Australia yug me nyuam tsawg: cov zos twg yug me nyuam coob tshaj plaws thiab tsawg tshaj plaws?

Muaj neeg yug me nyuam ntawm Australia tom qab ntxeem dhau tus mob COVID lawm, thiab yog ib co kev yug me nyuam tsawg tshaj plaws rau lub sij hawm 17 xyoo.

Birth rates in Australia have dropped in the past two years. Source: SBS, Getty

Tau muaj cov kev theem yug me nyuam tsawg ntawm teb chaws Australia no tom qab tau ntxeem dhau tus kab mob COVID lawm.

KPMG cov kev tshuaj ntsuam pej xeem thiab tej xov xwm teev txog cov kev yug me nyuam ces txheeb tau tias yug me nyuam tsawg dua 26,110 tus los yog yug tsawg dua 8.28 feem pua rau xyoo 2023 piv rau tej yug xyoo 2021.

Ces tej me nyuam yug xyoo 2023 (289,1000) tus uas yog ib cov me nyuam yug tsawg tshaj plaws txoj xyoo 2006 los.

Terry Rawnsley uas yog KPMG tus urban economist tau qhias tias tej nqe ntau yam siv ua lub neej tau ua rau muaj teeb meem loj rau cov kab theem yug me nyuam vim nyiaj txiaj.

Nws tau hais tias "Peb yeej tsis tau pom dua tias yuav muaj cov kev yug me nyuam tsawg ntawm teb chaws Australia rau lub caij nyiaj poob nqe thiab lagluam tsis zoo thiab neeg poob hauj lwm ntau txij lub caij xyoo 1970s, ces kuj pom tias muaj cov kev noj tshuaj kom tsis txhob muaj me nyuam ntau kawg nkaus li.''

Tsis tas li ntawd los lub caij 4 xyoos dhau los kab mob COVID-19 kuj tau ua rau muaj cov kab theem yug me nyuam tsis xwm yeem thiab.

Rawnsley thiaj tau hais tias "Tom qab uas tau ntxeem dhau tej xwm txheej kab mob kis thoob ntuj uas tsis paub tias xyov yuav zoo li cas ntxiv uas nom tswv tau kaw teb chaws, ces tej neeg uas tau ncua tsis yug me nyuam kuj tau txiav txim siab xav npaj muaj me nyuam.''

The number of births in Australia dropped between 2023 and 2021. Source: SBS

Nws tau hais tias cov xwm txheej neeg poob hauj lwm tsawg thiab nom tswv xeev thiab nom tswv teb chaws cov kev tshwm nyiaj pab tej lagluam tej zaum yuav pab txhawb nqa kom tej neeg rov qab pib muaj me nyuam dua ib zaug ntxiv.

Txij li xyoo 2020-21 ces yeej muaj neeg yug me nyuam ntawm Australia coob ntxiv tuaj txog 7.3 feem pua ntawm Australia lawm, uas muaj 315,210 tus yug rau xyoo 2021.

Tab sis txij ntawd los ces neeg Australia kuj ntsib ntau cov kev nce kab theem paj ntau zaus thiab nyiaj poob nqe tuaj ntxiv.

Txhab nyiaj faj seeb haiv (Reserve Bank) thiaj tau nce kab theem paj 13 zaug txij lub 5 hlis ntuj xyoo 2022 txog rau lub 11 hlis ntuj xyoo 2023, uas ua rau tej neeg yuav tsev yuav tau them nqe tsev kim tuaj ntxiv.

Ces xyoo 2022 thiaj ua rau muaj neeg yug me nyuam txog 302,900 tus, uas ntej yuav yug tsawg ntxiv rau xyoo 2023 lawm.

Rawnsley tau qhia tias ''tej nqe ua lub neej ntau yam uas kim tuaj tam sim no tau ua rau tej cuab yig tsis muaj nyiaj txaus siv, ces thiaj ua rau tej neeg Australia coob heev tau txiav txim siab ncua tsis yug me nyuam.''

Tej nqe ua lub neej ntau yam uas kim tuaj tam sim no tau ua rau tej cuab yig tsis muaj nyiaj txaus siv, ces thiaj ua rau tej neeg Australia coob heev tau txiav txim siab ncua tsis yug me nyuam.

Terry Rawnsley, KPMG urban economist

Rawnsley los yeej tau xub hais txog tej teeb meem yuav muaj tau los ntawm tej nqe siv ua lub neej ntau yam piv txwv li tej kev muaj peev xwm yuav tau tsev nyob los yog ntiav tau tsev nyob yog tej uas ua rau tej hluas tsis xav yug me nyuam.

Nws tau qhia rau SBS News thaum ntxov lub hli no tias "Yog tias koj nyob ntawm ib lub tsev unit uas muaj ob chav pw ntawm Sydney, ces koj tsuas muaj peev xwm yug ib tug me nyuam xwb. Thiab yuav nyuaj zog ntawd yog tseem nyob rau ntawm lub appartment uas muaj ob chav pw thiab tej zaum yus twb tsis muaj peev xwm yuav tau ib lub tswv townhouse 3 chav pw lawm.''

