tus tswv cuab tswj cov kev sib tw no yog ib lub cib fim zoo tshaj plaws yuav pab kom muaj cov kev loj hlob rau cov kev sib tw ncaws pob ntawm cheeb tsam no ntau tuaj ntxiv.
"Hnub no FIFA yeej tau ua rau tej teb chaws uas tsis yog ib lub xwb tab sis tseem yog 2 lub uas yuav los ua tus tswv cuab zoo siab tshaj plaws li," raws li Mr Nikou tau qhia.
"Peb paub tias yeej tseem muaj hauj lwm ntau heev yuav tau los lis. Tab sis peb yeej tau cog lus rau lub koom haum FIFA thiab tej teb chaws tub koom siab lawm tias peb yuav ua tib zoo los xyuas kom ua tau txhua yam tiav kom tsim tau cov kev sib tw ncaws pob hauv ntiaj teb uas zoo tshaj plaws thiab pab kom muaj poj niam cov kev sib tw ncaws pob hauv ntiaj teb no ntau tuaj ntxiv los yog kom muaj poj niam cov kev sib tw ncaws pob ntawm cheeb tsam Asia-Pacific ntau tuaj ntxiv."
Johanna Wood uas yog tus coj ntawm New Zealand lub koom haum tswj cov kev ncaws pob (New Zealand Football Federation) tau cog lus tias 2 haiv neeeg no yuav koom tes ua ke kom los tsim tau lub koom txoos sib tw kom tej neeg nco ntsoov txog.
"Chris wb thiab tag nrho peb cov neeg uas tau mus koom sib tw no yeej zoo siab tshaj plaws rau cov kev tau los ua tswv cuab tswj cov kev sib tw no," raws li Ms Wood tau qhia.
"Peb yeej tau ib txwm hais tias cov kev sib tw ua tswv cuab uas 2 lub teb chaws sib koom ua ib tug tswv cuab no yog cov kev tsim keeb kwm thiab tsim ntau yam cib fim."
"Chris yeej tau hais thaum nws tau nrog lub koom haum FIFA tham tias yog peb tau ua tswv cuab ces yuav yog ib qho koom plig rau peb tab sis peb xav ua tib zoo los xyuas kom pob khoom plig ntawv ras los ua ib yam khoom tsim nuj tuaj ntxiv."
"Peb yuav ua tib zoo xyuas yam koom tsim nuj ntawd thiab kom tej poj niam cov kev sib tw ncaws pob no kom yog ib cov kev sib tw tseem ceeb tshaj plaws thiab sib koom ua ib pab los lis tej dej num no ua ke."
Thawj pwm tsav Scott Morrison thiab New Zealand tus thawj pwm tsav Jacinda Ardern los yeej tau koom sau ib cov ncauj lug qhia rau hnub zwj Kuab (Friday) sawv ntxov tias '' yog ib cov kev txiav txim siab tseeem ceeb tshaj plaws rau poj niam cov kev sib tw rau peb cheeb tsam no."
"Yog thawj zaug ntawm keeb kwm uas neeg Australia thiab neeg New Zealand yuav muaj peev xwm los nco txog tias tau koom tes ua ke los tswj cov kev sib tw ncaws pob no ntawm nkawv tej teb chaws ua ke."
"Cov kev sib tw xyoo 2023 yuav yog cov kev sib tw loj tshaj plaws thiab peb yeej ntsee tias yuav yog ntiaj teb tej poj niam cov kev sib tw ncaws pob zoo tshaj plaws uas tau tshwm sim muaj."
"Thiab cov kev sib tw no yog tej yam zoo heev rau cov kev sib tw ncaws pob thiab tej lagluam sib tw ntawm 2 lub teb chaws no rau lub caij uas peb nyiaj ntxeem dhau ntawm tus kab mob COVID-19 no thiab rov qab los txhim kho peb tej teb chaws dua."
Cov kev sib tw no los yeej yuav pab kom Australia lub hom phiaj uas xav npaj kom tau poj niam thiab txiv neej sib npaug ib tog 50/50 kom tau mus koom cov kev sib tw no rau xyoo 2027, thiab yuav pab kom New Zealand muaj poj niam coob tuaj ntxiv rau tej twb muaj 35% uas tau sib tw rau lub sij hawm 5 xyoos dhau los no lawm raws li cov rooj ncauj lug ntawm 2 lub teb chaws no 2 tug coj tau qhia."
"Tam li yog 2 haiv neeg uas tshaj lij heev rau cov kev sib tw no peb yeej muaj keeb kwm los ntev txog cov kev muaj peev xwm tsim tau cov poj niam ncaws pob tshaj lij tshaj plaws hauv ntiaj teb no thiab cov kev sib tw zaum no yuav ras los ua ib cov kev txhawb siab kom phaum neeg tom ntej no kub siab thiab ua ib lub sam thiaj txhawb nqa lawv kom muaj peev xwm sib tw tau nrog ntiaj teb tej sam thiaj."
