Ntsiab lus tseem ceeb:
- Hnub zwj Hnub (Sunday night) ces nroog ces tau muaj av qeeg muaj ceem txog 3.8 magnituge ntawm nroog Melbourne.
- Lub koom haum Geoscience Australia hais tias yeej tau muaj kev cej luam tias hnov qav qeeg ntawm sab qaum teb ntawm Bendigo mus txog sab qab teb ntawm nroog Hobart.
- Ntau xyoo tsis ntev los no kuj tau muaj av qeeg ntau tuaj ntxiv ntawm Australia no lawm, tab sis tej xwm txheej no kuj yog ib co uas yuav muaj ntev ntxiv thiab.
Hmong zwj Hnub (Sunday night) ntawd ces tej xwm txheej av qeeg muaj ceem txhog 3.8 magnitude yeej tau ua rau tej neeg ntawm nroog Melbourne ceeb.
Lub koom haum Geoscience Australia tau hais tias cov xwm txheej av qeeg no pib tob txog li 3 km ntawm lub zos Sunbury, uas nyob nrug ntawm nroog rau sab qaum teb hnub poob txog li 40 km, thaum sij hawm 11.41 pm rau hnub Sunday.
Raws li lub koom haum no tau qhia ces thiaj ua rau muaj neeg coob tshaj 22,750 leej tau hu rau lub koom haum no thiab qhia tias lawv hnov av qeeg, piv txij ntawm sab qaum teb ntawm Bendigo mus txog ntua sab qab teb ntawm Habart.
Txawm tias yeej tsis ib txwm muaj av qeeg ntawm Australia no, los ntau xyoo tsis ntev los no kuj tau muaj av qeeg tseem ceeb ntau zaug thiab. Ces thiaj ua rau ib txhia xav paub tias puas yog muaj av qeeg ntau tuaj ntxiv ntawm Australia lawm.
Puas yog tias muaj av qeeg ntau tuaj ntxiv tas mus li ntawm Australia lawm?
Feem ntau mas yeej tsis tshua muaj av qeeg ntawm Australia, tab sis kuj tau muaj tej xwm txheej no ntau xyoo tsis ntev los no thiab.
Xyoo 2021 ces yeej muaj av qeeg muaj ceem txog 5.8 thiab 4.8 magnitude ntawm xeev Victoria, ua ke no los kuj muaj av qeeg muaj ceem txog li 5.3 magnitude ntawm xeev Western Australia tib xyoo ntawd thiab.
Xyoo 2022 ces yeej muaj av qeeg muaj ceem txog 4.8 magnitude ntawm xeev Western Australia, thiab lub 3 hlis ntuj xyoo no los kuj muaj av qeeg txog 4.7 magnitude ntawm South Australia thiab.
Adam Pascale uas yog tus coj tshawg fawb ntawm lub chaw teeb txheeb Seismology Research Centre, tau qhia rau SBS News tias, txawm tias ntau xyoo tsis ntev los no tau muaj av qeeg ntau tuaj ntxiv lawm los yeej tseem yog ib cov xwm txheej uas yuav muaj ntev ntxiv thiab.
Nws tau hais tias "tau ob peb xyoos dhau los ntawd, ces kuj tau muaj av qeeg rau ntawm tej zos ntau thaj chaw yog piv rau tej xwm txheej av qeeg 10 xyoo dhau los, hais tsi ntsees rau lub sij hawm ob xyoos dhau los ntawd".
"Tab sis yog thaum peb xyuas lub caij uas muaj av qeeg ces, tej xwm txheej no kuj tau tshwm rau lub caij uas ib txwm muaj tej xwm txheej no thiab.''
Mr Pascale thiaj tau hais tias tau xub muaj cov av qeeg muaj ceem txog 4 magnitude rau lub sij hawm 100 xyoos, thiab kuj tseem muaj tej xwm txheej av qeeg raws lub caij nyoog li no los yog cov xwm txheej av qeeg zoo li no.
Nws tau hais tias ''Tej zaum thiaj yuav ua rau peb pom muaj tej xwm txheej av qeeg muaj ceem txog 4 magnitude li no ntawm Melbourne txhua txhua 100 xyoo twg, ces zaum no peb thiaj rov qab muaj cov xwm txheej av qeeg no.''
"Yog peb xam tias muaj av qeeg txhua limtiam rau ntawm sab qab teb hnub tuaj ntawm Australia no ces yeej yuav muaj txog li 30 los yog 40 zaug rau ntawm tej chaw no ... thiab yeej muaj av qeeg tas mus li tsuas yog tias tej neeg tsis ras txog xwb, vim zoo li yeej ib txwm muaj av qeeg ib zaug twg txhua hli li thiab.''
