- Suimilam 24 chungah Victoria ah COVID in a thi mi hi 11 an si i, NSW ah COVID zawtnak in a thi mi hi an dihlak ah 5 an si.
- Queensland ah ramkulh mi pasarih cu rai zawtnak in an thi.
- Victoria ah raikhamsii voithum tiang a chun cang mi hi zatuak 64% nak tam an si cang
- A rauh hlan ah ramleng khual a tlawng mi hna caah zulhphung an thlen dingmi a um. A hlan-kan in rai zawtnak i chek a hau tawn mi kha hloh a si cang lai tiin Scott Morrison nih thawng a thanh.
- Atu lioah cun khual a tlawng mi poah, raikhamsii tlingin a chun mi zong nih negative an sinak kha an hmuhsak hna a hau.
- Hi zulhphung he pehtlaiin Greg Hunt nih thawng a thanh zau lai tiah a chim.
- China ram i minung nuai 5 tluk umnak khua pakhat cu cawnni hnihni ah khan rai a chawn mi 4,000 nak tam an si caah phihkharnak an tuah.
Australia Ah Rai A Chawn mi cazin
New South Wales nih thawng an thanhmi ah kan hmuh khawh mi cu rai ruangah siizungah a thlop mi hi 1,162 an si, cu chungah ICU ah a ummi hi 44 an si. Suimilam 24 chungah rai a chawn mi hi 24,115 an si, cun rai ruangah a nunnak a liammi 5 an si.
Victoria nih thawng an thanhmi zoh tikah kan hmuh khawh mi cu rai ruangah siizungah thlop a hau mi hi 243 an si, cuchungah ICU ah a um mi hi 23 an si. Thli thiang dawpnak seh thlaih a hau mi hi 5 an si. Pulrai a chawn thar mi 10,471 an si i rai in a thi mi hi 11 an si.
Queensland ramkulh ah thawng an thanhmi a langhter ningah rai a chawnmi hi 10,476 an si, rai in a thi mi hi pasarih a si. Rai ruangah siizungah thlop a hau mi hi 252 an si cun ICU ah thlop a hau mi hi pasarih an si.
Zawtnak I Chek Khawhnak Hmun hna
RAT in zawtnak an chek i positive na si sual cun hika ah theihternak tuah khawh a si.
