Ntsiab lus tseem ceeb:
- Anthony Albanese hais tias tej lus iab liam ib txhia nom ntawm tsoom fwv Australia tias muaj feem cuam tshuam tua neeg tsheej pab kom tus noob yog tej yam tsis muaj laij thawj.
- Cov lus iab liam no raug teev rau ib co ntaub ntawv uas ib lub khw lij coj ntawm Sydney sau thiab tau muab xa mus rau pej kum haiv lub chaw hais plaub (International Criminal Court-ICC).
- Albanese tau hais tias 'cov ntaub ntawv ntawd tsuas teev txog tej xov xwm 'yuam kev xwb'.
Thawj pwm tsav Anthony Albanese tau tsis kub siab txog pej kum haiv lub chaw hais plaub cov lus liam tias muaj ib txhia nom ntawm ntawm Australia lub tsev tsoom fwv teb chaws pab cov tsov rog Hamas-Israel cov kev ua txhaum rau lub caij muaj tsov rog.
Albanese tau qhia tias lub tuam txhab khw lij choj Birchgrove Legal yog tus sau phau ntawv uas muaj 92 nplooj, thiab yog ib phau uas tsis muaj laij thawj dab tsi.
Lub tuam txhab no daim ntawv xov xwm uas tau tshaj tawm tau hais tias tus tsoom fwv, suav thawj pwm tsav, Penny Wong uas yog Australia tus nom txawv teb chaws thiab Richard Marles uas yog tus nom tswj dej num tiv thaiv teb chaws thiab Peter Dutton uas yog tus coj lwm pab nom 'tau txhawb nqa phab hauj lwm nom tswv, tej lus tawm tswv yim, tub rog, thiab tej khoom cuab yeej cuab tam, thiab pab raws li qhov tsim nyog' rau Israel tej kev ua txhaum cai rau lub caij muaj tsov rog.
Albanese tau qhia rau tej neeg nthuav xov xwm ntawm Melbourne rau lub caij tias "yeej paub tseeb tias yob ib co ntaub ntawv tsis muaj laij thawj dab tsi. kuv tsis x av tias tej xov xwm cuav yuav muaj peev xwm siv tau coj los ua tej tswv yim tsim tau kev thaj yeeb, thiab yeej muaj ntau yam xov xwm qhia txog tej xwm txheej uas tab tom tshwm sim yuam kev.''
Albanese tau hais tias Australia lub sam thiaj rau cov kev tsis haum xeeb ntawm cheeb tsam Middle East tseem ua li qub ua ntuv zus li tej lus tau koom hais nrog New Zealand thiab Canada rau lub ob hlis ntuj, uas tau muaj cov kev nqua hu kom xaus tsov rog ntawm Gaza.
"Yog tias nej rov qab mus txheeb txog tej tswv yim uas tau txais kev txhawb nqa los ntawm peb cov pab nom tseem ceeb rau lub 10 hli ntuj, ces yeej qhia tseeb lawm tias txhua tus neeg tsis muaj kev txhaum txoj sia yeej tseem ceeb, tsis hais tej neeg ntawd yuav yog neeg Israeli los yog neeg Palestinian li.''
Sheryn Omeri uas yog tus kws lij choj uas sab laj nrog ib pab kws lij choj uas sau daim ntawv ntawd tau qhia rau ABC TV tias tsoom fwv ''muaj feem cuam tshuam'' nrog tej kev ua txhaum cai rau lub caij muaj tsov rog ntawm cheeb tsam Middle East.
Raws li Omeri tau hais ces "Txij lub 10 hli ntuj txog tam sim no, ces zoo li yeej tsis tshuaj muaj cov kev nqua hu kom cheem Israel thiab ua kom nws tso tseg tej hauj lwm uas pej kum haiv lub tsev hais plaub (International Court of Justic-ICJ) txheeb tau rau tim 26 lub 1 hlis ntuj tias tej zaum yuav yog ib cov kev ua xhaum cai.''
Yog li ces ib tug twg yeej muaj peev xwm xa ntawv rau ICC liam ib co xwm txheej twg tias yog cov kev ua txhaum cai rau lub caij muaj tsov rog. Thiab ICC mam li mus txheeb tej neeg ntiag tug tej lus iab liam ntawd.
Raws li zeskais Emily Crawford uas yog ib tug qhia txog cai lij choj ntawm University of Sydney tau qhia rau SBS News ces tej teb chaws thiaj muaj peev xwm 'xa ntaub ntawv' rau lub chaw hais plaub no tias ib lub teb chaws twg ua txhawm, ces ICC mam li los txheeb.
