Kum dang bantuk si loin Kum Thar donnak cu tuah a si lai. Pulrai puanchuah ruangah Australia ram mipi hna nih zulh dingin phihkhamnak zulhphung cu rengh deuh a si.
Cun phangphang puahnak in kumthar donnak tuah tawnmi cu tuah lo dingin khuakhan a si. Inn ah mileng ngeih khawh zat cu thumh deuh than a si cun khat le khat i kuh le i hnah lo dingin khamnak an tuah.
Cu he pehtlaiin, khamnak tuahmi pawl chungin na tuah khawh mi le tuah lo ding thil pawl hna.
New South Wales
Zaanlei nazi pakua i chungkhar in phangphang hmunkhan ah puah ttinak cu tuah lo ding a si lai. Nain, zaantim chikhat caantawite Harbour Bridge ah phangphang puahnak a um te lai. Tv in hei zoh ding lawngin a rem cang kho lai a ruang cu mibu umthutnak ding caah hmunhma awnh a si lo. rawldawr ah thutnak ham cianak a tuah mi le rawldawr ah rian a tuanmi pawl lawng khuachungah umnak nawl pek an si lai.
Yellow zone tiin mi tlawmpal tonpumhnak sernak ding hmun tuah piak mi hmunhma a um.
Yellow Zone ah mi zei poah tonnak ser khawh a si ko nain minung tamtuk um thut a si ah cun palek nih a herh ningin tuanvo an lak lai tiah NSW ngandamnak lei lutlai nih an chim.
Wollongong, Central Coast le Blue Mountains khua pawl le Sydney khua chung ummi pawl caah khamhnak tuahmi cu rengh deuh a si. chungkhar pakhat nih mileng 5 lawng ngeih khawh a si lai i cu chungah cun hngakchia telh chih an si.
Cu lawng hlah, lengah minung 30 lawng tonnak nan ser khawh cang lai, minung 50 in 30 ah thumh deuh a si.
Sydney khua chaklei a ummi pawl caah nawl chuah mi ' Leng chuak hlah' timi cu a mah ning te a si ko i Jan 9 tiang a nung dingmi zulhphung a si, asinain chungkhar hna nih Dec 31 zaan ah cun hngakchia telh in minung 5 mileng ngeih khawh nak nawl pek an si.
Thlanglei khuaram khuasa pawl hna zong nih hngakchia telh in mileng 5 an ngei kho ve lai. Sydney khuachung khuasa mi pawl cu cohlan lo ding a si lai.
Chaklei rili kam a ummi pawl hna nih rawldawr le dangdang dawr pawl ah thil cawk zalh an duh sual si cun a cah in cah lawng a ngah lai.
Sydney khualeng ah a ummi pawl hna, nan umnak khongsil upa pawl nih khua an khanmi zulhphung pawl kha tha tein nan zoh a hau lai.
Queensland
Brisbane khuachung phangphang puah lo dingin khuakhan a si, cun khat le khat hnah l kuh lo ding a si lai.
"Kum Thar Don zaan ah cun kan hawikom naihniam hna kuh le hnah cu kan duh mi a si bang, rikhiahnak ngei bu te le fimkhur tein na um ding ah kan duh piak" tiah Ramkulh ngandamnak lutlai Dr Jeannette Young nih a chim.
Chungkhar pakhat nih mileng 50 ngeih khawh a si, cu chungah inn tek zong relh chih an si.
Leng tonpumhnak cu minung 100 tiang a ngah.
Victoria
Inn hngak loin leng a chuakmi poah dawr khan chung cun inn chung pakhatkhat an luh lai ah hmaihuh an i hruk hrimhrim a hau lai, zaan lei nazi 5pm hnu in.
Chungkhar khat nih mileng ngeih khawh zat cu 30 in 15 ah thumh a si.
Victoria khuasa Wollongong silole Blue mountains ah khual a tlawng mi poah Dec 27 hlan ah Victoria ramkulh ah kir hrimhrim ding a si lai.
Khualtlawnnak in a rak kir mi poah suimilam 24 chungah cheknak tuah hrimhrim ding a si, cun ni 14 chung erhkhumhnak ah um ding a si lai.
Melbourne khuachung ah phangphang puahnak tuah lo dingin khuakhan a si, Melbourne khuasa poahpoah CBD ah um kal lo a ngah lai lo. Khungchung ah a umkal kho ding hna cu rawldawr maw pakhatkhat ah hmunhma hamnak a tuah cia mi pawl an si.
Zu dawr, rawl dawr, le din einak hmun pawl ah minung tlawmte lawng cohlan ding a si lai.
Western Australia
Ramkulh chung hmun cheukhat pawl hna ah phangphang puahnak tuah a si lai, i zaanlei 8pm hnu in timhtuah a si lai.
Ramkulh chungah zulhphung rengh hleinak tuahmi zei hmanh a um lo, tonpumhnak kongah zulhphung a thleng mi a um lo.
South Australia
Adelaide khuachung ah Phangphang puahnak cu tuah lo dingin khuakhan a si, nain khongsil cheukhat hna nih cun puah dingin timhtuahnak an ngei. Murray Bridge, Whyalla, Victor Harbour le Port Lincoln ah phangphang an puah lai.
Inn khat ah mileng 50 tluk cohlan khawh a si lai nain minung 1 ah pe 2 dan in umthut a si lai.
Tonpumhnak pumpak in tuah a si ah cun minung 200 nak tlawm lawng sawmnak tuah khawh an si lai.
Tasmania
Hobart ah phangphang puahnak tuah a si lai.
Tasmania ah pe 2 dan hlat in umthut ding timi zulhphung cu nunter a si nain, minung 250 nak tam tonpumhnak ca lawngah a si lai.
Leng tonpumnak ah minung 1000 tluk tam tonnak ser khawh a si lai.
Hobart City fireworks Source: Hobart City Council
ACT
Australia ram khualipi ah voihnih tiang pehzulh in phangphang puah lo a si. Avoikhat nak cu ram mei kangh ruangah a si i a tu hi avoihnihnak a si.
Sihmansehlaw, pumpak in mah le sangveng cio le hmunhma dangdang cio ah phangphang puah dingin timhlamh a si.
ACT ramkulh chungah mileng ngeih khawh zat cu rikhiahmi a um lo.
Leng tonpumhnak ah minung 500 tluk tam lawng tonnak ser khawh a si lai i pe 2 dan hlat in umthut ding a si lai.
Northern Territory
Ramkulh chungah mileng ngeih khawh zat le tonpumhnak ah milu rikhiahmi zat cu a um lo. Leng ah siseh, inn chungah siseh khamnak tuahmi a um lo nain hmunkhat ah a um tti lo mi cu 1.5m hlat in umthut ding a si lai.
