Tuzarh dongh, cawnniruk ni hi thimfung thlak a si cang lai. Australia ram a rak tlatu miphun hna caah phunghram remhnak ding thimfung thlaknak cu ramkulh le ramthen kip ah tuah a si lai.
Thimfung thlak ni ah zeidah tuah awk a si ti kan fian lo sual ahcun a tang lei I fianter ka rak tial mi hi pehzulh in rak rel ve.
Zeitindah thimfung kan thlak lai?
Thimfung thlaknak ding hmun le hma cu hi ka ah zoh khawh an si:
Zingka suimilam 8am in thimfung thlak hram thok a si lai, cun zaanlei suimilam 6pm ah khar a si lai.
Thimfung thlaknak hmun na phak tikah, thimfung thlaknak catlap pek na si lai.
Thimfung thlaknak catlap cungah a tial mi cu “Phunghram remh ding mi: Aboriginal le Torres Strait Islander miphun hna cu Australia ram a rak tla hmasa mi le ram ngeitu an si tiin hngalhpinak tuah le phunghram remh ding. Cun cozah riantuannak chungah, ram mi hmasa/ ram ngeitu miphun aiawhtu ding phu dirh/ser.”
Phunghram remh dingin an chuahpi mi cu na lung a tling ma? Tiin biahalnak a tial lai.
Remh dingah na lung a tlin ahcun catlap cungah Yes tiin fiang tein na tial lai, cun phunghram remh dingah na lung a tlin lo ahcu No na tial pek lai.
Thimfung thlaknak cungah Yes le No siloin thil dangdang na tial a si ahcun rel piak a si lai lo. Asinain, Yes ti tial lo zongah tick (zah) zong kan cohlan ko lai tiin Australian Electoral Commission nih thawng an thanh.
Thimfung thlaknak ah duhthim khawh mi
Thimfung thlak ni a phak hlan ah na duh ahcun Post cakuatnak in thlak chung khawh a si. Cun ramdang ah khual a tlawng mi na si ahcun na umnak ram in rak thlak khawh thiam a si. Tuan ah thimfung thlak chung a duh mi caah hmunhma an timhlamh cia mi zong an um hna.
Post cakuatnak in thimfung thlak na duh ahcun hika hi rak hmet. Tuan ah thimfung thlak chung a duh mi nih Oct 11 hlan ah min I pek a hau.
Hlawh a tlingmi referendum a si khawhnak ding caah zeidah a tlinh a hauh?
Referendum hlawh a tlin khawhnak ding caah cun ramkulh tam deuh nih an lungtlin a hauh pinah ram chung mipi tam deuh nih an hna tlak a hau.
ACT le Northern Territory ah a khua a sa mi hna nih thimfung an tlak mi cu ramchung mipi thimfung thlakmi sinah rel chih a si lai. Nain, ramkulh thimfung thlak mi ah rel chih an si lai lo.
To pass, a Referendum needs to achieve what is called a double majority. Source: Australian Electoral Commission.
Zeitik dah thimfung kan thlak mi a phichuak kan theih te lai?
AEC nih cawniruk zaanlei 6pm in ramkulh le ramthen vialte ah thimfung an thlak mi kha rel hram an thok lai. Thimfung an rel mi kha AEC website ah an langhter lai. Kan umnak hmun cio in rak zoh khawh a si lai. Thimfung an rel mi kha Sehkenh 90 dan in a phichuak an langhter lengmang lai.
Thimfung an rel mi hi zeitik set ah dah a lim lai ti cu chim khawh a si lo. Post cakuatnak in thimfung a thla mi zong an um cun online thimfung a thla mi zong an um tikah zeitik ah a phichuak kan theih lai ti cu chim chung a har.
