Australia ramkulh le ramthen kip ah minung tam taktak nih raikhamsii an I chunh cio cang bang ramleng khualtlawng hna caah ramri hun than mi le phihkharnak zulhphung dorh deuh an hun si kha hmuh khawh cio a si.
Rak I ruah cia bantuk in a phichuak cu rai a chawn mi an hun karh duahmah than I cu hlei lo ah, pulrai ttihnung ngaingai mi Omicron le Delta rai hna cu mi tam nawn nih an I chawn cio. Cu tikah ngandamnak lei thiamsang hna nih I runvennak ah a tha cemmi pulrai khamsii a thawntertu I chunh cio dingin zapi sinah thanhnak le sawmnak an tuah.
Raikhamsii a thawntertu ding I chunhning cu raikhamsii a voikhatnak le a voihnihnak he khan a khat bak mi a si tiin raikhamsii a sertu hna nih an chim.
“Raikhamsii a thawntertu sii nih kan pum chung raikhamtu a thawnter deuh, a hleiin Omicron pulrai a karh chin nak hnga lo kan dohnak ding caah a biapi tuk mi a si”, tiin ngandamnak lei vuancicho Brendan Murphy nih a chim.
Raikhamsii a thawntertu sii an tawlrel
Dec thla hramthok ah khan raikhamsii a thawntertu sii I chun hram cu thok a si cang. Australia ramchung hmun kip ah I chunh cio khawh a si cang. Australia ram mi tampi cu Omicron pulrai zawtnak hi raikhamsii tlingin kan I chunh cang hnu zongah kan I chawn kho sual lai ti an phan caah tuan khawh chung tuan ah raikhamsii a thawntertu chunh zokzok an duh.
Cucaah, Australia ramchung raikhamsii sertu le thiamsang hna nih raikhamsii a thawntertu cu thla ruk hnu ah I chunh khawh a si lai tiin an rak thanh nain, atu ah cun thla nga ah an thumh than cang.
Nihin ni ah raikhamsii a thawntertu a chun cang mi hi a milu in nuai 1. 5m leng an si cang.
Moderna raikhamsii le Pfizer zong ATAGI nih raikhamsii a thawntertu sii hman ve ding a cohlan cang hna.
Mi tampi nih an I chunh cio nak hnga caah ramkomh, ramthen le ramkulh cozah nih raikhamsii a thawntertu sii kong biatak tein an aupi cuahmah.
Kum khua upa caah raikhamsii a thawntertu
A kum in kum 70 nak upa a si cang mi, kum 65 hrawng a si mi chungin a kum leng in a zawtnak thlop hau mi le an pum chung zawtnak a dotu a thawng lo mi pawl hna hi pulrai zawtnak nih a tlunh a fawi deuh mi pawl an si tiin cozah ruahnak petu nih an chim.
2020 kum hramthok Jan thla in nihin ni tiangah kum khua upa chungin pulrai zawtnak ruangah a nunnak a liam mi hi 1910 an si cang.
An caah Omicron pulrai le Delta pulrai zawtnak I chawn ding cu a fawi chinchin mi a si nain raikhamsii a thawnter tu I chunhnak nih zei tluk mi ngandam lo an si zongah a lat in an him deuh.
PM Scott Morrison received his COVID-19 booster vaccination alongside Jane Malysiak in NSW. Source: SMH POOL
Australia ramchung tar pawl hna cu raikhamsii a thawntertu I chunhnak ah hin a hmasa cem ah chunhter an si.
Raikhamsii a thawntertu I chunhnak dingah kum 18 in a cunglei lawng chunhnak nawl pek an si.
Tar zohkhenhnak ah a ummi pawl chungin raikhamsii thawntertu chunh a duh mi an um ahcun cozah siikhan ah an I chun kho.
Kum khua upa a si cang mi hna nih Raikhamsii a thawntertu chunhnak kong theih an duh ahcun hika ah zoh khawh a si.
Hngakchia caah raikhamsii
Hngakchia kum 5 in kum 11 kar a si mi hna caah Pfizer raikhamsii cu ATAGI le TGA nih an pom cang caah raikhamsii an I chun kho ve cang.
Kherhlainak le zohfelnak tha taktak in an tuah dih hnu ah hman awk a tha cang ko tiin ATAGI nih Cathanh an chuah cang.
Raikhamsii I chunhnak ding caah siibawi tonnak caan cu ser khawh a si cang nain 2022 Jan 20 in sii chunh hram thok a si te lai.
Vaccinating children can help reduce community transmission and prevent them passing the virus onto the wider community. Source: Getty Images
Avoikhatnak le avoihnihnak I chunh caan belte cu zarh 8 dan in si seh tiin ATAGI nih an thanh. Nain, rianrang le thil biapi tuk ruangah I chunh zokzok a herh ahcun zarh 3 dan zongah I chunh khawh a si ko.
Kum 5 in 11 kar a si mi hngakchia chungin zawtnak dangdang a ngei mi an si ah cun an caah thil ttihnung ngai a si, pulrai nih fawi tein a tlunh khawh hna. Mibu sin tlawn len cu an caah tihnung ngai a si nain raikhamsii an I chunh khawh a si ahcun an caah thathnemnak tampi a ngei lai tiin ATAGI nih an chim.
Pulrai zawtnak nih a tlunh balmi hngakchia an si zongah an dam cang a si ahcun raikhamsii an I chun kho ko.
Hngakchia nih an I chunhmi raikhamsii a tlawmtam cu upa he a dang deuh vak. Avoikhatnak a chunh lio ah kum 12 a tling rih lo nain avoihnak i chunh caan ah kum 12 a tlin a si cun upa ta chunh a si lai.
Khoika dah bawmh ka hal lai?
Omicron zawtnak cu ttih a nungmi pulrai zawtnak a si tiin World Health Organisation nih thanhnak an hun tuah le cangka in, ramkomh cozah nih raikhamsii a thawntertu an ser mi cu an thar chuah than ve.
COVID-19 pulrai zawtnak in a zaw mi a thlopbultu siibawi Lucas De Toca nih raikhamsii a thawntertu sii a biapitnak kong a chim.
Booster doses provide an added layer of protection. Source: AAPAAP Image/Bianca De Marchi
“COVID-19 pulrai zawtnak caah thlopnak zeihmanh a um rih lo” tiah a chim.
Raikhamsii tlingin na chunhnak nile thla cu certificate an I pekmi te ah khan zoh khawh a si. Cu nile thla zoh chih in thla nga nak hnu ah raikhamsii a thawntertu sii na chun kho lai.
Dec 15 in khan hngakchia raikhamsii chunhnak caah siibawi tonnak ser khawh a si cang, khoika hmun ah dah chunh khawh a si timi hika zoh khawh a si.
Atu lio na umnak ramkulh le ramthen nih an ngeihmi zulhphung kong theih na duh ahcun hika zoh khawh a si.
COVID-19 kongkau tam deuh theih le fiannak dingah holhlet na herh ahcun Australian Traslating and Interpreting Services (ATIS) na pehtlaih khawh, 1800 131 450 ah chawnh khawh zong an si.
Cu lawng si loin, na sibawi le sii lei thiamsang pawl zong na pehtlaih khawh thiamthiam hna.
