Australia tus txiv neej hnoob nyoog 78 xyoo uas tau mus caij lub nkoj Diamond Princess ntawm teb chaws Japan yog thawj tus neeg tau tas sim neej los ntawm cov kab mob coronavirus (COVID-19) rau ntawm ib lub tsev kho mob ntawm nroog Perth rau thaum hnub zwj Hnub (Sunday) sawv ntxov no lawm.
Tseem tsis tau paub tus txiv neej no lub npe, tab sis nws yeej raug tej neeg kho mob muab cai rau qhov chaw kho mob hnyav (Intensiv care unit) nntawm lub tsev kho mob Sir Charles Gairdner Hospital tom qab txheeb tau tias nws kis tau tus kab mob no lawm, ces thiaj raug coj los tshuaj ntsuam ntawm lub zos Howard Springs ze ntawm Darwin ntawm xeev Northern Territory lub hlis dhau los.
Andrew Robertson uas yog tus coj tswj kev noj qab haus huv ntawm xeev Western Australia tau los qhia meej txog cov xwm txheej tas sim neej no thaum nws tau nrog tej neeg nrhiav xov xwm tham rau hnub zwj Hnub (Sunday) no.
"Peb tseem xav qhia kom meej tseeb rau sawv daws paub tias yeej tseem tsis tau muaj tej kab mob no sib kis ntawm Australia tej neeg zejzog," Nws tau hais li ntawd, thiab ntxhab ntxiv tias xav kom zej tsoom tsis txhob ntshai.
"Cov kev nruam sim no yog ib cov xwm txheej phom sij heev cuam tshuam txog lub nkoj Diamand Princess uas coj tej neeg ncig ua si."
Mr Robertson tau qhia tias tus txiv neej hnoob nyoog 78 xyoo no tsev neeg tseem siv xov tooj nrog nws tham rau Hmo zwj Cag (Saturday) dhau los.
Nws tus poj niam uas muaj hnoob nyoog 79 xyoos los kuj raug ntsuas tau tias tau tus kab mob coronavirus no thiab kuj raug muab cais nws pw nws ntawm lub tsev kho mob Perth Hospital lawm, raws li tej nom tswv tswj kev noj qab haus huv tau qhia rau hnub zwj Kuab (Friday) dhau los. Thiab Mr. Robertson tau hais tias tus poj niam no yeej nyob tus lawm.
Mr Robertson hais ntxiv tias "Tus kab mob no yeej muaj cov yam ntxwv mob sib txawv rau tej neeg."
Nkawm niam txiv no yog 2 tug neeg ntawm tag nrho 3,711 tus neeg uas tau mus caij lub nkoj Diamond Princess uas raug ceev tseg tshuaj ntsuam seb puas tau tus mob coronavirus ntawm lub nkoj no rau ntawm Japanese lub nroog Yokohama tom qab tau muaj tus mob no sib kis ntawm lub nkoj no rau thaum ntxov lub 2 hlis ntuaj xyoo 2020 dhau los ntawd.
The Diamond Princess cruise ship at Yokohama Port near Tokyo. Source: Kydpl Kyodo
Thiab yeej tau muaj tej neeg txog li ntawm 700 leej raug txheeb tau tias kis tau tus kab mob coronavirus no lawm, uas muaj 9 tus neeg Australia nrog tej neeg no yog cov kis tau tus mob no thiab.
Greg Hunt kuj tau sau ib cov ncauj lug rau hnub Sunday no xa moo tu siab rau tsev neeg uas muaj tus neeg tas sim neej los ntawm cov kab mob coronavirus no.
"Txawm tias tej neeg tau tus mob no txog li 80% yog cov mob nyob rau teb chaws Suav yog cov mob me ntsis xwb, thiab tsuas muaj ib txhia thiaj mob hnyav xwb, tab sis vim tau muaj tej kab mob no sib kis rau pej kum haiv ntau lub teb chaws lawm, ces ntshe peb tseem yuav pom muaj neeg kis tau tus mob COVID-19 no ntau ntxiv tuaj rau ntau limtiam tom ntej no los kuj tau thiab."
Australia tus thawj pwm tsav Scott Morrison los yeej tau tus siab heev nrog tus neeg tau tas sim neej no thiab tseem tau qhia tias cov mob no mob tau mob loj heev rau tej laus uas lub cev tsis muaj zog thiab."
Thawj pwm tsav qhia tias "Peb yeej npaj txhij los tiv thaiv thiab kho tej mob no tib yam li lawm lub teb chaws lawm thiab cia siab tias peb yuav muaj peev xwm nyiaj ntxeem dhau ntawm tej xwm txheej no."
Tham txog tus kab mob coronavirus (COVID-19) hauv ntiaj teb no lawm ces, tam sim no yeej muaj neeg tshaj 84,000 tus kis tau tus mob no lawm uas tau xub xub kis ntawm Suav lub nroog Wuhan ntawm xeev Hubei, thiab kuj tau muaj neeg kis tau tus mob no coob tuaj ntxiv ntawm teb cahws South Korea, Iran thiab Italy lawm thiab. Yog li nom tswv Australia thiaj tau txwv tsis pub tej neeg mus rau tej teb chaws hais no los yog cov neeg tau mus rau tej teb chaws no tuaj rau teb chaws Australia lawm. Hos Australia tej pej xeem thiab cov neeg tau npav ntsuab (Permanent residents) uas rov qab los yuav tsum tau qhia rau nom tswv paub los yog yuav tau cai lawv tus kheej nyob twj yim ntawm tsev yam tsawg li 14 hnub txhob tawm mus qhov twg seb puas tau tus mob no.
Tom qab tau ib hnub tau ib hnub uas Australia tau txwv tsis pub cov neeg txawv teb chaws tau mus xyuas teb chaws los yog cov neeg ntawm teb chaws Iran tuaj rau Australia lawm ces, Greg Hunt uas yog Australia tus pwm tsav tswj kev noj qab haus huv thiaj tau hais kom tus lwm coj saib xyuas cov dej num tswj kev noj qab haus huv hauv teb chaws Australia no rov qab txheeb xyuas seb puas yuav hloov cov kev taws qhia tias yuav pub los tsis pub Australia tej pej xeem mus xyuas teb chaws Italy li cas ntxiv, vim lub teb chaws no twb muaj 29 tus neeg tas sim neej los ntawm cov kab mob no lawm.
Mr. Hunt hais tias "Yog li ntawd kuv thiaj tau nug lawv hnub no tias seb puas tsim nyog hloov kho dua cov kev ceeb toom los yog cov kev txwv tsis pub Australia tej pej xeem mus rau teb chaws Italy."
Tam sim no tau muaj 26 tus neeg kis tau tus kab mob coronavirus no ntawm teb chaws Australia lawm, nrog rau 2 tug neeg uas ib tug yog tus poj niam ntawm Gold Caost thiab ib tug txiv neej ntawm New South Wales uas raug ntsuam tau tias muaj cov yam ntxwv mob tom qab tau mus xyuas teb chaws Iran rov qab los rau teb chaws Australia no.
