Khwv tau nyiaj npaum li cas thiaj nplua nuj?

Raws li tau muaj ib cov kev tshawb fawb tshiab qhia ces muaj qee phaum neeg hasi tias tsim nyog lawv khwv tau ntau txheeb dollars ntxiv tsaj tej lawv khwv tau ib xyoos dhau los mas thiaj ua rau lawv mloog tau tias lawv muaj nyiaj nplua nuj — tab sis lwm phaum neeg ces txawm khwv tau tsawg dua los yeej mloog tau tias muaj nyiaj lawm.

There's a generational divide when it comes to the amount of money a person needs to have to feel rich. Source: Getty, iStockphoto / enjoynz

Ib tug neeg Australia uas neej xws luag yuav tsum khwv tau nyiaj theem nrab li ntawm $346,000 mas thiaj mloog tau tias nws nplua nuj — uas yog yuav tsum khwv kom tau ntau tshaj $10,000 ib xyoos dhau los.

Raws li tej xov xwm tshiab tau los ntawm lub koom haum Australian Bureau of Statistics (ABS) qhia ces tej nyiaj ntawd ces yog tej uas khwv tau ntau tshaj 5 npaug ntawm Australia tej neeg khwv tau nyiaj nrab ib xyoos twg $67,600. Xyoo 2023 ces haiv neeg no ib nrab neeg ua hauj lwm yeej khwv tau nyiaj tsawg tshaj tej nyiaj no tab sis kuj muaj ib nrab yog cov khwv tau ntau dua thiab.

Lub koom haum Finder uas yog ib lub vas sab uas sib piv ntau yam kev siv nyiaj txiaj tau ua ib cov kev teeb txheeb nrog tej neeg tshaj 1,000 tus ces kuj txheeb tau tias tej neeg yuav tsum khwv khom tau nyiaj $345,819 ib xyoos twg mas thiaj mloog tau tias yus nplua nuj. Kuj tau muaj cov kev tshawb fawb no rau lub 11 hlis ntuj tsaib no, ces kuj txheeb tau tias tej neeg yuav tsum khwv kom tau nyiaj ntau tuaj ntxiv txog li $9,303 ntau dua rau tib lo lus nug uas tau nug tej neeg xyoo 2022.

Ces thiaj tau muaj tej xov xwm no rau xyoo no thaum uas tej kab theem nyiaj poob nqe ib nyuag qes zog, tab sis yeej tseem siab tshaj tej kab theem nyiaj hauj lwm uas tej neeg khwv tau thiab. Thiab raws li ABS tej ntawv cej luam tsis ntev los no txheeb tau ces txawm tias tej neeg khwv tau nyiaj hauj lwm ntau ntxiv tuaj txog 4 feem pua txog rau lub 9 hlis ntuj los tus kab theem nyiaj poob nqe yeej nce txog 5.4 feem pua thiab — ces thiaj nws thiaj hais tias neeg Australia tseem khwv tau nyiaj tiag tsawg dua 1.4 feem pua thiab.

Finder cov kev teeb txheeb no tau txheeb tau tias yeej muaj cov kev khwv tau nyiaj ib xyoos twg sib txawv ntawm cov phaum neeg uas ua rau lawv mloog tau tias lawv nplua nuj thiab — thiab tsis yog txhua leej txhua tus yuav muaj kev cia siab tias lawv khwv tau nyiaj ntau ntxiv.

Yog li cov phaum neeg millennials (yug txij xyoo 1981 txog 1995) thiab phaum neeg gen X-ers (yug txij xyoo 1966 txog 1980) tau hais tias lawv yuav tsum khwv kom tau nyiaj txog li $418,325 thiab $307,257 sib law liag mas thiaj ua rau lawv mloog tau tias lawv nplua nuj (muaj nyiaj). Thiab yog xam rau tej neeg millennials lawm ces lawv yuav tsum khwv kom tau nyiaj ntau tshaj $72,540 ntxiv thiab phaum neeg gen X-ers yuav tsum khwv khom tau nyiaj ntau tshaj $12,552 tej khwv tau tsaib ub.

Tab sis tej nyiaj uas phaum neeg zoomers (yug lub caij 1996 txog 2010) thiab phaum neeg baby boomers (yug txij xyoo 1946 txog 1965) yeej tau qhia tias tej nyiaj uas khwv tau ib xyoos twg uas ua rau lawv mloog tau tias lawv nplua nuj kuj tau nqes tsawg lawm. Ces thiaj tsuas ua rau phaum neeg zoomers tsuas khwv tau ib xyoos twg txog $392,077 (uas tau nqes ntawm $428,474), thiab phaum neeg baby boomers ces tsuas khwv tau $273,812 uas tau nqes ntawm $306,505 ib xyoos twg lawm.

Rebecca Pike uas yog lub koom haum Finder tus kws paub txog nyiaj txiaj zoo thiaj tau hais tias txawm pom tias yeej yog ib co nyiaj ntau heev los tej kev khwv tau nyiaj tsawg no ''kuj yog tej yam ua rau yus ceeb thiab'' thiab tej zaum kuj yog cov kev xav sib txawv rau cov kev nplua nuj ntawm cov phaum neeg sib txawv xwb.

Pike tau hais tias "Txawm tias peb yeej tau nce kab theem paj ob peb zaug ntxiv rau 1 xyoos dhau los no, los tus kab theem nyiaj poob nqe yeej tab tom nqes lawm thiab ces thiaj ua rau ib co phaum neeg twg thiaj ib nyuag tso siab zog lawm.''