Rawnsley tau hais tias tej xov xwm tam sim no kuj qhia tias tej teeb meem nyiaj txiaj kuj yuav ua rau muaj teeb meem rau tej neeg cov kev txiav txim siab yug me nyuam thiab.

Nws thiaj tau piav txog tej xwm txheej ntawm Canberra, tias thiaj tsuas yog tib lub tuam ceeb uas tseem muaj neeg yug me nyuam li qub txij xyoo 2019 los no, uas yeej yug me nyuam li ntawm 5,500 tus txij xyoo 2019 thiab 2023.

Rawnsley tau hais tias ''kuj muaj peev xwm tswj tau tej nqe uas nce kim tuaj me ntsis'' piv rau lwm cov nroog loj.

Rawnsley tau hais tias ''Tej lagluam los zoo li yeej tseem ruaj khov heev. Txhais tias tej cuab yig tsis tshua ntsib teeb meem ntau li tej ntawm lwm cov nroog, ces thiaj pom tias muaj cov kev yug me nyuam ntawm ACT nyob tus li qub.''

Tej zos uas tej poj niam yug me nyuam ntau tshaj 3 tug

Gilgandra uas yog lub zos sab hnub poob ntawm NSW ces yeej yug 77 me nyuam xyoo 2023 tab sis kuj yog lub zos uas yug me nyuam tsawg lawm thiab.

Vim lub zos no yog lub zos uas muaj cov kab theem yug me nyuam ntau tshaj plaws ntawm txhua qhov chaw ntawm teb chaws Australia, txawm li cas los kuj tsis muaj tej xov xwm teev txog cov kab theem yug me nyuam no ntawm cov xeev Tasmania, South Australia thiab Northern Territory.

Tej poj niam ntawm lub zos Gilgandra ces yeej yug me nyuam txog li 3.38 tus — uas yeej yug me nyuam ntau dua Australia cov kab theem yug me nyuam 1.6 tus xyoo 2023.

Thiab yuav tsum muaj cov kab theem yug me nyuam yam tsawg li 2.1 mas thiaj yuav muaj pej xeem xwm yeem ntev ntxiv tuaj yam tsis tas tos tej neeg tsiv teb tsaws chaw tuaj ntxiv.

Cov kev muaj peev xwm yuav tau tsev los yog ntiav tau tsev nyob ntawm lub zos Gilgandra yog ib co tseem ceeb ua rau tej poj niam yug me nyuam coob. Tej nqe tsev nrab ntawm lub zos no tsuas raug $260,000 xwb raws li lub tuam txhab Domain Group hais.

Yog piv rau tus nqe tsev nrab ntawm Sydney ces twb yog $1.6 million — uas yog tus nqe tsev kim tshaj plaws ntawm Australia tej nroog.

Ntxiv ntawd ces cov chaw kim tshaj plaws txuas ntxiv yog — ACT thiab Melbourne — uas tus nqe tsev nrab twb kim tshaj $1 million lawm.

Gilgandra in NSW has the highest fertility rate, although data for Tasmania, South Australia and the Northern Territory were not available. Source: SBS

Lwm cheeb tsam ntawm NSW tej zos uas muaj tej poj niam cov kab theem yug me nyuam coob tshaj plaws ntawd ces kuj yog cov zos Narrabri Surrounds; Coonamble; Nyngan - Warren; Inverell Surrounds - East; thiab Condobolin.

Tej neeg uas nyob rau ntawm Queensland tej zos yaj sab uas muaj cov zos li Tara; North Stradbroke Island; Far South West; Kingaroy Surrounds - North; and Rockhampton Surrounds - East ces yog cov zos uas muaj tej cuab yig muaj me nyuam coob dua.

Hos tej chaw uas muaj cov kab theem yug me nyuam tsawg tshaj plaws ces feem coob yog cov chaw nyob rau hauv plawv nroog loj.

Most of the areas with the lowest fertility rates were inner-city suburbs located in capital cities. Source: SBS

Tus kab theem yug me nyuam nrab rau ib tug poj niam twg txog li 1.57 tus me nyuam rau ntawm Greater Sydney xwb.

Tab sis Rawnsley tau hais tias kuj rov qab muaj neeg yug me nyuam coob li qub ua ntej tsis tau muaj kab mob COVID kis thoob ntuj rau ntawm tej zos toj siab lawm thiab.

Nws tau hais tias ''Tej hluas Australia uas tsiv mus nyob rau tej zos toj siab los kuj yug me nyuam tsawg lawm thiab.''

Tasmania thiaj tsuas yog tib lub xeev uas thiaj tseem muaj tej poj niam yug me yuam coob ntxiv tuaj xyoo 2023 piv rau tej yug xyoo 2019, uas tau ua rau muaj cov kab theem yug me nyuam ntau tuaj ntxiv txog li 2.1 feem pua los sis yog yug tej me nyuam txog li 5,850 tus.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.