Tab tom muaj khaub zeeg cua muaj ceem yuav ua rau dej nyab FN Queensland

Tau muaj kev kwv yees tias yuav muaj ib lub khaub zeeg cua chaw sov uas yuav ua rau muaj cua hlob thiab los nag hlob heev rau sab qaum teb xeev Queensland, tom qab tau ib hlis uas muaj huab cua phem tau los hla cheeb tsam no.

A tropical low in the Coral Sea is expected to develop into a cyclone which will be named Kirrily. Source: AAP / Dave Hunt

Ntsiab lus tseem ceeb:

• Sab qaum teb xeev Queensland tseem tab tom npaj tos lub khaub zeeg cua muaj zog txog zum 3 uas ''yuav ua rau raug kev puas tsuaj loj''.
• Yuav muaj lub khaub zeeg cua chaw sov Kirrily rau ntawm cov paj pob zeb hiav txwv rau hnub zwj Quag (Tuesday).
• Yuav ua rau muaj nag los hlob ntau tuaj ntxiv thiab dej nyab rau cheeb tsam no tom qab ntau liam tias uas twb muaj dej nyaj loj heev lawm.

Yuav muaj lub khaub zeeg cua Kirrily ntawm xeev Queensland tej ntuj hiav txwv rau lub caij uas tej zej zog rau sab qab teb raws tej ciam teb tseem npaj rau lub caij muaj ntuj los nag hlob.

Tom qab tau ntau hnub lawm, ces kuj muaj tej cua tsis tshua muaj ceem pes tsawg tab sis yuav ua rau muaj xov nroo xob laim thiab los nag hlob rau sab hnub tuaj ntawm xeev Queensland thiab yuav ras los ua lub khaub zeeg cua chaw sov rau yav lig hnub zwj Quag (Tuesday tim 23.01.2024).

Ces tej zaum thiaj yuav "raug kev phom sij loj tau", thiab raws li tau kwv yees lawm ces lub khaub zeeg cua no yuav ras los ua lub khaub zeeg cua muaj ceem txog theem peb ua ntej yuav los hla Queensland tej ntug hiav txwv.

Raws li Miriam Bradbury uas yog tus neeg ntsuam thiab kwv yees huab cua tau hais ces "Tej zaum yuav ua rau muaj cua hlob muaj ceem txog 120km/h, yuav ua rau muaj ntuj los nag hlob thiab yuav ua rau muaj dej nyab,''

"Thiab tej zaum kuj yuav ua rau ntoo nkoj cag, ncej hluav taws xob vau, los yog ua rau vaj tse puas tsuaj, raug muab tej kev kaw thiab siv tsis tau tej kev thiab tej zaum ntshe yuav ua rau tsis tau hluav taws xob siv."

Far north Queensland ces ntseem nyuam nqhuav ntxeem dhau ntawm lub khaub zeeg cua chaw sov Jasper muaj zog txog theem ob thaum lub 12 hlis ntuj uas ua rau muaj dej nyab loj thaum lub khaub zeeg cua no los hla lub xeev no cov ntuj hiav txwv.

Thiab yeej tau kwv yees lawm tias tej zaum lub khaub zeeg cua tshiab no yuav ua rau muaj av toj pob rau hnub zwj Teeb (Thursday) sab qab teb ntawm Townsville, tab sis tej neeg zos ntawm Innisfail mus txog rau lub zos Airlie Beach yeej raug ceeb toom kom ceev faj thiab.

Shane Chelepy uas yog tus neeg npaj tej xwm txheej ntawm lub xeev no tau hais tias "Kav tsij sam roj kom puv rau koj lub tsheb, ua zoo xyuas kom npaj tej battery sam koj lub xov tooj, vim raws li peb pom ntau cov xwm txheej zoo li no uas los hla lub xeev no tej ntug hiav txwv lawm ces, tej zaum yeej yuav yog li ntawm peb hnub mas thiaj muaj cov emergency services pab tau yus."

