Myanmar ralkap nih an tawlrelmi Facebook page "True News" thawngpang zamhnak caah an hman mi cu phung an buar caah cung lei nawlngeitu hna nih zarhpi ah an thah.
Kan hruaitu, mipi nih kan thimmi cozah lutlai rak kan thlah piak uh. Aung San Suu Kyi kan thlah piak uh tiah doh aunak a telmi cheukhat hna cu thah le nawn an tong. Duhlonak alanghtertu hna le Civil Disobedience (mipi nuarnak) cawlcanghnak ah a telmi pawl hna cu ralkap nih an kah hna i an thah.
Nobel minthatnak a rak cotu cu ramkhel a riantuanti hawi hna he ralkap nih thla hramthok ah an tlaih, asinain ralkap cozah nih cun phungning tein bakin kan tlaih hna tiah thanhnak a tuah.
Aluancia Nov thla i thimnak ah khan fak ngaingai Suu Kyi nih a hraimi ramkhel phu nih teinak an hmu. Asinain, ralkap nih a dikfel lomi thimnak a si tiah duhlonak a langhtertu hna sinah tthihpheihnak an chim.
Tatmadaw nih thawngpang thanhnak ah an hmanmi True News cu zulhphung a buar lengmang caah thah le hloh piak a si tiin Facebook lei biaphuangtu nih a chim.
Facebook nih kawl ralkap he a pehtlaimi Facebook page pawl zong a rak thah piak lengmang cang hna. Ram chung thil cang mi kong he pehtlaiin facebook ah tarlanghmi pawl sual phawt le kaan-kuan lengmang a rak si cang.
A tam deuh cu Rohingya pawl an umnak hmun ah an rak tuk hna i,2017 ah Bangladesh ram lei ah pem lak in a rak tthawl hna nak kha fak ngaiin rak mawchiat bik a ruang pakhat a rak si ve. Kha lioah khan minung 750,000 hrawng Bangladesh ah Rohingya pawl cu dawrnak an rak kawl.
Ralbawi Min Aung Hlaing le ralbawi cheukhat hna cu sual phawt an rak si. UN nih kherhlainak tha tein a hun ngeih dih hnu ah miphun hme cihmih na timh, na tha na nawn hna tiih sual an rak phawt hna.
Cu lawng si loin February 1 i Suu Kyi tlaih a si hnu i mipi lam cungah an ttah le an hramnak cu vawleipi nih hmuh le cuanh cio dih a si.
Kan hnu zarh niruk ni Mandalay khuachung ah duhlonak langhter lam an zawhnak ah minung 2 an nunnak a liam. Palik kut in dai tein doh-aunak ah a telmi hna cu meithal in an kah hna.
Cun ramchung thil cangmi, mipi aw-aan ramleng phan kho hlah seh tiin thuhnawh dingin Facebook hmang lo dingin rammi a phih khanh hna.
Facebook ah thawngpang kan zamh kho ti loin a tanglei langhtermi ah thawngpang kan thlahmi rel le ngaih khawh an si.
SBS Radio App hmang zongin len khawh kan si. Android le IOS zongah man lo tein Download tuah khawh an si.
