Ram ngeitu, Australia ram a rak hlum hmasa bik mi hna miphun caah phunghrampi thlennak ding Voice to Parliament Referendum thimfung thlaknak ni le caan cu thanh a si cang. A ra lai ding mi Oct 14 ah, thimfung thlaknak cu tuah a si cang lai.
Australia mipi tam deuh caah a tutan referendum thimfung thlaknak cu an voikhatnak bik a si caah a lung a fiang lo mi le biahal awk a ngei mi tampi an um hna.
Voice referendum ah thimfung thlak lo khawh a si ma?
Kum 20 leng hnu ah a voikhatnak bik referendum thimfung thlaknak tuah a si than cang lai. Australia ram mi sinak a ngei mi le kum 18 a tling cang mi kha thimfung an thlak hrimhrim a hau, upadi ning tein min an pek i thimfung an thlak a herh tiin thimfung thlaknak a tawlreltu Tom Rogers nih a chim.
Thimfung na thlak lo ahcun, Australian Electoral Commission (AEC) lei nih an in pehtlaih lai. Thimfung thlak cu phungbuar a si caah AEC nih dan an in tat khawh, thimfung an thlak lo nak a ruang zong an in hal fawn lai.
Thimfung thlak ni a phak tikah sianginn, biakinn, le zapi tonpumhnak hmun hna ah thimfung thlaknak tuah an si lai. Thimfung thlak khawhnak hmun hna cu AEC website ah zoh le kawl khawh an si lai. Tuan ah thimfung thlak chung a duh mi hna caah tuan ah thimfung thlaknak zong onh a si te lai.
“Thimfung thlaknak catlap cu chuah a si rih lo, piangfiang in thanh chung awk a tha rih lo” tiin Roger nih a chim.
“Asinain, thimfung thlakning cu a theihfian a fawi tuk mi a si. Thimfung thlaknak ding caah min na pek mi siseh, na fian lo mi a um sual ahcun AEC website ah zoh khawh a si, na pumpak konglam ah tlamtling tein AEC nih a ngeih ding kha a biapi ngaingai.”
Thimfung a thla kho ding mi chungin thimfung thla dingah min a pe mi hi an karh taktak, zatuak 97.5% nih min an i pe cang tiin Roger nih a chim chap.
“Atu bantuk rampi huap in tuah mi referendum hi ram caah le mipi caah a biapi taktak mi a si, thimfung thla dingin min na pek lo ahcun thimfung thimfung na thla kho lai lo.”
“Referendum i a rian hi zeidah a si timi theihfian hi a biapi taktak – kum 24 hnu ah tuah than a si tikah mi tampi caah thil thar a si kho i, hlathlainak an tuah zong a hau kho.”
Tuan ah thimfung thlak chungnak cu zeitik dah an thok lai?
Ramkulh cheukhat hna NT, Tas, Vic le Wa ah cun thimfung thlak chungnak cu Oct 2 ah an thok lai. NSW, SA, ACT le Queensland cu public holiday ruangah Oct 3 ah an thok te lai.
Referendum thimfung thlaknak catlap phit ning le cozah thimnak ca i thimfung thlaknak catlap ning cu a khat lo nain thimfung thlaknak an tawlrelning cu a khat ko.
Atutan thimfung thlaknak ah thimfung a thla kho ding mi hi 17.5 millions hrawng an si lai tiah zumh a si.
(Postal) Cakuat hmangin thimfung thlaknak cu zeitik dah an thok lai?
Cakuat nak in thimfung thlaknak ding cu tawlrel a si rih lo.
Thimfung thlaknak catlap chuah a si hnu lawngah tawlrel a si te lai.
Cakuat nak hmangin thimfung thlaknak cu Oct 11 zaanlei 6pm khar a si lai.
Thimfung thla dingin min i pekning le pumpak konglam theihternak tuahning
Australia ram mi sinak a ngei mi le kum 18 a tling cang mi na si ahcun thimfung thla dingin min na pek hrimhrim a hau. AEC nih na pumpak konglam an ngeih mi a hman le hman lo AEC website ah na zoh khawh.
Referendum thimfung thlaknak ni le caan kan ngeih deuh duahmah cang caah atu lio na umnak inn address kha AEC nih an ngeih mi he a khah a hau caah inn na thial a si ahcun theihternak ngei hna.
Na pumpak konglam thlen le theihternak tuah na duh ahcun AEC website ah tuah khawh a si.
Nangmah kha aho na si ti hngalhnak ding le fehternak ding caah driving licence, Australian Passport number, Medicare number, Australian Citizenship number an in hal te lai.
2023 Voice to Parliament referendum kong an chim rel mi tam deuh in theih fian na duh ahcun NITV ah zoh le ngeih khawh an si. Lai holh tein ngeih le rel na duh ahcun SBS Radio Hakha Chin prawkrem ah rel le ngaih khawh a si.
