Key points
- Ti a lianh lioah mawtaw mongh bak lo ding a ruang cu ti kha 15cm tluk sang in a lianh ahcun mawtaw a ke a nal cang lai.
- Bawmhchanh na herh sual cun State Emergency Service kha 13 25 00 in chawn hna. A rannak in bawmh na herh ahcun 000 chawn.
Nikhua caan he pehtlaiin hngalhnak a ngei mi hna nih ruah a tam lai caah ti a lian kho tiin New South Wales nichuah lei kam ah a um mi pawl cu ralrin peknak thawng voi tam ngai an rak thanh hna.
Australia ram mi pawl cu ti a lianh sual ah zeitindah kan I runvennak caah an herh ningin timhlamhnak zeihmanh an ngeihmi a um lo tiin Allianz nih an tuahmi kherhlainak nih a langhter. Nikum chung lawngah thlichia le tilian nih inn le lo a rawhmi hna hi $2.4 billion man a si tiin Mark O’Connor nih chim.
Timhlamh, har ton hlan ah timhcia tein um
Nan chungkhar he khua nan saknak inn le lo kongah timhlamhnak tha tein na ngeih cia a herh. Na innpa hna kha biaruah hna cun nan pawngkam ah a um mi bawmhtu phu pawl kha tong hna law ruahnak hal hna. Cun, na inn le lo caah insawren na chiahnak campany hna kha chawn hna law zulhphung an ngeihmi pawl hna kha hal hna tiin O’Connor nih mipi ruahnak a cheuh hna.
Thil sual ton tikah hman dingmi tiin i thopnak, din ding ti, le ei ding rawl kha timlam cia hna. Cun, philh awk tha lo mi phone tunnak (I ken awk tha mi) kha timhcia tein chia.
Tilian nih kan inn a phak khawh men ti na ruah ahcun, a biapi mi thil pawl le, thil man sung a si mi pawl kha a si khawh chungin a sannak ah chiah an tha tiin Baker nih a chim.
David Baker cu Victoria State Emergency Service ah lutlai rian a tuan lio mi a si. A zungzal in har ton sual caan a phak tikah kan hman ding mi thil le kan herh te ding thil pawl kha hman colh te awk tha ding kan timh cia hna a hau. Ti a lian caan le mei a thawh tik caah hman ding tiin timhlamh cia mi kan ngeih a herh tiin forhfialnak bia a chim. Timhlamh chung ding zei an si ti na hngalh lo ahcun SES website ah zoh khawh a si.
A si khawh ah cun cucu-eih chungah vawlei silole lungdip nan I rawn cia ah tha. A ruang cu nan inn chungin lengah ti thur a luannak kha mah in khan nan kham piak lai, nan kham piak lo ahcun ti a lianh tikah khaka in khan ti a lut lai I nan zun inn khan ti a liam lai.
Source: Getty Images/Colin Anderson Productions
Tlik le zaam nan hauh sual, a him deuhnak hmun ah I thial nan hauh a si ahcun nan I thawh hlan ah nan kal nak ding lam kha nan I zoh cia a herh. Cun, him tein nan I timhnak hmun nan phak khawh nak ding caah lam zulh ding mi a dang nan I hlat cia ah tha.
Ti a lian caan ah hin cun, tuan lei pangah tlik zaam cia hi a tha bik mi a si.
Ti nih a phum cang mi lam ah mawtaw mongh lo ding
Ti a puan ko ti pat in pah chih ding a si lo. Ruah a sur tuk lio hna a si chinchap hna ahcun zei kar lo ah mawtaw zong a fanh khawh. Mi tampi an thihnak zong cu ti a puan ko rua an ti lioah an mawtaw cu ti nih a fanh I an nunnak tiang a liam beh tawn.
Ruah fak tuk in a sur lio ah cun mawtaw kha a remnak le a himnak hmun ah dirter chungah a tha, a silole hmun a san deuhnak lei kam fuh ah tha cem.
Tih a nung kho tuk. Mawtaw cheukhat caah cun ti kha 15 cm nak tuk deuh a si a hau lo. Cafung patkhat tluk tuk in ti nih lam a phum ah cun tilian lak ah mawtaw cu a fuan cang ko lai.
Source: Getty Images/Charles Briscoe-Knight
Na nunnak caah tihnung dirhmun na phak tik, tlik zam awk a that ti lo ah cun, a himnak hmun le a san hmun khan kal law zero pathum (000) kha hei chawn.
Ti fak tuk in a lianh ahcun inn chung mei a hrawh lai, ti thur a luannak hna kha hrawh lai cun inn chung tang thil dangdang pawl zong an rawkral lai.
Nan inn chung I ti tthiang din awk a that rih lio ah khan a si khawh cun ti kha ti thawl chungah I rawn cia hna. Ti thiang din awk a um ti lo tikah, na ti thawl ta kha din awk na ngei te lai.
Ti nih inn chung mei a hrawh tikah thil kihternak bawm kha rian a tuan ti lai lo I a chungah nan chiahmi ei din ding pawl kha an rawk kho I ei awk tha loin an um lai.
Ti nih lam a phum dih cang a si ahcun na umnak hmun khan I thial ti hlah. Tlik le zaam lo khan bawmtu an rat kha hngak ko.
Source: Getty Images/Tobias Titz
State Emergency Service website ah khan kal law, ti a lianh sual ah zeidah tuah ding timi pawl zoh le rel khawh an si.
Ni khuacaan kong he pehtlaiin thawngpang an thlah mi zoh le rel na duh ahcun ah len khawh a si.
Ti lianh ruangah bawmh na herh ahcun SES kha 13 25 00 in chawn hna.
Rianrang deuh in bawmh na herh, na nunnak caah ttihnung dirhmun na phak ahcun 000 chawn.
Holhlet na herh ahcun 13 14 50 chawnh khawh an si.
Source: Getty Images/Rafael Ben-Ari