Tab sis txog hnub zwj Kuab (Friday) ces lub khaub zeeg cua no kuj ntaug lawm, txawm li cas los kuj tseem ua rau muaj ntuj los nag hlob rau sab hauv lub xeev no thiab yuav los nag rau sab qab teb hnub tuaj ntawm xeev Queensland rau ob hnub so.

Bradbury tau hais tias "Txawm tias los nag ntaug me ntsis lawm los tej zaum kuj yuav ua rau muaj dej nyab tom qab lub khaub zeeg cua no txav rau hauv lub xeev no thiab ntaug lawm."

Thiab vim tias hnub zwj Kuab (Friday tim 26 January) kuj yog hnub so (hnub Australia Day) thiab, ces Shane Chelepy uas yog tus neeg npaj tej xwm txheej ntawm lub xeev no thiaj tau nqua hu kom tej neeg uas tseem npaj yuav mus rau ib qho twg rau lub caij so ntau hnub no yuav tsum soj nraim kom paub txog tej kev ceeb toom huab cua tshiab.

Nws tau hais tias "Peb yeej paub tias yuav muaj neeg coob heev siv peb tej kev thiab mus so rau ntawm tej chaw pw hmo ntau thaj chaw,''

"Thiaj yog tej yam tseem ceeb heev ... uas yog tias koj ho mus rau ntawm thaj chaw Innisfail mus txog ntua rau Sunshine Coast thiab Southeast Queensland ces yuav tsum ua tib zoo xyuas kom muaj peev xwm sib cuag tau nrog lwm tus."

Steven Miles uas yog Queensland tus hau xeev tau ceeb toom tias ntshe tseem yuav siv sij hawm ntau xyoo mas thiaj yuav rov qab kho tau tej vaj tse uas raug nag xob nag cua thiab raug dej nyab puas tshuaj ntawm lub xeev no sab qab teb hnub tuaj. Source: AAP / Jono Searle

Hau xeev Steven Miles tau hais tias qhov txaus txhawj xeeb tshaj plaws mas txhawj txog tej neeg ua hauj lwm yeem thaj emergency services uas tau mus pab cawm tej neeg tom qab lub khaub zeeg cua Jasper uas ua rau muaj cua daj cua dub los hla sab qab teb hnub tuaj ntawm lub xeev no rau lub caij Christmas dhau los.

Nws tau hais tias "Lawv yeej tseem pab ob co xwm txheej tau xub tshwm sim dhau los no, yog li ntawd peb yuav ua tib zoo xyuas kom lawv tau txais kev pab cuam thiab tau tej peev txheej lawv xav tau coj los siv."

Lub khaub zeeg cua Anggrek thiab tej xwm txheej dej nyab ntawm xeev Northern Territory

Lub khaub zeeg cua Anggrek muaj ceem txog theem ib twg los rau Australia tej dej lawm.

Ua muaj rau sab hnub poob ntawm lub pov txwv Cocos Islands txog li ntawm 570km ntawm xeev Western Australia (WA) tej ntuj hiav txwv.

Thiab cia siab tias lub khaub zeeg cua Anggrek yuav txawv tawm ntawm Australia tej dej rau hnub zwj Quag (Tuesday).

Xeev Northern Territory kuj tseem nyuam qhuav yuav rov qab pib ua neej li qub xwb tom qab ntxeem dhau tej xwm txheej ntuj los nag hlob, dej nyab loj, raug muab tej kev kaw thiab yuav tau tshem tej neeg tawm rau cheeb tsam Kimberly ntawm xeev WA tom qab muaj khaub zeeg cua ua rau muaj ntuj los nag hlob.

Ces ntshe thiaj yuav ua rau muaj dej phwj mus nyab ntau qhov rau lub limtiam no tom qab tau muaj ntuj los nag hlob ua rau dej noo ntub thawm av tob txog li 200mm.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.