Phunghram Thlennak Ding Caah Thimfung Thlaknak Cu Atu In Thla Ruk Kar Ah A Si Cang Lai

Voice referendum, ram ngeitu hna an konglam Australia phunghram chungah khumh ding le khumh lo ding biachahnak a tuahtu ding thimfung thlaknak cu a ra lai dingmi thla hnih le thla ruk kar ah tuah hrimhrim a si cang lai.

The legislation on the Indigenous Voice referendum question has passed federal parliament, a development that moves the nation closer to a referendum date being determined. Source: AAP / Lukas Coch

Abiapi Mi

• Atu kum, kum dongh lei ah phunghram thlennak ding kong he pehtlaiin thimfung thla dingah Australia ram mi nuai 17 (million) nak tam deuh nih min an I pe cang.
• Ram ngeitu hna caah phunghram thlen a si lai ding mi nih mi cheukhat thinlung a doh ngaingai caah thimfung thlaknak ni le caan fawi tein khiah awk a tha lo.
• Thimfung thlaknak ni le thla cu nihin ni in a ra lai ding mi thla hnih in thla ruk kar ah a si a hau cang.

Voice to Parliament, ram ngeitu hna an konglam phunghram chungah khumh ding le khumh lo ding bia a khiaktu thimfung thlaknak cu phungning tein tuah a si lai. Cozah riantuantu hna nih ram ngeitu hna caah phunghram thlen dingin hna tlaknak an ngeih dih hnu ah mipi kut ah apa a si cang. Cucaah, atu in thla ruk chungah ram mi referendum hnatlaknak thimfung an thla lai.

Atu tan ah an chuahpi mi phunghram thlennak kong hi ram ngeitu hna he a pehtlai mi a si. Cozah riantuantu nih phung le upadi an ser thar mi nih ram ngeitu hna an dirhmun a hnursuan tikah ram ngeitu lei in chimrel khawhnak nawl a ngeih nak ding atu tan thimfung an thlak mi nih lai a rel lai.

Cozah riantuanak lei cu rian lim a si cang tiin phunghram thlen a duh mi phu lei nih thawng an thanh. Amah belte, phunghram thlennak dingaha hmual a ngei cem mi le hrampi a si mi ram mi hna thimfung thlaknak a tang rih. Cu a hrampi cu bongh a si le si lai lo cu thimfung thlak hnu lawngah theih khawh a si te lai tiah an chim chap.

Ram ngeitu hna aiawhtu, ramkhel rian a tuan mi Linda Burney nih Australia ram ngeitu hna an konglam phunghram chungah khumhnak ding caah kar khat kan I neih deuh cang tiin a chim.

“Ramkhel phu lei ceihkhannak cu nihin in a dih cang caah mipi sinah chimrel hram kan thok ve cang lai” tiin a chim chap.

Phunghram chungah ram ngeitu hna konglam kan khumh ahcun ram ngeitu hna caah thatnak a tam pi lai. Anmah, ramngeitu hna nih an ton mi harnak le thil dangdang kong kha an mah le dirhmun hoih tein cozah nih a tlangtlak hna lai. Cu lawng hlah, cozah hruainak chungah ram ngeitu hna he a pehtlai mi thil ruah le khan a si tikah, ram ngeitu hna chungin ruahnak petu kha cozah riantuannak chungah a tel ve cang lai.

Ram ngeitu hna caah phunghram thlennak hi a thatnak leiin a hmu mi an rak um ve bantuk in kamkhat leiin a rak zoh ve mi an rak um ve.

Phunghram thlennak ding an chuahpi mi hi ram ngeitu dawmh tlaitu ding le bawmtu si loin an caah rep bantuk thil a si a ti mi zong an um. Ram ngeitu hna caah phunghram thlen a si ko nain hmual a ngei lo mi thil a si tiin a cheu nih an chim rih fawn.

Ramhruaitu Anthony Albanese nih cun kan ram sersiam nak ding caah atutan hi caan tha bik a si tiin a chim ve.

Independent Senator Lidia Thorpe reacts after the passing of the Voice to Parliament in the Senate chamber at Parliament House. Source: AAP / Lukas Coch

“Bia hman a si mi cu, atu tan ah kan tuah mi thil hi nangmah pumpak caah thathnemnak zeihmanh a ngei lo ko men. Asinain, Australia ram chungah khua a sa ve mi le har ngai in a nung mi mi cheukhat caah thathnemnak a rak ngei kho mi a si. Mi dang cungah na tuah mi thil, nangmah cungah a tlun ve ding kha na ruah chan ve awk a si.”

Coalition lei lungtlin lonak

Phunghram thlenak kong an chuahpi mi cu Coalition ramkhel phu lei an lung a tling hrimhrim lo.

Atutan ah hin phunghram I thlen siseh tiin hnatlak a si ah cun zungzal a hmun ding mi a si cang. Australia phunghram chungah a hmun ding mi thil a si mi kong ah hin Labor lei nih thil a umtuning fiang deuh tein an langhter awk a si ko nain zeihmanh an chim khawh mi le tuah khawh mi a um lo tiin Liberal ramkhel phu lei in Michaelia Cash nih a chim.

“Mah thil kong hi cu ram mi hna nih an lungduh le an ruahnak an langhter a herh hrim hrim mi thil a si ko tiah kan ruah” tiin a chim chap.

“Phunghram thlennak hi a fiang lo mi thil a si, then cheunak in a khat, cun a zungzal thil a si. Cu pin ah phunghram thlennak hi zeitin dah rian a tuan lai timi na fian lo ahcun No tiin thimfung thlak kha tha cem tiah ka ruah” – Micahelia Cash.

Coalition ramkhel phu leiin Jacinta Price nih a chim ve rih mi cu thil dik lo, phung lei a pehtlai mi kan caah chiah mi rep bantuk a si tiin a chim ve.

Ram hruaitu nih kan caah kamh khawh mi thil zeihmanh a ngeih lo chinchap ah a fiang lo mi thil, phunghram thlennak ding catlap cungah min thut ding a kan fial mi hi cu a dih lo mi a si tiin a chim chap.

Greens Ramkhel phu lei lunglawmhpi nak

Greens ramkhel phu lei nih cun phunghram thlennak ding kong hi ram ngeitu hna caah lamsialtu tha bik si tiin an ruah ve.

“Cozah riantuanak lei cu rian lim a si cang. Phunghram thlen dingin a hna a tla mi phu nih biatak tein mipi sinah chimrelnak kan ngeih a herh. Zeitluk in dah atu tan ah an chuahpi mi referendum hi a biapit i ram ngeitu hna konglam phunghram chungah khumh a herhnak kha mipi thinlung lut lakin kan au ding a si tiin Dorinda Cox nih a chim.

Ms Burney, seated left, was present for the debate. Source: AAP / Lukas Coch

“Atu hi thil biapi a si mi a thoknak lawng a si. Ramngeitu hna nih an hmuh hnga awk a si mi covo kha an kut cungah kan chuan than a herh.”

Ramngeitu hna kut cungah an co hnga awk thil a si mi kan pek than hna lai tiin Senator Cox nih a chim cuahmah lio ah Senetor Lidia Thorpe nih a rak au-kanh lengmang.

Lidia Thorpe hi Greens ramkhel phu chungtel a rak si ko nain atu tan phunghram thlennak kong chuahpi a hun si le cangka in a chuak.

Senator Thorpe nih “Kan hmuhsak hen” tiin a au hnawh.

Independent senator Lidia Thorpe reacts during debate on the Voice to Parliament in the Senate chamber at Parliament House. Source: AAP / Lukas Coch