Kawlrammi a thongthong nih kan hruaitu pawl rak kan thlah piak uh tiin a thla leng an au hnuah Suu Kyi cu sual phunhnih an phawt caah biaceihnak zungah an chuahpi.
Suu Kyi cu Feb 1 ah an tlei hnu mipi hmaiah a chuak lang lo. Biaceih dingah zungah chuahpi a si lio zongah lam cungah chuak in duhlonak a langhtermi pawl cu dai loin duhlonak an langhter.
Zarhpini ah khan kawlram pumpi huapin ralkap le palik nih mibu thencheunak caah tiin meithal an hman i minung 18 tluk an nunnak a liam tiin United Nations nih a phuan.
Cawn nikhat zaanlei sangah MRTV muicawl thawngzamhtu nih minung 1300 leng tleih an si i minung pa hleikhat tluk an nunnak a liam tiin thawng a thanh.
Anti-military coup demonstrators have taken to the streets against the military coup. Source: Sipa USA Santosh Krl / SOPA Images/Sipa U
Kum 75 upa a si cangmi Suu Kyi cu sual phunhnih phawt a si. Pakhat cu midang he i chawnhnak seh phung loin na hman an ti cun pakhat cu COVID-19 phihkhamnak tuah lioah ram pumpi thimnak nan tuah tiah sual phawt a si.
Suu Kyi i a sihni a simi Khin Maung Zaw nih Suu Kyi cu pehtlaihnak phung a buarmi le mipi runvennak lei he pehtlaiin phung na buar tiin sual an phawt tiah a chim.
"Atu lioah hin cun zei bantuk sualphawtnak dang dah Suu Kyi nih a ton rih lai ti kan chim kho lo" tiin thawnglatu sinah a chim.
"Atu lio cu kawlram chungah zei poah a cang kho."
Suu Kyi cu Kawlram khualipi a si mi Naypidaw ah inn-thong ah thlak a si. Naypidaw cu ralkap chan lioah an mah nih khualipi an rak ser chawmmi khua a rak si.
Kumhra dengmang zauk phungin hruai a si hnu ah ralkap nih nawlngeihnak an lak than hi a si. Aluancia November thla thimnak ah khan Suu Kyi nih hruaimi National League for Democracy phu nih fak taktak in teinak an hmu. Asinain, a dikfel lomi thimnak a si an ti caah nawlngeihnak an laknak cu a si tiah an mah ralkap lei nih an chim.
Suu Kyi tangah rian a tuan liomi pakhat upadi sertu a simi nih kawl ralkap hi ralhrang an si tiin a phozar hna.
"Kawlram chung pi cu ralthuknak hmun ah an ser, lam cungah ralhrang bangin mipi cu fahnak an pek hna" tiin upadi sertu phu ah telmi nih a chim.
'Chan Tha lo'
A thla nawn in minung a thong leng cu lamcungah chuak in ralkap uknak kan duh lo tiah duhlonak an langhter.
Ralkap nih duhlonak a langhtermi mibu hna cu an thencheu hna, mibu thencheunak ah meithahnak mawtaw an hman, mit khut sii an hman cun lan hnu zarh chungah mi velh le khaihriat meithal in mibu cu an kah hna.
Kan hnu zarhpi cu thisen hi lam cungah a luang, duhlonak a langhtermi chungin an tukvelhmi hna thi le hnai he an khat.
"Hmaisuang in ka dirnak aruang cu atu bantuk chan tha lo ah kafa a than ve lonak hnga caah a si" tiin sianghnakchia pakhat nih AFP sinah a chim. Cun fapa pakhat a ngei i thla hra te lawng a si rih tiin a chim chap.
AFP nih zarhpini ah tukfelhnak in a nunnak a liammi hi minung 11 an si tiah a thanh. Asinain a nunnak a liammi hi nak hmanh in an tam kho men tiah ruah a si. Cawnnikhat ni ah cun a nunnak a liammi thawng zei hmanh theih a si rih lo.
Ralkap nih uknak nawlngeihnak an lak ni Feb 1 in nihin ni tiangah a nunnak a liammi hi an dih lak ah minung 30 tluk an si lai tiah Assistance Association for Political Prisoners nih an chim.
Anti-military coup protesters stand in the middle of tear gas smoke during a demonstration against the military coup. Source: AAP
Yangon hmun cheukhat ah mitkhut sii le sivai tha lo cu mibu thencheunak caah ralkap le palik nih an hman.
March 1 ah ralkap le palik i bawm in hakha mino an thencheu hna. Chin Ramkulh khualipi Hakha khua zongah ralkap le palik nih mibu thencheunak ah meithal voikua an puah. Cun Meithahnak mawtaw in mibu hna cu an kah hna. Cu lawng siloin ralkap nih mitkhaat sii an hman.
Hakha khuachung lamton le Pyidawta ah hakha mino an tlaih hna. Hakha mino an tlaihmi hna an dihlak ah an dihlak ah minung 23 an si. An tlaihmi hna minung 23 chungah nu 8 an i tel i pa 15 an si.
Tuchun March 2 ah minung 19 an thlah hna lai tiah thawng thei a si.
Like this story? Here's where else you can find SBS News content and follow us:
SBS also publishes news in 68 languages online and on radio. Find your language at .