Tej xwm txheej av qeeg feem ntau ntawm Australia no ces tsis tshua muaj ceem, ces tej neeg sawv daws thiaj tsis paub tias muaj av qeeg xwb. Source: SBS
Tsim nyog koj yuav ua li cas thaum muaj av qeeg?
Raws li cov kev taw qhia ntawm xeev Victoria lub koom haum State Emergency Service (SES) hais, ces yog tias muaj av qeeg tiag, ces xav kom nrhiav ib qho chaw ruaj nkaum li nyob hauv qab ib lub rooj tog twg thiab nyob twj ywm ntawm qhov chaw ntawd.
Mr Pascale yeej pom zoo thiab taw qhia tias tsis txhob khiav tawm rau sab nraum zoov rau tej qho chaw uas tej zaum yuav muaj tej zaum yuav muaj tej yam dab tsi vau thiab poob los tsuam los tais yus.
Nws tau hais tias "Feem ntau mas yog thaum muaj tej khoom poob los tsoom lawv ces yuav ua rau tej neeg raug mob, thiaj xav kom nrhiav chaw nkaum thiab nyob twj ywm."
"Dauv los yog plia kom qes, thiab nkaum hauv qab ntawm tej yam khoom tuab uas ruaj/khov li tej rooj, thiab nyob twj ywm ntawm qhov chaw ntawd txog rau thaum av tsis qeeg tso."
SES kuj taw qhia tias yog tias ho tsis muaj rooj nyob ze, xav kom siv yus ob txhais tes vov los yog pos yus lub ntsej muag thiab taub hau los yog khiav nkaum ntawm ib hauv ceg kaum tsev ntawm lub tsev ntawd.
SES kuj taw qhia kom tej neeg zaum laub muab lub laub cheem kom tsis txhob swb, thiab vov los yog thaiv yus lub taub hau thiab caj dab thiab nyob twj ywm ntawm thaj chaw yus nkaum ntawd.
Yog tias koj ho nyob sab nraum zoov rau lub caij av qeeg ntawd, ces xav kom nyob kom nrug ntawm tej tsev, tej teeb ntawm tej kev thiab tej xov hluav taws xob, thiab nyob rau qhov chaw kaj lug uas tsis muaj dab tsi ntawd txog rau thaum av xaus tsis qeeg tso.
Australia yeej muaj tej keeb kwm av qeeg
Australia cov xwm txheej av qeeg tseem ceeb tshaj plaws tau tshwm sim rau xyoo 1988 ntawm xeev Northern Territory, thaum muaj av qeeg muaj ceem txog 6.2, 6.3 thiab 6.6 magnitude ntawm lub zos Tennant Creek.
Xyoo 1989 ces kuj muaj av qeeg muaj ceem txog 5.4 magnitude ntawm lub nroog Newcastle ntawm xeev New South Wales (NSW), uas tau ua rau muaj neeg 13 leeg tas sim neej thiab ua rau tsim kev puas tsuaj xam raug nyiaj txog $4 billion.
Mr Pascale hais tias tej xwm txheej av qeeg hmo zwj Hnub (Sunday night) ntawd tsuas yog tej yam qhia rau peb tias tej zaum kuj yuav muaj tau tej xwm txheej av qeeg loj, thiab yog tej yam tseem ceeb uas peb paub tias yuav ua li cas kom thiaj tau txais kev nyab xeeb rau peb.
Nws tau hais tias "Australia yeej tsis muaj tej xwm txheej av qeeg no tas mus li, ces thiaj ua rau peb tsis npaj tias yuav ua li cas yog thaum ho muaj tej xwm txheej no tshwm sim."
"Tej zaum kuj yuav muaj tej xwm txheej av qeeg muaj ceem txog 7.5 magnitude tau rau ib qho chaw twg ntawm Australia no thiab, yog tias muaj tiag li hais ntawd ces yuav yog ib co xwm txheej av qeeg muaj ceem heev li."
"Yog li ntawd tej xwm txheej av qee me me no thiaj yog tej yam coj los qhia kom peb paub txog tej xwm txheej no, tab sis kuj tsis tsim kev puas tsuaj loj dab tsi, kuj yog tej yam zoo rov qab coj los qhia rau peb tias tsim nyog peb yuav tau ua dab tsi yog poob rau ib co xwm txheej av qeeg thiab peb ho yuav npaj li cas."
Additional reporting by AAP
