Australia tau tawm suab tsis pom zoo muaj suab rau neeg txum tim hauv tsev tsoom fwv

Tau muaj neeg tsis pom zoo kom muaj suab rau neeg txum tim hauv tsev tsoom fwv rau Australia thawj cov kev tawm suab seb puas pom zoo kho txhooj cai tswj haiv rau lub sij hawm ntev tshaj 20 xyoo no.

Ballot papers are seen at a counting centre in Melbourne, Saturday, October 14, 2023. Australians will vote in a referendum on October 14 on whether to enshrine an Indigenous voice in the country's constitution. (AAP Image/Con Chronis) NO ARCHIVING Source: AAP / CON CHRONIS/AAPIMAGE

Ntsiab lus tseem ceeb:

• Neeg Australia tau tawm suab tsis pom zoo muaj suab rau neeg txum tim hauv tsev tsoom fwv.
• Muaj 6 lub xeev thiab Northern Territory tawm suab tsis pom zoo thiab tsuas muaj ACT thiaj tawm suab pom zoo xwb..
• Thawj pwm tsav Anthony Albanese tau nqua hu kom neeg Australia koom npoj.

Neeg Australia tau tawm suab tsis pom zoo rau cov kev thov teev zwm pawg neeg ua suab rau neeg txum tim hauv tsev tsoom fwv rau Australia tej txhooj cai tswj haiv lawm.

Pom tau tias muaj tag nrho 6 lub xeev suav Northern Territory nrog tau tawm suab ''tsis pom zoo'' rau lub caij tawm suab kho txhooj cai tswj haiv rau hnub zwj Cag (Saturday tim 14.10.2023).

Yog li ntawd ces thiaj muaj tej neeg mus 'tawm suab tsis pom zoo' feem coob thaum suav tej ntawv tawm suab ntawm haiv neeg no.

Lub xeev Australia Capital Territory (ACT) thiaj tsuas yog tib lub xeev uas 'tawm suab pom zoo xwb''.

Thiaj ua rau thawj pwm tsav Anthony Albanese thiaj hais tias cov kev tawm suab no ''tsis yog tej yam qhia txog peb, thiab tsis yog yam yuav tsim kev sib tawg tswj rau peb."

"Ces tam sim no thiaj tsuas nyob rau ntawm tag nrho peb sawv daws yuav los tsim kev koom npoj thiab nrhiav lwm txoj sub ke txawv tshiab los sib kho kom muaj kev sib haum xeeb.''

Australia tus thawj pwm tsav Anthony Albanese tau los hais ib cov lus txog cov kev tawm suab seb puas pom zoo kho txhooj cai tswj haiv kom muaj suab rau neeg txum tim hauv tsev tsoom fwv.

Peter Dutton tau nqua hu kom lub teb chaws no muaj kev koom npoj, thiab tseem hais tias ''tsis tsim nyog muaj cov kev tawm suab no. Cov kev thov kho txhooj cai tswj haiv thiab tej txheej txheem lis tej hauj lwm no tsim yog tej yam uas ua coj los tsim kom muaj kev koom npoj rau neeg Australia, tsis yog yuav tsim kev sib tawg tswj rau peb."

Peter Dutton uas yog tus coj ntawm lwm pab nom thaib Senator Jacinta Price uas yog tus nom lis laj fai txog neeg Australia tej neeg txum tim tau hais lus nrog tej chaw nthuav xov xwm tom qab tau muaj cov kev tawm suab. Source: AAP / JONO SEARLE/AAPIMAGE

Thiaj ua rau muaj Australia ib txhia neeg txum tim ''yuav siv ib limtiam los nyob ntsiag to'' tom qab uas tau muaj cov kev tawm suab, ho lwm cov neeg ces kuj tseem tos tias seb ho yuav muaj dab tsi tshwm sim ntxiv tom ntej no.

Linda Burney uas yog tus nom tswj dej num txog neeg txum tim Australia thiab yog ib tug txhawb nqa ''pawg neeg tawm suab txhawb nqa'' tau qhia tias nws ntseeg tias yuav muaj ib phaum coj neeg txum tim tshiab tshwm ntxiv tom qab cov kev tawm suab no.

Nyunggai Warren Mundine uas yog ib tug neeg tseem ceeb uas ''tsis pom zoo txhawb nqa cov kev muaj suab rau neeg txum tim'' tau hais tias cov kev tawm suab no qhia tau tias neeg Australia ''xav kom ua kom tiav ntau yam hauj lwm'' uas tseem muaj teeb meem rau Australia tej neeg txum tim tej zejzog.

Nws tau hais tias "Xav kom tej neeg sawv daws yuav tsum tau kub siab txog tej teeb meem kub ntxhov, tej teeb meem ua phem rau tej poj niam me nyuam, cov kev rau ib tug twg yuam, thiab tej cwj pwm tsis zoo uas tseem muaj rau ib txhia zejzog neeg txum tim."

Txheeb tau tej xov xwm tshiab txog 2023 Indigenous Voice to Parliament referendum thoob SBS Network, suav Australia tej neeg txum tim tej lus tawm tswv yim ntau yam ntawm NITV thiab.

Txheeb tau SBS Voice Referendum portal kom koj muaj peev xwm nyeem tau ntau zaj xov xwm, saib tau ntau yam videos thiab mloog tau ntau yam xov xwm kaw ua suab (podcasts) ua ntau tshaj 60 hom lus, los sis yog txheeb tau tej xov xwm tshiab nrog rau tej lus tshuaj ntsuam ntau yam, tej documentaries los yog ntau yam kev lom zem uas txheeb tau dawb xwb ntawm Voice Referendum hub on SBS On Demand.