Naite thil a cangmi zoh tikah, Australia ram ram mi online hmangin hlen an tong ngaingai, cun phone hmang zongin an rak chawnh hna i pumpak konglam le phaisa an fir piak hna.
Mifir cheukhat cu cozah le cozah he a pehtlaimi company an i hmai thlak, cun company nganngan pawl an i hmaithlak. Mifir cheukhat nih mirang holh a thiam tuk lo mi, tar le zei a thei tuk lo mi tiah ruah mi pawl kha an i hmaithlak ve hna.
PWC ah rian a tuan lio mi, computer a thiam ngai mi Rob Di Pietro nih mi kong, thil kong pawl hi a van fak tuk mi a si tiin a chim.
Na konglam kha fir an duh, an fir khawh tikah Black market ah an zuar i phaisa tampi an hmu tiin a chim chap.
Pulrai zawtnak he a pehtlaimi hlennak a tong mi nih scamwatch ah an ripawt mi hi 6,415 leng a si. Pulrai puan hram a thokka in nihin tiangah a phaisa fang in hlen a tong mi nih an sunghmi hi $9,800,000 leng a si cang.
Dr Steve Hambleton cu Australian Digital Health Agency ah riantuantu le ruahnak petu pakhat a si.
Mi an ngandamnak konglam he pehtlaiin hlennak Australia chungah a tam ngaingai tiin a chim.
Mi pakhat i a konglam, a mah he a pehtlaimi thil kong kha black market website ah a man fak ngaiin an zuar. Mi pakhat nih a mah konglam hmanh a runven khawh lo i, midang kut ah a konglam pawl a phak a si cun mah vialte kha chuh than awk an tha ti lo tiin Dr Hambleton nih a chim.
Cozah Riantuantu kan si tiin Midang an hlen hnaCozah riantuantu bantuk an i siter i COVID-19 he pehtlaiin ca an kuat hna, phone hmangin siseh cun email hmangin siseh an konglam fir duh ah ca dik lo an kuat hna.
An konglam fir khawhnak caah hmeh ding mi link, link a dik lo mi an kuat hna. Mah link an hmeh sual si cun an konglam vialte kha an fir piak khawh dih hna tiin Dr Hambleton nih a chim.
A caan ahcun, cakuat an don tikah 'mygov' timi te a rak cuang lai, COVID-19 konglam tam deuh theih na duh si cun mah hi hmet ti bantuk kha a rak cuang lai tiin Dr Hambleton nih a chim.
Link hmeh awk na don mi kha na hmet hrimhrim lai lo, zeitik hmanh ah mah bantuk in khan MyGov nih an in pehtlai bel lai lo.
Mifir nih a lam kip in an in pehtlaih khawh, phone zongin an in chawnh khawh, social media hmang siseh, email le cakuat hmang zongin an in pehtlaih khawh tiin Dr Hambleton nih a chim.
Na email ah a rak lut mi cakuat na kau tikah link an chiah chih mi kha na hmeh hlan ah khua tha tein na ruah hmasa ah a tha tiin a chim chap.
"thil na cah mi kong he pehtlaiin a tlamtling lo mi a um caah mah link hi rak hmet ti bantuk cakuat kan don cio."
Thil na cahmi zeihmanh a um lo, thil a phan dingmi a um lo ahcun link te kha hmet bak hlah.
Source: Getty Images/boonchai wedmakawand
A dik fel lo mi cakuat, link hmeh dingmi a telmi cakuat ti bantuk na don tik tha tein na zoh hmasa lai. Nangmah he pehtlaihnak a ngei lo mi kha cu hlonh colh ko.
Na konglam pawl tahchunhnak ah, na umnak, na min, na chuah kum, na chuah ni le thla, cun na phone nambar ti bantuk hna an theih khawh ah cun nangmah caah tih a nung tuk cang.
Kha vialte an theih a si ahcun, bank ah an kal lai i phaisa vialte an i fir piak khawh dih lai.
Nangmah na sinak taktak, an in theihnak na konglam kha mifir kut cungah na phakter lo hrimhrim a biapi tuk. An kut cungah na konglam a phak a si ah cun man fak taktak in an zuar khawh.
Mah bantuk dirhmun, hlennak pakhatkaht na ton a si ahcun a rannak in cung lei nawlngeitu sinah theihternak na tuah zokzok a herh.
Mi cheukhat cu thil sual, hlennak silole an phaisa fir piak an ton tikah an ning zak i theihternak tuah an duh tawn lo. Mah bantuk thil sual na ton a si ahcun a rannak in cunglei ah theihternak na tuah colh ah a tha.
Theihternak tuah na duh ahcun scamwatch ah kal law ripawt tuah khawh a si.