Nws tau hais tias ''ntshe tej zaum yuav muaj cib fim ntau dua'' uas ICC yuav tsis los txheeb lub tuam txhab Birchgrove Legal tej xov xwm, thiab tsuas los txheeb me ntsis xwb.
Nws tau hais tias cov kev qhia txog tej xov xwm no ''yog ib txoj xub ke los qhia kiag kom meej tseeb rau zej tsoom paub tias muaj cov xwm txheej tua neeg tsheej pab kom tus noob thiab tej tsoom fwv ntawm cov teb chaws vam meej muaj feem koom rau tej xwm txheej tab tom tshwm sim.''
"Thiaj yog tej yam tseem ceeb raws li tej laj fai kum xeeb los yog tej cai los hais rau peb tej coj tias txawm tias nej tau muaj feem cuam tshuam nrog tej xwm txheej no thiab peb tsis muaj peev xwm yuav qhia tau qhov tseeb tias ib tug neeg ntiag tug twg ho ua txhaum loj npaum li cas los, peb yeej muaj peev xwm qhia tau raws li tej kev xav ntawm tej hauj lwm lij choj yog li ntawd thiaj tsim nyog nej tso tseg tau hauj lwm ntawd.''
Birchgrove Legal tau hais tias ''yeej muaj zej tsoom tej koom haum thiab tej pej xeem ntawm tej teb chaws vam meej yuav ua tib zoo xyuas kom lawv tej tsoom fwv tsis txhob pab pej kum haiv cov kev ua txhaum cai no''.
Ces tsab ntawv no thiaj tau nqua hu kom lub tsev hais plaub no mus txheeb tsoom hwv cov kev txiav txim siab , thiab tau liam tias nws yog tus pab sab seem tub rog rau Israel.
Juliette McIntyre uas yog ib tub zeskais qhia xog pej kum haiv tej cai lij choj ntawm tsev kawm qib siab University of South Australia tau qhia rau SBS News tias cov lus iab liam no tau liam tias tsoom fwv tau pab thiab txhawb kom lwm tus ua txhaum uas yeej txawv cov kev ua ib co kev txhaum ncaj qha.
"Yeej tseem yog ib co kev ua txhaum, tab sis tsuas yog ib co uas yuav tsis maj txheeb kom sai tias tej zaum yog ib cov kev ua txhaum cai tiag ... ces ntshe tej zaum'' xyov ICC puas yuav txheeb tej ntaub ntawv no ua ntej nws yuav txheeb 5 lub teb chaws tej lus tawm tsam nrog Israel tso.
Lub 11 hlis ntuj ces cov teb chaws li South Africa, Bangladesh, Bolivia, Comoros thiab Djibouti kuj tau hais kom pej kum haiv lub tsev hais plaub mus tshuaj ntsuam seb puas yog muaj cov kev ua txhaum ntawm neeg Palestinian tej nrim av rau lub caij uas Israel tawm tsam nrog Hamas cov kev mus tua nws rau hnub tim 7 lub 10 hli ntuj.
Tej tub rog Hamas tau tua neeg txog li ntawm 1,160 tus thiab tau muab 250 tus neeg txhom raws li Israel tej xov xwm tau coj los qhia.
Israel cov kev siv tub rog nruab ntug thiab nruab teb mus tawm tsam pauj tau ua rau muaj neeg tshaj 30,000 tus raug tua tuag lawm raws li Gaza lub tuam chav tswj kev noj qab haus huv hais.
McIntyre tau hais tias tej zaum tej xov xwm no kuj yuav yog ib lub cim muaj fwj chim heev thiab.
Nws tau hais tias "Kuv xav tias tsab ntawv no yuav ua rau muaj cov kev tsub nias los ntawm tej nom tswv no rau tus tsoom fwv no. Qhov yuav tshwm sim ces yog yuav coj tej xov xwm ntau heev los qhia uas tej zaum thaum xub zej tsoom tsis paub txog, piv txwv li, tej xov xwm qhia ntxaws txog ntau yam twj tsov rog pab rau Israel.''
Lub 1 hlis ntuj ces International Court of Justice uas yog tus los daws cov kev tsis haum xeeb ntawm ntau lub teb chaws nrog Israel tau kom thiaj tiv thaiv tau kom tsis txhob muaj tej xwm txheej tua neeg tuag tsheej pab kom tus noob rau lub caij nws tseem ua tsov rog ntawm Gaza.
Tab sis lub tsev hais plaub no tseem tsis tau qhia meej tseeb tias seb puas yog los tsis yog Israel ua neeg tsheej pab kom tus noob ntawm Gaza li cas — thiab tej txheej txheem ntawd mas ntshe tseem yuav tau siv sij hawm ntau xyoo los txheeb.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
