Myanmar Ram Mi Nuaikhat Tluk Umnak An Ngei Lo Tiin UN Nih A Chim

Aung San Suu Kyi nih a hruaimi cozah a tlak hnu in umnak ngei lo dirhmun a phan mi hi sing 700,000 tluk an si cang. Faruahthawh caan nih le a nai chinchap cun ramchung kahdohnak zong ngol loin kalpi cuahmah a si tikah mipi caah har ko tiin United Nations nih a chim.

Source: AAP, EPA

Hightlights

• Ram buai hram a thok ni in nihin tiang kan dirhmun zoh tikah inn le lo zam tak hau dirhmun a phan mi hi sing 700,000 tluk an si.
• Ralkap nih hruhru hranghrang in mipi an hrem hna ruangah ram mi nuaikhat leng zam an hauh hi kawlram tuanbia ah a voikhtnak bik  a si.

Ram a buai ruangah inn le lo zam tak hau dirhmun ah a phan mi nuaikhat leng an si. Nuai khat leng umnak ngei loin ram mi an zam a hauh hi a voikhatnak bik a si tiin UN nih a chim. Kahdohnak nih le pehzulh in a kal fawn cun faruahthawh caan nihle a nai cang tikah a zam mi pawl thutdirnak le dornak kongah an har sa ngai lai tiin a chim chap.

Aung San Suu Kyi nih a hruaimi cozah thlak a si hnu in umnak ngei loin a zam mi hi sing 700,000 tluk an si tiin  UN Office for the Coordination of Humanitarian Affairs nih kan hnu zarh cawn nihnihni ah khan thawng a thanh.

Ralkap uknak le thithruainak tangah kan um duh lo an ti caah mipi leiin hriamtlai phu an dir ve. Mipi lei in hriamtlai phu a dir mi le ralkap kar kahdohnak a chuak mi nih zapi an tuarnak a fahter chinchin. Razing khuate telh chih in khuate chung inn le lo an hrawh dih, vanlawng in khua chung mipi an doh hna.

Demonstrators holding flaming torches march during an anti-military coup protest at downtown area in Yangon, Myanmar, on 26 June, 2021. Source: AAP, EPA

Atu tiangah ralkap nih inn le lo an hrawhmi le an khanghmi hi thong 12,000 leng a si. An inn hrawh piak a tongmi pawl cu ramtang ah maw silole hmundang ah dornak an kawl. An mah pawl caah thinphang le ngaihchia a si mi cu faruahthawh caan kan panh duahmah mi hi a si tiin UNOCHA nih a chim.

Ral a thawh biknak hmun le ral ruangah a zam mi an tam biknak hmun cu sagaing ramthen a si. Inn le lo zam tak in, umnak a ngei lo mi hi sing 300,000 nak tam an si.

Kahdohnak a fah khunnak hmun a si caah rawl siseh, si-aii le datsi te pawl fawi tein luhpi khawh an si lo. Cun, Sagaing le Magway kiangkang vialte cu phone le internet line an thah dih tiin thawng theih a si fawn.

“Ngandamnak lei I zohkhenhnak siseh, ei din ti rawl lei ah siseh cun i dor chung caan hman a herh mi thilri pawl an catcham ngaingai” tiin thawng kan theih.