Kan kutken-fawn ah cakuat kan don mi siseh cun catlap in kan don mi cakuat ah an tial mi catlang cu “Na fian lo ahcun, No na ti lai” ti a si.
Cucu, I zuk phiak le zei hmanh rel lo he a khat ti nak si ko hnga lo ma?
Thimfung thlak khawhnak covo a ngeimi na si ko nain, thil biapi ngai a si thil ah na ruahnak langhter lo, I zuk phiak ding cu ruah than a phu ngai mi a si.
Na lung a fian lo, hngalhnak na ngeih lo ahcun na lung a pian khawh nak ding caah nangmah tein hlathlainak na tuah ding kha na tuanvo a si.
Ramkhel kongah I thlak na duh lo mi kha cu nangmah pumpak nawlngeihnak cungah a hngatmi a si. Nain, na fian lo ruang le a kong lam hlathlai na huam lo ruangah No na thlak ding cu a nauta tuk mi thil a si.
Yes na va thlak pek, No na thlak pek ah a konglam theih tawk theih le fian tawk fian bu tein na thlak mi kha thil dik le thil hman a si.
Thlen awk ah an chuahpi mi kha tha tein zoh ahcun, biatlang pathum a si.
Phunghrampi chung I Dal 9 nak ah khan ram ngeitu hna miphun kong an tial mi a um.
Aboriginal le Torres Strait Islander miphun hna kha Australia ram ngeitu an si tiin pom le cohlan ding:
1. Ram ngeitu miphun hna aiawhtu phu Aboriginal and Torres Strait Islander Voice ser a si lai;
Hi nih a langhter duhmi cu phunghrampi chungah hngalhpinak tuah a si lai.
2. Phu an ser mi (Aboriginal and Torres Strait Islander Voice) palai hna kha parliament ah ram ngeitu miphun aiawhtu an si lai. Ramkomh cozah hruainak ah hmunhma an ngei lai, cozah nih biakhiahnak a tuah mi nih silole rian a tuan mi nih ram ngeitu miphun a hnursuan sual tik hna ah cozah ruahnak peknak nawl an ngei lai;
Aiawhtu cu pumpak pakhat zong a si kho cun a phu zong an si kho, phungning tein cozah riantuannak ah aiawhtu sinak in biachimnak nawl an ngei. Phungning tein aiawhtu nih ruahnak cheuhnak bia an chim mi cu cozah zong nih tha tein a cohlan mi a si.
3. Phung sertu cozah cu (Aboriginal le Torres Strait Islander Voice) ruahnak petu phu ser nak kongah upadi sernak an ngei lai. Upadi an ser tik belte ah phunghrampi chirchan le zohchih buin upadi an ser a hau hnga. Cun, ruahnak petu chungah mi zeidah a tel kho lai, zei rian dah an tuan lai, nawlngeihnak zeitluk dah an ngeih lai, zeitindah rian an tuan lai timi vialte kha phungsertu cozah kut cungah a um ding a si.
Ruahnak petu phu an ser ding mi muisam hi cu phung sertu cozah kut cungah a hngatchan, an mah tuanvo a si. Mi zeidah thim an si lai le zeidah an tuah khawh lai timi hi phung sertu cozah tuavo ah hngat.