"Cov phaum neeg boomers thiab phaum neeg gen Z (zoomers) ces yeej tsis tshua nyuaj siab txog nyiaj txiaj tib yam li phaum neeg gen X thiab Y (millenials), thiab tej zaum kuj yog tseem muaj cov phaum neeg no tseem nrog lawv niam lawv txiv nyob los sis yog sib koom ntiav tsev nyob kom tau them nqe ntiav tsev pheej yig zog thiab sib pab them ntau yam nqe.''

Lub txhab nyiaj Commonwealth Bank (CBA) tsab ntawv cej luam tawm tswv yim txog tej nqe siv ua lub neej (Cost of Living Insight report) uas tsis ntev los no uas tau coj los nthuav tawm rau lub 11 hlis ntuj tsaib no yeej tau qhia itas Australia tej teeb meem nuj nqes siv ua lub neej yeej tau ua rau muaj teeb meem rau ntau phaum neeg sib txawv.

Ces cov kev tshuaj ntsuam rau lub sij hawm 3 hlis txog rau lub 9 hlis ntuj thaum tus kab theem nyiaj poob nqe tseem nyob ntawm 5.4 feem pua tau txheeb tau tias yog piv rau tej nyiaj khwv tau lawm ces tsuas yog phaum neeg baby boomers thiaj yog tib phaum neeg uas tau nyiaj siv ntau tuaj ntxiv xwb. Thiab kuj txheeb tau tias tau muaj tej neeg hnoob nyoog 75 xyoos los yog siab tshaj ntawd yog cov uas muaj nyiaj siv tuaj ntau tshaj plaws txog li ntawm 10 feem pua lawm.

Hos phaum neeg uas muaj nyiaj siv tsawg tshaj plaws ces yog cov neeg muaj hnoob nyoog txij 25 txog 29 xyoo uas ua rau lawv muaj nyiaj siv tsawg txog li ntawm 6 feem pua.

Source: Supplied / Commonwealth Bank | CommBank iQ Cost of Living Insights Report, November 2023.

"Peb thiaj tab tom pom tias tej neeg yuav khoom siv uas muaj hnoob nyoog 20 tawm xyoo ntawd tau tsis tshua siv nyiaj lawm tab sis yeej tseem siv nyiaj rau tej pab kom lawv ua tau tej yam lawv xav ua,'' raws li Wade Tubman uas yog tus coj Commbank IQ cov hauj lwm laj lim tswv yim zoo thiab cov kev tshuaj ntsuam hais lub 11 hlis ntuj tsaib no.

Thiab nws hais ntxiv tias ''Peb kuj tau pom ntxiv tias tej neeg hluas zog yeej tau muab tej nyiaj lawv siv coj mus yuav khaub ncaws thiab yuav tej twj siv hauv tsev coj mus siv saib yeeb yaj kiab thiab yuav tej yuaj (pib-ticket) mus koom koom txoos paj nruab thiab kev sib tw.''

Thiab yog tham txog tej nyiaj $345,819 uas khwv tau ntawd mas thiaj ua rau ib tug neeg Australia twg mloog tau tias lawv muaj nyiaj nplua nuj ntawd ces Pike tau hais tias ''Kom nco tias tsuas muaj cov feem pua tsawg tsawg ntawm tej pej xeem thiaj khwv tau nyiaj ze txog li $346,000 xwb - thiab tej neeg Australia feem coob ces tsuas khwv tau nyiaj hli ib xyoos twg ze txog li $70,000 xwb.

“Txawm li ntawd los kuj pom tau tias yog tej yam nyuaj kawg nkaus rau coob leej ntau tus rau lub caij ntau xyoo no thiab, uas tau ua rau tej cuab yig yeej tsis tshua muaj nyiaj siv rau lawv tsev neeg lawm.''

“Vim txhua yam yeej kim tuaj ntxiv lawm tsis hais tej nqe tsev uas tab tom kim tuaj ntxiv los yog tej nqe hluav taws xob kim, ces thiaj ua rau ib tug neeg Australia twg mloog tau tias yuav tau khwv kom tau nyiaj ntau tshaj qub ntxiv mas thiaj mloog tau tias yus muaj nyiaj nplua nuj.''

Raws li lub koom haum Finder tej xov xwm Consumer Sentiment Tracker qhia ces ib lub hlis twg tej neeg Australia yeej txuag tau nyiaj theem nrab txog li ntawm $705. Phaum neeg Millenials ces yog cov txuag tau nyiaj ntau tshaj plaws ($789), ntxiv ntawd yog phaum neeg zoomers ($751), phaum neeg gen X-ers ces txuag tau $742, thiab phaum neeg baby boomers uas so tsis ua hauj lwm feem coob lawm ces yeej txuag tau nyiaj ib hlis twg txog li $515.

Ces tej xov xwm no thiaj tau txheeb tau tias muaj phaum neeg gen Z (zoomers) ntau tshaj 60 feem pua muaj peev xwm siv tej nyiaj lawv txuag tau rau lub sij hawm li 1 lub hli los yog tsawg dua ntawd. Thiab muaj phaum neeg millennials yuav laug txog li ib nrab, 1 feem 3 ntawm phaum neeg gen X-ers thiab 1 feem 5 ntawm phaum neeg baby boomers ces yeej ntsib tej xwm txheej sib xws li ntawd thiab.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.