Giacomo cu kum 25 tlangval a si. A nih hi Italy ram mi a si i inn sak a thiammi a si. Kum 2018 ah khan riantuannak viza in Australia ram ah a phan i sianghngakchia viza a sokmi a si.
Caan a rauh hnu ah rianngeitu pakhat nih zungthiammi nih an i tlaihmi caantawi umnak viza soknak a bawmh.
- Australia rammi a si lomi poah nih a nungmi viza an i tlaih dih hrim a herh.
- An viza a dih hnu ah Australia ram ah a tangmi poah cu upadi he a ralchanhmi ramlengmi ah hmuh an si caah thongthlak le ram in tthawl khawh an si.
- An viza a dih hnu in ni 28 nak sau deuh a cammi poah cu kum thum chung dantatnak pek khawh an si.
Giacomo cu 482 viza a soknak a tuah i Bridging Visa A timi an pek. Asinain, a timtuahning in thil a kal ti lo.
Kum 2019 ah khan sponsorship visa ka sok i bridging visa in ka um. May thla ah COVID pulrai a hung puang i rian loin ka um. Rian loin ka um caah visa sokmi zong a tlamtling ti lo.
COVID-19 pulrai a hun puan bakin rian in dinhter a si. Rianngeitu a pu nih a tawlrel pimi visa zong cu ngol than a si.
*Giacomo worked as a carpenter in Sydney. Source: Anna Shvets/Pexels
Giacomo cu Department of Home Affairs nih na sokmi 482 viza cu ni 35 chungah rak let than. Viza dang rak sok than a si lole hi nan ramah na kir a hau tiah ca an kuat.
Mipem zohkhenhtu bawmhnak in khualtlawngtu viza cu a sok than. Asinain, a sokmi cu an cohlang lo a ruang cu sianghngakchia viza a tlaihmi a thihnak ni 28 leng a si cang. A sokmi viza an pom piak lomi he pehtlaiin nawlnak a tuah than hna.
Upadi Ralchanhmi Ramlengmi
Emanuela Canini cu mipem a bawmchantu Migrant World ah rian a tuahmi a si. Giacomo bantuk in, mi tampi deuh cu Australia ah phungning tein an um ko hna.
Asinain, mi cheukhat cu viza loin an um a ruang cu viza dang an sok hlan ah an i tlaih liomi viza nih a thih tak cang hna.
An i tlaihmi viza a thihter hramhrammi pawl tam deuh cu khualtlawngtu viza a tlaihmi an si i sianghngakchia viza a tlaihmi chung zongin an um thiamthiam.
Hi thil a can hi an hngalh lo ruang zongah a si i an hngalh ko buin a cangmi thil a si tiah a chim chap.
"Ka tonmi chungin ka hmuh khawh mi cu mi cheukhat cu riantuannak viza in an rak ra i an viza zei tik a thok le a thih zong a thei bak lomi an um."
Mi cheukhat nih an viza a dih hnu in ni 28 chung Australia ram chuah tak rih loin an um kho tiin a ruatmi zong an um tiah Canini nih a chim.
Source: James Russell/Pixabay
A hman lo mi a si. Na tlaihmi viza a thih ahchun a thi tinak a si cang ko.
mi pakhat a viza a dih hnu ah Australia ram ah a um rih a si cun upadi ralchanhmi ramleng mi a si cang tiah a chim. Amah cu tlaih i Australia in tthawl khawh a si.
Viza a thihmi i tlaih buin Australia ram in chuah
Mi pakhat a viza a dih a si ahcun, Department of Home Affairs nih tlunnak an tawlrel piak khawh. Bridging Visa E sokter an si lai i upadining tein tlunnak khan piak an si lai tiah mipem bawmhtu le sihni a simi Alessia Comandini nih a chim.
Source: Victor Freitas/Pexels
"Bridging visa E an ngeih a si ah cun phungning tein hi ram in chuahter an si lai i hnahnawhnak zeihmanh a um lai lo."
Mi pakhat a tlaihmi viza a thihnak ni 28 nak tlawm deuh a si ahcun duhthimnak tam deuh a ngei.
Sianghngakchia viza silole COVID-19 Pulraia puan ruangah caan tawi umnak viza sok khawhnak lam zong a um kho tiah Comandini nih a chim.
Kum Thum Chung Dantatnak
Asinain, a viza a thih hnu ah viza dang sok loin a um sawh ko i a nungmi viza ngei loin ni 28 leng Australia ram ah a um rih ko ahcun a thim khawh dingmi lam a tlawm tuk cang.
Kum thum chung dantantnak an ing kho, cu nih a sawh duhmi cu viza dang an sok tikah cohlan le pom piak an si lai lo tiin Comandini nih a fianter.
Phungning loin ni 28 leng Australia ah na um rih a si ahcun, Australia ram luhnak le umnak viza na hei sok than te tikah na viza cu caan rikhiah in an hnon piak lai.
"Hi nih a sawh duhmi cu Australia tlawnnak ding le umnak ding le adangdang viza na sok mi vial te cu kum thum chung an i hnon piak lai. Nangmah duh thimnak te he na kir zongah hi dantatnak hin na luat hlei lai lo.
Kum thum chung dantatnak hi Australia ram na chuahtak ni bakin a nung dingmi a si.
Hi dantatnak cu a viza a thihnak in ni 28 chungah Australia ram a chuahtak lomi le ni 28 chungah Bridging visa C, D le E a tlaih lo mi pawl nh an in dingmi a si.
A si ahcun, zeitindah hi phungning loin Australia ram ah a ummi ramlengmi nih an inmi dantatnak cu kan hrialning a si lai?
Passport visa Source: Getty Images/belterz
Na tuah hnga dingah a tha cemmi cu na viza a thih te ding nile thla hngalh khawh peng i zuam tiah Canini nih a chim
Na tlaihmi viza zei tik tiang dah a nun lai tiah zoh na duh ah cun na viza pom piak na sinak ca an in kuatmi chungah fiang tein a tial ko. Department of Home Affairs website zongah na passport le na viza hmangin zoh khawh thiam a si.
Nan ram ah kir than awk tha lo dirhmun in na um a si ahcun Protection Visa timi na tlaih liomi viza a dih hlan hmanh in na sok khawh.
Na viza kong he pehtlaiin bawmhchanh na herh a si ahcun a tanglei i langhter mi pawl hna hi pehtlaih khawh an si:
NSW
Refugee Advice and Casework Service 02 8355 7227
Immigration Advice and Rights Centre 02 8234 0700
Victoria
Refugee Legal 03 9413 0100
Asylum Seeker Resource Centre 03 9326 6066
Victoria Legal Aid 1300 792 387
Queensland
Refugee And Immigrantion Legal Service 07 3864 930
Western Australia
Circle Green Community Legal 08 6148 3636
*A min kan langhtermi kha a mintak a si lo
