National Reconciliation Week Le Australia Ram Mipem Nih Kan Hngalh A Herhmi

National Reconciliation Week ah hin Australia rammi vialte hna nih khat le khat kan nunphung, kan tuanbia le hlawhtlinnak kan hmuhmi I sunsakpinak in zarhkhat chung caan hman a si. Cu pinah, Australia ram vawlei a ngeitu hna le ram a rak tla hmasa tu hna relriam tein nunkhua kan sak tti khawh nak dingah remdaihnak ser ttinak in caan hman a si.

The theme of National Reconciliation Week 2021 is More than a word. Reconciliation takes action. Source: WILLIAM WEST/AFP via Getty Images

National Reconciliation Week kan timi hi zei dah a si?

1967 May 27 lio ah ram ngeitu (Aboriginal) cu phung ning in rammi milu relnak ah telh ve an si khawh nak dingah phunghram thlen dingin Australia rammi hna nih biachahnak an rak tuah. Cucaah National Reconciliation Week cu Aboriginal ram ngeitu hna milu relnak ah phungning tein telh an sinak philh lonak caah tuah a si.

Cun, 1992 June 3 lio ah Australia ram biacheihnak sang bik nih ram ngeitu taktak cu Aboriginal le hi vawlei a rak tla hmasa mi hna ta a si tiah fehternak biachahnak a rak tuah mi philh lonak ca zongah tuah chih a si hi a si.

---

• Atu kum 2021 National Reconciliation Week caah tlangtar cu ‘Hmur le kaa nak in, Tuahsernak a telmi remdeihnak hmual a ngei deuh’ ti a si.
• Remdaihnak sernak cawlcanghnak ah mipem mi hna zong I teltum ve dingin Reconciliation Australia le FECCA nih sawmnak an tuah.
• Atu kum zong Australia rampi remdaihnak lamthluan ah kum 20 leng a kalnak langhtertu a si.

---

Atu kum 2021 National Reconciliation Week caah tlangtar cu ‘Hmur le kaa nak in, Tuahsernak a telmi remdeihnak hmual a ngei deuh’ ti a si. Australia ram cu kum 20 leng remdaihnak lam thluan a zawh cuahmah lio a si.

Reconciliation Australia ah lutlai bik rian a tuan cuahmah mi Karen Mundine nih remdaihnak cu ahopoah kan tuanvo a si cun kan tonmi thil vialte hna lakah hmual a ngei mi thil a si tiah a chim.

“Atu bantuk lio caan hi aho kan caah a sunglawi tuk mi a si, zei bantuk pehtlaihnak dah kan ngei timi ruah than caan zong a si. Kan pawngkam mi hna he zong kan I ruah ceihhmai dingmi thil le atu lio I an tuahmi cawlcanghnak chungah kan I tel ve ding hi a biapi tuk mi a si” tiin SBS Radio ah a chim.

This year marks 20 years of Reconciliation Australia - the national body for reconciliation. Source: Reconciliation Australia

Mipem le Remdaihnak

Mohammad Al-Khafji cu Federation of Ethnic Communities Councils of Australia ah lutlai rian a tuan lio mi a si. Australia cu miphun tampi a cawhmi ram kan si I mipem zong nih remdaihnak lamthluan ah hin kan I teltum ding a biapi.

“Miphun dang nih zei dah an ton mi le an tuanbia hna theih le hngalh ve cu kan tuanvo a si. Kan ton mi le an tonmi thil hna a lo kho I thlennak a um khawh nak dingah a kan mawngtu zong a lo kho men” tiah a chim.

Miphun thleidanhnak kan tuar tti, din lonak in tuahto kan tong veve cun hi ram ah duhdim tein in nunkhua sak ve kan duh.

National Reconciliation Week timi a muru a thei lo mi mipem chungah an tampi lai.

Mipem tam u cu Aboriginal le ram rak tla hmasa mi hna zeitin kan chawnh biak hna lai ti le an nunphung le an tuanbia zong kan thei lo.

Nikum ah khan FECCA nih mipem hna caah cauk an chuah I cu cauk nih cun mipem mi hna nih ram ngeitu le ram rak tla hma mi hna he pehtlaih an thiam khawh hna nak ding caah bawmtu a si lai ti nak he an chuah.

                Hi kongah hin cun a hman le hman lo ti a um lo. Zumh ngamnak te he pehtlai hna law cun midang an nunphung le an tuanbia hna kha hngalh khawh I zuam. Mipem mi hna I kan rian a ngan bikmi cu Mi hmasa hna an au-aan a thanter chin tu kan si ding hi a si.

National Reconciliation Week kong tam deuh in theih na duh a si ahcun, www.reconciliation.org.au ah len khawh a si.